ភ្នំពេញ ៖ ប្រទេសកម្ពុជា កំពុងជំរុញការប្រើប្រាស់បច្ចេកវិទ្យាហិរញ្ញវត្ថុ (fintech) ដើម្បីជំរុញកំណើនសេដ្ឋកិច្ចរបស់ខ្លួន បង្កើនលទ្ធភាពទទួលបានសេវាហិរញ្ញវត្ថុទំលូទំលាយ និងកសាងភាពជាដៃគូជាសកល។

ចាប់តាំងពីទសវត្សរ៍ឆ្នាំ១៩៨០ ប្រទេសកម្ពុជាបានផ្លាស់ប្តូរពីសេដ្ឋកិច្ចគ្រប់គ្រងទៅជាទីផ្សារសេរី។ ច្បាប់ស្តីពីការវិនិយោគឆ្នាំ១៩៩៤ បានទាក់ទាញការវិនិយោគបរទេសកាន់តែច្រើន ហើយតាមរយៈការចូលរួមជាមួយសមាគមប្រជាជាតិអាស៊ីអាគ្នេយ៍ (អាស៊ាន) និងអង្គការអន្តរជាតិផ្សេងទៀត កម្ពុជាបានកសាងមូលដ្ឋានគ្រឹះយ៉ាងរឹងមាំសម្រាប់កំណើនសេដ្ឋកិច្ច។ សព្វថ្ងៃនេះ បើទោះបីជាមានបញ្ហាសេដ្ឋកិច្ច​សកលជះឥទ្ធិពលលើសេដ្ឋកិច្ចពិភពលោក ក៏ដោយ ក៏សេដ្ឋកិច្ចរបស់កម្ពុជាមានការរីកចម្រើន ដោយមានការគាំទ្រពីវិស័យសំខាន់ជាច្រើន ដូចជា កាត់ដេរ សំណង់ កសិកម្ម និងទេសចរណ៍ ដែលកំពុងងើបឡើងវិញ។

ជាមួយគ្នានេះ ដើម្បីជំរុញកំណើនសេដ្ឋកិច្ចឱ្យប្រកបដោយនិរន្តរភាព កម្ពុជាបានដាក់ចេញនូវគោលដៅតាមរយៈផែនការចក្ខុវិស័យកម្ពុជាឆ្នាំ ២០៣០ ដោយផ្តោតលើកំណែទម្រង់ផ្សេងៗ ដូចជាការធ្វើទំនើបកម្មកសិកម្ម និងផលិតកម្មជាដើម។ ទោះយ៉ាងណាក៏ដោយ ប្រហែល ៣០% នៃមនុស្សពេញវ័យនៅតែខ្វះលទ្ធភាពទទួលបានសេវាហិរញ្ញវត្ថុផ្លូវការ។ Fintech កំពុងជួយដោះស្រាយគម្លាតនេះ (លទ្ធភាពទទួលបានសេ​វាហិរញ្ញវត្ថុ) ដោយកាបូបអេឡិចត្រូនិក (E-wallets) និងការទូទាត់តាមឌីជីថលបានក្លាយជាការពេញនិយមក្នុងចំណោមប្រជាជនកម្ពុជា។

វិស័យ Fintech នៅ​កម្ពុជា បាន និង​កំពុង​រីក​ចម្រើន​យ៉ាង​ឆាប់​រហ័ស។ E-wallets បានកើនឡើងពីអ្នកប្រើប្រាស់ ១៣.៦ លានគណនី​ ក្នុងឆ្នាំ ២០២១ ដល់ ១៩.៥ លានគណនី ក្នុងឆ្នាំ ២០២២។ ការទូទាត់តាមឌីជីថល ដូចជា QR Code និងការផ្ទេរប្រាក់តាមប្រព័ន្ធឌីជីថលក៏កំពុងរីកចម្រើនផងដែរ ជាមួយនឹងប្រព័ន្ធទូទាត់ តាមរយៈបាគង និងធនាគារ ដែលធ្វើឱ្យប្រតិបត្តិការកាន់តែងាយស្រួលសម្រាប់ប្រជាជនកម្ពុជា។

