ភ្នំពេញ ៖ បន្ទាប់ពីកិច្ចប្រជុំពិសេសមួយរវាងភាគីកម្ពុជា និងភាគីថៃ កាលពីថ្ងៃទី២៨ ខែកក្កដា ឆ្នាំ២០២៥ នៅ​ប្រទេសម៉ាឡេស៊ី ក្រោមការសម្របសម្រួលរបស់ប្រធានប្ដូរវេនអាស៊ាន ភាគីទាំងពីរបានឯកភាព​គ្នាលើបទឈប់បាញ់បន្ទាន់ ដោយចាប់អនុវត្តពីម៉ោង ១២៖០០​ អធ្រាត្រ ឈានចូលថ្ងៃទី ២៩ កក្កដា ឆ្នាំ២០២៥។ យ៉ាងណាមិញ គិតមកដល់ថ្ងៃទី២៩ កក្កដា នេះ ភាគីទាំងពីរបានអនុវត្តតាមបទឈប់បាញ់ និងមិន​មានការផ្ទុះអាវុធដាក់គ្នានោះទេ។ នេះបើតាមការឱ្យដឹងពីលោកជំទាវ ម៉ាលី សុជាតា អ្នកនាំពាក្យ​ក្រសួងការពារជាតិកម្ពុជា ក្នុងឱកាសនៃការធ្វើសេចក្តីសង្ខេបព័ត៌មាន ស្តីពី «លទ្ធផលនៃការ​អនុវត្ត​បទឈប់បាញ់រវាងកម្ពុជា-ថៃ»។

លោកជំទាវ ម៉ាលី សុជាតា បានបន្តឱ្យដឹងថា នេះគឺជាជំហានដំបូងនៃការឆ្ពោះទៅរកការកាត់បន្ថយ​អរិយភាព និងស្ដារ​ឡើងវិញនូវសន្តិភាព សន្តិសុខ ហើយក៏សបញ្ជាក់ឱ្យឃើញពីការប្ដេជ្ញាចិត្តយ៉ាងខ្ពស់ និងការ​អនុវត្តយ៉ាងម៉ឺងម៉ាត់​របស់ថ្នាក់ដឹកនាំគ្រប់រូបនៃប្រទេសទាំង២។

បើទោះបីជាយ៉ាងនេះក្ដី ដើម្បីធានាដល់ប្រសិទ្ធភាពនៃការអនុវត្តបទឈប់បាញ់ប្រកបដោយប្រសិទ្ធភាពខ្ពស់ ​ភាគីទាំងពីរត្រូវអនុវត្តនូវលក្ខខណ្ឌមួយចំនួនរួមមាន៖ ទី១ បញ្ឈប់នូវការបាញ់គ្នា ទី២មិនឱ្យមាន​ការ​ចល័តទ័ព ឬការបន្ថែមទ័ព ទី៣ កងទ័ពភាគីទាំងពីរត្រូវរក្សា​នៅទីតាំងដដែល​រាប់ចាប់ពីម៉ោង ១២ យប់ ថ្ងៃទី២៨ ខែកក្កដា និង ទី៤ ត្រូវបង្កើតក្រុមការងារទំនាក់ទំនងមួយដើម្បីធ្វើការងារជាមួយគ្នា។

បើតាមការគូសបញ្ជាក់របស់អ្នកនាំពាក្យក្រសួងការពារជាតិខាងលើ​ ក្រៅពីលក្ខខណ្ឌទាំង៤ទៅ ក៏នឹង​មានការរៀបចំកិច្ចប្រជុំក្រៅផ្លូវការនៃមេបញ្ជាការភូមិភាគ ក្នុងនោះមានភូមិភាគទី១ ភូមិភាគទី២ និងបញ្ជាការដ្ឋានការពារព្រំដែនច័ន្ទបុរី និងខេត្តត្រាតរបស់ភាគីថៃ និងជួបប្រជុំគ្នាជាមួយ នឹងយុទ្ធភូមិ​ភាគទី៤ ទី៥ និងមេបញ្ជាការភូមិភាគ៣ ខាងភាគីប្រទេសកម្ពុជា។

លោកជំទាវបន្តមានប្រសាសន៍ថា៖

« ក្នុងការធានាបាននូវការឯកភាព​គ្នានៃបទ​ឈប់បាញ់ គឺត្រូវបង្កើតនូវយន្ដការតាមដាន និងត្រួតពិនិត្យមួយឡើង។ ក្នុងនោះក៏មានក្រុមអង្គេត​ការណ៍​មួយដែលត្រូវបានបង្កើតឡើង ដើម្បីផ្ទៀងផ្ទាត់ និងធានាដល់ការអនុវត្តបទឈប់បាញ់។»

លើសពីនេះ ប្រទេសម៉ាឡេស៊ី ក៏នឹងពិគ្រោះយោបល់ផងដែរជាមួយនឹងប្រទេសសមាជិកអាស៊ាន​ដទៃទៀត ដើម្បីរួមចំណែកដល់កិច្ចខិតខំប្រឹងប្រែងសង្កេតការណ៍ ដែលឆ្លុះបញ្ចាំងអំពីការប្ដេជ្ញាចិត្ត​ក្នុង​កម្រិតតំបន់លើការគាំទ្រសន្តិភាពនៅលើដីជាក់ស្ដែង។

ជាជំហានបន្ទាប់គឺនឹងមានការកោះប្រជុំគណៈកម្មាការព្រំដែនទូទៅ (GBC) នៅថ្ងៃទី ៤ ខែសីហា ឆ្នាំ២០២៥ ដែលកម្ពុជានឹងធ្វើជាម្ចាស់ផ្ទះ។ ចំណុចមួយទៀត គឺភាគីទាំងពីរក៏បានយល់ព្រមគ្នាផងដែរក្នុងការបន្តឡើងវិញនូវទំនាក់ទំនងដោយផ្ទាល់រវាងនាយក​រដ្ឋមន្ត្រី រដ្ឋមន្ត្រីការបរទេស រដ្ឋមន្ត្រីការពារជាតិនៃប្រទេសទាំងពីរ។ ក្នុងនោះ រដ្ឋមន្ត្រីការបរទេស និងរដ្ឋមន្ត្រីការពារជាតិនៃប្រទេសម៉ាឡេស៊ី កម្ពុជា និងថៃ ត្រូវបានណែនាំឱ្យ​បង្កើតយន្ដការលម្អិតសម្រាប់ការអនុវត្ត ផ្ទៀងផ្ទាត់ និងរាយការណ៍អំពីបទឈប់បាញ់ផងដែរ៕