ភ្នំពេញ ៖ ការបង្កើតគ្រួសារមួយគេអាចប្រៀបប្រដូចទៅនឹងដំណើរការ និងការបើកអាជីវកម្មអ្វីមួយ ដែលចាំបាច់បំផុតត្រូវតែមានផែនការច្បាស់លាស់ ជាពិសេសការគ្រប់គ្រងហិរញ្ញវត្ថុឱ្យមានភាពរឹងមាំ។ ក្នុងគ្រួសារមួយ ឪពុកម្តាយមានតួនាទីសំខាន់ក្នុងការគ្រប់គ្រងសកម្មភាពហិរញ្ញវត្ថុប្រចាំថ្ងៃ និងតាមដានរាល់ចំណូល និងចំណាយប្រចាំខែ ប៉ុន្តែសមាជិកគ្រួសារទាំងអស់ក៏អាចដើរតួក្នុងការជួយសន្សំឱ្យបានច្រើន និងចំណាយតិចផងដែរ។

តាមរយៈអត្ថបទនេះ យើងសូមទាញអារម្មណ៍របស់លោកអ្នកឱ្យក្រឡេកមកមើលគន្លឹះសំខាន់ៗ និងផែនការថវិកាគ្រួសារមួយចំនួន ដើម្បីជួយអ្នកក្នុងការសន្សំប្រាក់ និងជំរុញឱ្យមានសិ្ថរភាពផ្នែកហិរញ្ញវត្ថុគ្រួសារ។

១ . បង្កើតផែនការថវិកាគ្រួសារ ៖ វាមានសារៈសំខាន់ណាស់ក្នុងការបង្កើតផែនការថវិកាគ្រួសារ ដោយសរសេរ និងរៀបចំវាឱ្យបានច្បាស់លាស់។ មធ្យោបាយតែមួយគត់ដើម្បីអនុវត្តន៍ផែនការថវិកាគ្រួសារបាននោះគឺវិន័យ​ ដែល​ទាមទារឱ្យអនុវត្តន៍ឱ្យបាន​ខ្ជាប់ខ្ជូន​នឹង​ផែនការនេះ។ មួយវិញទៀត ប្តីប្រពន្ធក្នុងគ្រួសារគួរតែពិភាក្សាអំពីផែនការចំណូលចំណាយរបស់ខ្លួឱ្យបានច្បាស់លាស់។ បើមិនដូច្នេះទេ អ្នកទាំងពីរអាចនឹងឈ្លោះប្រកែកគ្នាក្នុងគ្រួសារលើការចំណូលចំណាយ ពិសេសមូលហេតុដែលចាយលុយមិនគ្រប់ក្នុងមួយខែៗ។

២. គណនាប្រាក់ចំណូលប្រចាំខែរបស់អ្នក ៖ ការបង្កើតផែនការថវិកាគ្រួសាររបស់អ្នកចាប់ផ្តើមដោយការដឹងពីប្រាក់ចំណូលប្រចាំខែរបស់អ្នកពីគ្រប់ប្រភពទាំងអស់។ នេះ​គឺជាជំហាន​ឈាន​ដល់​គោលដៅ​ហិរញ្ញវត្ថុ​របស់​គ្រួសារ។ កំណត់ និងចាត់ថ្នាក់ការចំណាយ។ រូបមន្តដ៏មានប្រសិទ្ធភាពមួយ គឺអ្នកចាប់ផ្ដើមជាមួយនឹងផែនការថវិកា ២០/៥០/៣០ ដោយ ២០% សម្រាប់ការសន្សំ និងការសងបំណុល ៥០% សម្រាប់តម្រូវការចាំបាច់ និង ៣០% ទៀត សម្រាប់របស់របរដែលចង់បាន។

នៅពេលដែលអ្នកបានរៀបចំផែនការចំណាយរួចហើយ សូមប្រៀបធៀបវាទៅនឹងការចំណាយជាក់ស្តែងរបស់អ្នក។ ប៉ុន្តែពេលខ្លះ ផែនការជាមួយនឹងការចំណាយជាក់ស្តែងមិនត្រូវគ្នានោះទេ។ ដូច្នេះ គោលដៅដំបូងគឺយើងត្រូវមើលកន្លែងដែលអ្នកចំណាយប្រាក់ ដែលរកបានដោយលំបាក ហើយបន្ទាប់មកកែសម្រួលផែនការថវិកា ២០/៥០/៣០ ដោយផ្អែកលើតម្រូវការ និងបំណងប្រាថ្នារបស់អ្នក។

៣. កំណត់គោលដៅហិរញ្ញវត្ថុជាក់ស្តែង ៖ តើអ្នកកំណត់គោលដៅហិរញ្ញវត្ថុដោយរបៀបណា? ទីមួយ ក្នុងគ្រួសារ ត្រូវបើកចំហរ និងសន្ទនាឱ្យបានច្រើនទាក់ទងចំណូលចំណាយ។ បន្ទាប់មក ធ្វើបញ្ជីសន្សំក្នុងរយៈពេលខ្លី និងរយៈពេលវែង សម្រាប់របស់របរដែលអ្នកចង់បាន។ ត្រូវប្រាកដថា របស់នីមួយដែលអ្នកមានតម្លៃចំនួនប៉ុន្មាន? ឧទាហរណ៍ អ្នកត្រូវការម៉ូតូថ្មីតម្លៃ ២០០០ ដុល្លារ សម្រាប់គ្រួសាររបស់អ្នកនៅឆ្នាំក្រោយ ដូច្នេះអ្នកត្រូវរៀបចំផែនការថវិកាជាក់ស្តែង សម្រាប់សន្សំ ប្រមាណ ២០០ ដុល្លារ ក្នុងមួយខែ ដើម្បីទិញម៉ូតូឱ្យបាននៅឆ្នាំក្រោយ។

៤. កញ្ចប់សន្សំសម្រាប់គ្រាអាសន្ន ៖ ប្រសិនបើអ្នកមានបញ្ហាភ្លាមៗដែលមិននឹកស្មានដល់ ដូចជាបញ្ហាសុខភាព និងគ្រោះថ្នាក់ ហើយអ្នកត្រូវការលុយបន្ទាន់ កញ្ចប់សន្សំសម្រាប់គ្រាអាសន្នអាចជួយលោកអ្នកបានគ្រប់ពេល។ កញ្ចប់សន្សំសម្រាប់គ្រាអាសន្ន ដែលអ្នកគួរសន្សំទុក កឺគួរស្មើនឹងកញ្ចប់ចំណាយលើការរស់នៅប្រចាំថ្ងៃ រយៈ ៣ ទៅ ៦ ខែ។

ប្រសិនបើអ្នកគ្មានកញ្ចប់សន្សំសម្រាប់គ្រាអាសន្ននោះទេ នៅពេលមានបញ្ហាភ្លាមៗ​ អ្នកអាចជួបប្រទះបញ្ហាហិរញ្ញវត្ថុភ្លាមៗ ហើយអាចឈានទៅដល់ការខ្ចីលុយឯកជនដែលគ្មានច្បាប់ទម្លាប់ និងមានអត្រាការខ្ពស់។ ការណ៍នេះអាចឱ្យអ្នកធ្លាក់ចូលក្នុងអន្ទាក់បំណុលទៀតផង៕