ទន្ទឹមនេះ រដ្ឋាភិបាលបានបង្ហាញការគាំទ្រ Fintech ជាមួយនឹងគំនិតផ្តួចផ្តើម ដូចជាគណៈកម្មាធិការដឹកនាំការងារបច្ចេកវិទ្យាហិរញ្ញវត្ថុ (Fintech Steering Committee) និងគោលនយោបាយ ដើម្បីគ្រប់គ្រងសេវាកម្មហិរញ្ញវត្ថុឌីជីថល។ នៅឆ្នាំ២០២០ កម្ពុជាបានដាក់ឱ្យដំណើរការបាគង ដែលជាប្រព័ន្ធរូបិយប័ណ្ណឌីជីថល។ ឥឡូវនេះ មានអ្នកប្រើប្រាស់រាប់លាននាក់ ហើយអាចឱ្យការទូទាត់បាននៅប្រទេសដៃគូនៅក្នុងតំបន់។ ខណៈពេលនេះ កម្ពុជា​កំពុង​សហការ​ជាមួយ​ប្រទេស​អាស៊ាន​ផ្សេងៗ​ទៀត ដើម្បី​ពង្រឹង​វិស័យ​បច្ចេកវិទ្យា​ហិរញ្ញវត្ថុ​របស់​ខ្លួន។ ជាពិសេស ថ្មីៗនេះ ធនាគារកណ្តាលបានចុះហត្ថលេខាលើកិច្ចព្រមព្រៀងជាមួយប្រទេសហ្វីលីពីន និងម៉ាឡេស៊ី ដើម្បីបង្កើនហិរញ្ញវត្ថុឌីជីថល។ ប្រទេស​កម្ពុជា​ក៏​បាន​ដាក់​ឱ្យ​ដំណើរការ​កម្មវិធី Bakong Tourists ដែល​អនុញ្ញាត​ឱ្យ​ភ្ញៀវ​អន្តរជាតិ​ធ្វើ​ការ​ទូទាត់​ប្រាក់​បាន​យ៉ាង​ងាយស្រួល។

Fintech គឺជាផ្នែកសំខាន់មួយនៃយុទ្ធសាស្ត្រជំរុញកំណើនសេដ្ឋកិច្ចរបស់ប្រទេសកម្ពុជា និងភាពជោគជ័យផ្នែកសេដ្ឋកិច្ចនាពេលអនាគត។ ជាក់ស្តែង គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨ នឹងជួយឱ្យកម្ពុជាអាចទាញយកអត្ថប្រយោជន៍ជាអតិបរមាពីបរិវត្តកម្មពីឌីជីថលក្នុងវិស័យហិរញ្ញវត្ថុ ស្របពេលបច្ចេកវិទ្យាឌីជីថលបានបោះជំហានយ៉ាងលឿន និងបានក្លាយជាកត្តាគន្លឹះជំរុញការគ្រប់ដណ្តប់ និងការតភ្ជាប់សង្គម និងសេដ្ឋកិច្ចនៅទូទាំងពិភពលោក ឱ្យកាន់តែស្អិតល្មួត ខិតជិតគ្នា និងពឹងគ្នាទៅវិញទៅមក។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសេដ្ឋកិច្ច និងធុរកិច្ចឌីជីថល ធ្លាប់បានលើកឡើងថា គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨ គឺជាសមិទ្ធផលមួយដ៏មានសារៈសំខាន់គួរជាទីមោទនៈ សម្រាប់ជាមគ្គទេសក៍ក្នុងការជំរុញការប្រើប្រាស់បច្ចេកវិទ្យាក្នុងវិស័យហិរញ្ញវត្ថុ ដែលត្រូវបានហៅកាត់ថា “បច្ចេកវិទ្យាហិរញ្ញវត្ថុ ឬ Fintech” សំដៅចូលរួមលើកកម្ពស់បរិយាបន្នហិរញ្ញវត្ថុ រក្សាស្ថិរភាពវិស័យហិរញ្ញវត្ថុ និងជំរុញនវានុវត្តន៍ហិរញ្ញវត្ថុ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ជឿជាក់យ៉ាងមុតមាំថា ៖ ការអនុវត្តគោលនយោបាយនេះប្រកបដោយប្រសិទ្ធភាពខ្ពស់ នឹងជួយឱ្យកម្ពុជាអាចទាញយកអត្ថប្រយោជន៍ជាអតិបរមាពីបរិវត្តកម្មពីឌីជីថលក្នុងវិស័យហិរញ្ញវត្ថុ និងផ្តល់កាលានវត្តភាពដល់គ្រប់តួអង្គ សំដៅរួមចំណែកសម្ទុះនៃការអភិវឌ្ឍសេដ្ឋកិច្ច និងសង្គមឌីជីថលកម្ពុជាឱ្យកាន់តែមានភាពរស់រវើក។ ក្នុងន័យនេះ ដើម្បីចាប់យកកាលានុវត្តភាព និងសក្តានុពលដ៏ធំធេងពីបច្ចេកវិទ្យាហិរញ្ញវត្ថុ រាជរដ្ឋាភិបាលបានប្រគល់ភារកិច្ចជូនគណៈកម្មាធិការសេដ្ឋកិច្ច និងធុរកិច្ចឌីជីថល ក្នុងការដឹកនាំ និងការសម្របសម្រួលដើម្បីរៀបចំ «គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨» ដែលបានកំណត់ចក្ខុវិស័យរយៈពេលវែង ប្រកបដោយមហិច្ឆតា និងភាពប្រាកដនិយម គឺ «អភិវឌ្ឍបច្ចេកវិទ្យាហិរញ្ញវត្ថុ ដោយឈរលើមូលដ្ឋាននៃការលើកកម្ពស់បរិយាប័ន្នហិរញ្ញវត្ថុ ការរក្សាស្ថិរភាពវិស័យហិរញ្ញវត្ថុ និងការជំរុញនវានុវត្តន៍ហិរញ្ញវត្ថុ ដើម្បីចាប់យកអត្ថប្រយោជន៍ជាអតិបរមាពីបរិវត្តកម្មឌីជីថលក្នុងវិស័យហិរញ្ញវត្ថុ និងផ្ដល់កាលានុវត្តភាពដល់គ្រប់តួអង្គសំដៅរួមចំណែកជំរុញសន្ទុះនៃការអភិវឌ្ឍសេដ្ឋកិច្ច និងសង្គមឌីជីថលកម្ពុជាដ៏រស់រវើក» ដោយឈរលើគោលការណ៍ធំៗចំនួន ៣ រួមមាន៖ ១)-ការលើកកម្ពស់បរិយាប័ន្នហិរញ្ញវត្ថុ ២)-ការរក្សាស្ថិរភាពវិស័យហិរញ្ញវត្ថុ និង៣)-ការជំរុញនវានុវត្តន៍ហិរញ្ញវត្ថុ។

