សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជាបានថ្លែងអំណរគុណដល់បណ្តានិយោជក ក៏ដូចជាវិនិយោគិនដែលកំពុងបណ្ដាក់ទុនវិនិយោគនៅក្នុងប្រទេសកម្ពុជា តាំងពីដើមរៀងមកដោយមិនចាកចោលកម្មករ-កម្មការិនី ជាពិសេស ចូលរួមជាមួយរាជរដ្ឋាភិបាលកម្ពុជានៅក្នុងគ្រាដែលកម្ពុជាជួបវិបត្តិក្នុងសម័យកូវីដ១៩ ។ ការមានប្រសាសន៍បែបនេះ នៅក្នុងពេលចុះជួបសំណេះ សំណាលជាមួយកម្មករ-កម្មការិនី នៅតំបន់ព្រៃស្ពឺ រាជធានីភ្នំពេញ កាលពីព្រឹកថ្ងៃទី២៩ ខែសីហា ២០២៣ នេះ ។
ឯកឧត្តមកិត្តិទេសាភិបាលបណ្ឌិតបានមានប្រសាសន៍បន្តថា នៅក្នុងអំឡុងវិបត្តិកូវីដ១៩ និយោជកជាច្រើន ក៏បានចូលរួមជាមួយរាជរដ្ឋាភិបាលក្នុងការអនុវត្តនូវគោលនយោបាយ ដូចជា ផ្ដល់នូវប្រាក់ខែអប្បបរិមា ផ្ដល់ប័ណ្ណ ប ស ស ដល់កម្មករ-កម្មការិនី ជាពិសេសថែមទាំងពង្រឹង និងពង្រីកការវិនិយោគរបស់ខ្លួនជាបន្តបន្ទាប់ ។
ឯកឧត្តមបន្តទៀតថា និយោជកជាច្រើន តែងតែផ្ដល់កិច្ចសហការជាមួយរាជរដ្ឋាភិបាល ជាក់ស្ដែងនៅថ្ងៃនេះ និយោជកក៏បានផ្ដល់ឱកាសឱ្យកម្មករ កម្មការិនី មកជួបសំណេះសំណាលជាមួយឯកឧត្តម និងបានឈប់សម្រាកមួយថ្ងៃពេញ ដោយមានប្រាក់បៀវត្សរ៍ ។
ឯកឧត្តមបញ្ជាក់ថា ៖
« យើងមិនអាចធ្វើឱ្យវិស័យឧស្សាហកម្មដើរទៅបានដោយគ្មានតួអង្គសំខាន់ៗ៣នោះទេ ។ តួអង្គសំខាន់ទាំងបីនោះរួមមាន តួអង្គទី១ គឺជាកម្មករនិយោជិតដែលជាកំលាំងស្នូល ទី២គឺជានិយោជក រួមទាំងរដ្ឋបាលដើម្បីដឹកនាំការងារ និងទី៣ គឺអាជ្ញាធររួមនឹងក្រសួងពាក់ព័ន្ធ ពោលគឺរាជរដ្ឋាភិបាល។ ទាំង ៣ នេះហើយដែលបានជំរុញឱ្យវិស័យឧស្សាហកម្មកាត់ដេររបស់កម្ពុជាកាន់តែមានការរីកចម្រើន និងជួយលើកកម្ពស់វិស័យសេដ្ឋកិច្ចរបស់កម្ពុជាជាបន្តបន្ទាប់។ កត្តាទាំងនេះហើយដែលរាជរដ្ឋាភិបាលបានថែរក្សា និងយកចិត្តទុកដាក់លើវិស័យនេះ»។
គួរបញ្ជាក់ថា នៅក្នុងឆ្នាំ២០២៣នេះ រាជរដ្ឋាភិបាលបានអនុម័តគម្រោងវិនិយោគលើរោងចក្រឧស្សាហកម្មជាច្រើនបន្តបន្ទាប់ និងផ្ដល់ឱកាសការងារដល់កម្មករ និយោជិតរាប់ម៉ឺននាក់ ទាំងនៅរាជធានីភ្នំពេញ និងបណ្ដាខេត្តផ្សេងៗ ដូចជា ខេត្តស្វាយរៀង ព្រះសីហនុ កំពង់ស្ពឺ កណ្ដាល និងខេត្តតាកែវ ដែលជាខេត្តមានការទាក់ទាញ និងជាខេត្តមានគម្រោងវិនិយោគច្រើនជាងគេលើផ្នែករោងចក្រឧស្សាហកម្ម ។
យោងតាមក្រុមប្រឹក្សាអភិវឌ្ឍន៍កម្ពុជាចេញផ្សាយប៉ុន្មានថ្ងៃមុននេះ មានគម្រោងវិនិយោគថ្មីចំនួន១៣គម្រោង ដែលភាគច្រើនជាគម្រោងរោងចក្រឧស្សាហកម្ម និងគ្រោងត្រូវការកម្មករនិយោជិតប្រមាណជាង១ម៉ឺននាក់បន្ថែមទៀត ។ ទាំងនេះសុទ្ធតែជាឱកាសក្នុងការផ្ដល់ប្រាក់ចំណូលដល់ប្រជាពលរដ្ឋកម្ពុជា ដើម្បីទទួលបានសម្រាប់ផ្គត់ផ្គង់ក្រុមគ្រួសាររបស់ពួកគេ ។
Account
Security
Favourite Content