សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីរាជរដ្ឋាភិបាលកម្ពុជាបានដាក់ចេញនូវគោលនយោបាយជំរុញការវិនិយោគនៅខេត្តព្រះសីហនុ ដោយបានលើកទឹកចិត្ត និងអនុគ្រោះផ្នែកពន្ធមួយចំនួននោះ មានវិនិយោគិនដែលជាម្ចាស់គម្រោងជាច្រើនបានដាក់ពាក្យស្នើសុំការលើកទឹកចិត្តពីរាជរដ្ឋាភិបាលដើម្បីដំណើរការវិនិយោគបន្ត ដោយគិតត្រឹមខែកញ្ញា ២០២៤ មានគម្រោងចំនួន ១៤៥គម្រោងបានដាក់ពាក្យស្នើសុំ។
នៅក្នុងជំនួបជាមួយលោកស្រី Liu Yangling អនុប្រធានសភាប្រឹក្សានយោបាយ ប្រជាជនចិន ខេត្តហៃណា ប្រទេសចិន កាលពីចុងខែកញ្ញាកន្លងទៅនេះ លោក ឯម ភាព អភិបាលរងខេត្តព្រះសីហនុ បានមានប្រសាសន៍ថា ចាប់តាំងពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ឱ្យអនុវត្តកម្មវិធីពិសេសជំរុញការវិនិយោគនៅក្នុងខេត្តព្រះសីហនុ ឆ្នាំ២០២៤ ក្នុងគោលបំណងដាក់ចេញវិធានការជាកញ្ចប់ប្រទាក់ក្រឡាមុតស្រួច និងសាមញ្ញ ដើម្បីជំរុញកំណើនសេដ្ឋកិច្ចខេត្តក្នុងដំណាក់កាលនៃវិបត្តិសេដ្ឋកិច្ចពិភពលោក ដោយជាលទ្ធផលក្រុមការងារជំរុញការវិនិយោគខេត្តទទួលបានសំណើសុំការលើកទឹកចិត្តសរុបចំនួន ១៤៥គម្រោង ។
លោកក៏បានសុំការគាំទ្រ និងកិច្ចសហប្រតិបត្តិការពីខេត្តហៃណាន នូវកកម្មវិធីជំរុញការវិនិយោគក្នុងខេត្តព្រះសីហនុ អនុវត្តក្នុងឆ្នាំ២០២៤ សុំកិច្ចសហប្រតិបត្តិការគាំទ្រលើការកសាងតំបន់សាកល្បងឧស្សាហកម្ម Building Up Industrial Pilot Zone ក្រោមកិច្ចសហការត្បូងពេជ្ររវាងកម្ពុជា ចិន ជំរុញការកសាងសមត្ថភាពអភិវឌ្ឍលើវិស័យកសិកម្ម ។
លោកបានមានមានប្រសាសន៍បន្តថា បច្ចុប្បន្ននេះ ខេត្តព្រហសីហនុ មានរោងចក្រចំនួន២៧០ កំពុងដំណើរការដោយមានទុនវិនិយោគចំនួន ២ ៦៥៨លានដុល្លារអាមេរិក មានកម្មករនិយោជិតចំនួន ៩០ ៥៧៩នាក់ សហគ្រាសធុនតូច និងមធ្យម និងសិប្បកម្មសរុបចំនួន ១ ២២៧ មានកម្មករនិយោជិតចំនួន ៥ ៤៦០នាក់ ។
លោកបន្ថែមថា ខេត្តព្រះសីហនុត្រូវបានារាជរដ្ឋាភិបាលកំណត់ជាតំបន់សេដ្ឋកិច្ចពិសេសគំរូពហុបំណង និងបានកសាងហេដ្ឋារចនាសម្ព័ន្ធផ្លូវក្នុងក្រុង។ ចក្ខុវិស័យឆ្នាំ២០៣០ អភិវឌ្ឍខេត្តព្រះសីហនុ ជាប៉ូលអភិវឌ្ឍជាតិប្រកបដោយចីរភាពនៅតំបន់ឆ្នេរ តាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រ និងកោះដែលស្អាតបំផុតលើសកលលោក តំបន់សេដ្ឋកិច្ចពិសេសគំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងទីផ្សារសកលលោក និងមជ្ឈមណ្ឌលឧស្សាហកម្មផលិតកម្មបែបបច្ចេកវិទ្យាទំនើបសុខដុមនីយកម្មជាមួយនិងបរិស្ថានរស់នៅស្អាត ។
បើតាមកិច្ចប្រជុំមួយ ក្រោមអធិបតីភាពឯកឧត្តម ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុនិងជាប្រធានក្រុមការងារជំរុញការវិនយោគខេត្តព្រះសីហនុ ពិភាក្សានិងវាយតម្លៃលើការស្នើសុំការលើក ទឹកចិត្ត និងអនុគ្រោះនានាពីគម្រោងវិនិយោគចំនួន៣៣គម្រោងដែលស្ថិតនៅក្រោមវិសាលភាពរបស់កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤ ។
ជាលទ្ធផលអង្គប្រជុំបានសម្រេចជាគោលការណ៍ ផ្ដល់ការលើកទឹកចិត្តពិសេសដល់គម្រោងចំនួន៣០គម្រោង ដែលមានទុនវិនិយោគសរុប៥៩០លានដុល្លារអាមេរិក ក្នុងនោះមានគម្រោងរោងចក្រស្ល និងកែច្នៃលោហៈធាតុ រោងចក្រផលិតសម្ភារៈវេចខ្ចប់ រោងចក្រកែច្នៃស្បែក ផ្សារទំនើប អគារពហុមុខងារ សណ្ឋាគារ និងភោជនីយដ្ឋានជាដើម ។
លោក សៅ ហុក ប្រធានខាសាក្រុមហ៊ុន KW Cambodia ប្រចាំខេត្តព្រះសីហនុ បានមានប្រសាសន៍ថា ជាការកត់សម្គាល់ ចាប់តាំងពីរាជរដ្ឋាភិបាលកម្ពុជាបានដាក់ឱ្យអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤ ឃើញថាមានគម្រោងវិនិយោគមួយចំនួនចាប់ផ្ដើមមានសកម្មភាពឡើងវិញ ក្រោយពីស្ងប់ស្ងាត់មួយរយៈកន្លងមក ហើយសម្រាប់វិនិយោគិនថ្មីៗក៏ឃើញចាប់ផ្ដើមចូលមកកាន់ខេត្តព្រះសីហនុឡើងវិញផងដែរ ។
លោកបន្តថា បើទោះបីជាស្ថានភាពនៃការវិនិយោគនៅក្នុងខេត្តព្រះសីហនុ មានដំណើរការល្អឡើងវិញប៉ុន្តែបើធៀបនឹងមុនពេលមានវិបត្តិ គឺនៅតែមិនទាន់បានដូចមុននៅឡើយ ។ យ៉ាងណាក្ដី នេះជាសញ្ញាល្អមួយសម្រាប់ការវិនិយោគនៅក្នុងខេត្ពព្រះសីហនុក្រោយពេលមានកម្មវិធីពិសេសជំរុញការវិនិយោគក្នុងខេត្តព្រះសីហនុ ដោយមានការចាប់អារម្មណ៍ច្រើនពីសំណាក់វិនិយោគិនក្នុងនិងក្រៅប្រទេស ៕
Account
Security
Favourite Content