ជាការកត់សម្គាល់ រយៈពេលប៉ុន្មានឆ្នាំចុងក្រោយនេះ កម្ពុជាបានទទួលយកបច្ចេកវិទ្យាហិរញ្ញវត្ថុចុងក្រោយ ដែលបាន និងកំពុងដើរតួនាទីយ៉ាងសំខាន់ក្នុងការជំរុញបរិយាបន្នហិរញ្ញវត្ថុ និងបង្កភាពងាយស្រួលដល់ប្រជាពលរដ្ឋ ក្នុងការប្រើប្រាស់សេវាធនាគារ និងហិរញ្ញវត្ថុ ដូចជាការទូទាត់ និងការផ្ទេរប្រាក់តាមប្រព័ន្ធឌីជីថលជាដើម ពិសេសបានរួមចំណែកជួយលើកម្ពស់ និងសម្រួលដល់ជីវភាពប្រចាំថ្ងៃរបស់ប្រជាជនកម្ពុជា។

លោក​បណ្ឌិត អ៊ិន ចាន់នី ប្រធាន​នាយក​ប្រតិបត្តិ ធនាគារ អេស៊ីលីដា បានថ្លែងប្រាប់ថា ក្នុងវិស័យធនាគារកាលពីមុន ហេដ្ឋារចនាសម្ព័ន្ធរបស់គ្រឹះស្ថានធនាគារ និងហិរញ្ញវត្ថុមានតែសាខា និងការិយាល័យច្រើន ទាំងនៅទីក្រុង និងជនបទ ប៉ុន្តែរយៈពេលប៉ុន្មាន ៦ ឬ៧ ឆ្នាំចុងក្រោយនេះ ហេដ្ឋារចនាសម្ព័ន្ធរបស់គ្រឹះស្ថានធនាគារ និងហិរញ្ញវត្ថុមានសម្បូរបែបចម្រុះ លើសពីសាខា និងការិយាល័យ ដូចជាហេដ្ឋារចនាសម្ព័ន្ធអេឡិចតូ្រនិក និងហេដ្ឋកិច្ចឌីជីថល ដែលត្រូវបានគេហៅថា Mobile App។

លោក​បណ្ឌិត បានថ្លែងបន្តថា បច្ចុប្បន្ន Mobile App ឬ សេវាធនាគារតាមទូរស័ព្ទដៃចល័ត ត្រូវបានប្រើប្រាស់ទូលំទូលាយ និងជាមធ្យោបាយទូទាត់លើការបង់ថ្លៃទំនិញ និងសេវាផ្សេងៗ ដោយមិនចាំបាច់ប្រើប្រាស់សាច់ប្រាក់ផ្ទាល់ ឬអាចនិយាយថា បច្ចុប្បន្ន ស្ទើតែមិនប្រើប្រាស់ក្រដាសប្រាក់។ ដូច្នេះ វាមានភាពទំនើបមែនទែន ដោយសារកម្ពុជាប្រើប្រាស់បច្ចេកវិទ្យាចុងក្រោយ ក្នុងការអភិវឌ្ឍន៍ហេដ្ឋារចនាសម្ព័ន្ធធនាគារ ដើម្បីឱ្យប្រជាជន ឬអតិថិជនប្រើប្រាស់ទៅ មានភាពងាយស្រួល៕