ភ្នំពេញ ៖ ដោយសារតែអតិផរណាកើនឡើងខ្ពស់នៅសហរដ្ឋអាមេរិកកាលពីឆ្នាំ២០២២ វាមិនគួរឱ្យភ្ញាក់ផ្អើលនោះទេដែលថា ការសន្សំប្រាក់គឺជាដំណោះស្រាយដ៏ពេញនិយមបំផុតសម្រាប់ឆ្នាំថ្មី ឆ្នាំ២០២៣ របស់ប្រជាជនអាមេរិក។ ជាមួយគ្នានេះ សម្រាប់ឆ្នាំថ្មីនេះ ប្រជាជនកម្ពុជាក៏គួរតែមានផែនការហិរញ្ញវត្ថុច្បាស់លាស់ ក៏ដូចជាការសន្សំប្រាក់ ដើម្បីជៀសវាងហានិភ័យផ្សេងៗ។

ប្រជាជនអាមេរិកគិតថា អំណាចទិញរបស់ពួកគេធ្លាក់ចុះនៅឆ្នាំនេះ ដោយសារតម្លៃនៃទំនិញប្រចាំថ្ងៃដូចជា ប្រេង ការធ្វើដំណើរ គ្រឿងទេស និងលំនៅដ្ឋានបានកើនឡើងយ៉ាងខ្លាំង។ ទោះបីជាមានការខិតខំប្រឹងប្រែងជាបន្តបន្ទាប់ពីធនាគារកណ្តាលអាមេរិក (Fed) ដើម្បីទប់ទល់បញ្ហាអតិផរណាក៏ដោយ អតិផរណាបានបន្តកើនឡើងពីមួយខែទៅមួយខែ និងពេញមួយឆ្នាំ២០២២ ជាមួយនឹងតម្លៃទំនិញកើនឡើងដល់កំពូលក្នុងរដូវក្តៅមុនពេលធ្លាក់ចុះបន្តិចម្តងៗដល់ខែវិច្ឆិកា។

ជិត ៦០% នៃអ្នកឆ្លើយតបនៅក្នុងការស្ទង់មតិមួយរបស់ក្រុមហ៊ុនស្រាវជ្រាវទីផ្សារបច្ចេកវិទ្យា Numerator បាននិយាយថា ពួកគេមានគម្រោងសន្សំប្រាក់បន្ថែមទៀតនៅឆ្នាំ២០២៣ នេះ។ អ្នកឆ្លើយសំណួរបាននិយាយថា ពួកគេកំពុងផ្តល់អាទិភាពដល់ការសន្សំ ពីព្រោះពួកគេព្រួយបារម្ភអំពីបញ្ហាអតិផរណា និងការធ្លាក់ចុះសេដ្ឋកិច្ចដែលអាចប៉ះពាល់ដល់ស្ថានភាពសេដ្ឋកិច្ចហិរញ្ញវត្ថុរបស់ពួកគេ។

ទោះបីជាបញ្ហានេះកើតឡើងនៅសហរដ្ឋអាមេរិកក៏ពិតមែន ប្រជាជនកម្ពុជាក៏គួរតែបង្កើតទម្លាប់សន្សំប្រាក់ មិនថានៅសន្សំទុកផ្ទះនោះទេ ប៉ុន្តែកន្លែងសន្សំដែលជាជម្រើសល្អ និងសុវត្ថិភាពគឺសន្សំនៅគ្រឹះស្ថានធនាគារ និងហិរញ្ញវត្ថុផ្លូវការ ដែលអាចបង្កើនប្រាក់សន្សំរបស់អ្នកតាមរយៈការទទួលបានការប្រាក់ទៀតផង។

​សម្រាប់​ដំណោះស្រាយ​វិញ គឺត្រូវប្តេជ្ញាក្នុងការបង្កើតទម្លាប់សន្សំ។ ខាងក្រោមនេះគឺ​ជា​គន្លឹះខ្លះ​ៗដើម្បី​ជួយ​ឱ្យ​អ្នក​ចាប់​ផ្តើម​បង្កើតទម្លាប់​សន្សំ​របស់​អ្នក​សម្រាប់​ឆ្នាំ២០២៣ ក្លាយ​ជាទម្លាប់មួយដែលអាចធ្វើបាន។

• ចាប់ផ្តើមពីការសន្សំតិចៗ ប៉ុន្តែមានភាពទៀងទាត់

ប្រហែលជាវិធីសាមញ្ញបំផុតដើម្បីសម្រេចបាននូវគោលដៅនៃការសន្សំប្រាក់របស់អ្នកគឺបង្កើតការសន្សំរបស់អ្នកដោយស្វ័យប្រវត្តិតាមប្រព័ន្ធម៉ូបាយ បែងឃឺង (ឱទាហរណ៍ អ្នកប្រើប្រាស់ Mobile Banking App អ្នកដកប្រាក់របស់អ្នក រួចដាក់បញ្ចូលទៅក្នុងគណនីសន្សំរបស់អ្នក)។ ទោះបីជាចំនួនទឹកប្រាក់របស់អ្នកតិចក្តី ឬច្រើនក្តី អ្នកត្រូវដាក់បញ្ចូលក្នុងគណនីសន្សំរបស់អ្នកឱ្យបានទៀងទាត់។

ការប្រើប្រាស់កម្មវិធីស្មាតហ្វូននានាសម្រាប់សន្សំប្រាក់ គឺជាវិធីមួយជួយធ្វើឱ្យការសន្សំដោយស្វ័យប្រវត្តិ។ អ្នកប្រើប្រាស់ Mobile Banking ក៏អាចយកប្រាក់មួយចំណែកតូចនៃប្រាក់បៀវត្សរ៍ដោយផ្ទាល់បញ្ចូលក្នុងគណនីសន្សំរបស់ខ្លួន ហើយធ្វើបែបនេះឱ្យក្លាយជាទម្លាប់ប្រចាំខែ ឬជាទម្លាប់សន្សំទៀងទាត់ក្នុងទំហំទឹកប្រាក់ណាមួយ ដែលអ្នកគិតថា អ្នកអាចសន្សំបាន។

ទោះជាយ៉ាងនេះក្តី មនុស្សភាគច្រើន​គិត​ថា ការសន្សំ​ប្រាក់ គឺ​ត្រូវ​តែ​ចាប់​ផ្តើម​ពី​ចំនួន​ដ៏​ច្រើនជាមុនសិន ប៉ុន្តែអ្វីដែលយើងត្រូវបានមុននោះគឺការកំណត់ទម្លាប់សន្សំរបស់យើង។ បើទោះបីជា ការសន្សំដំបូងមានប្រាក់តែ ៥០ ដុល្លារក្នុងមួយខែក៏ដោយ យើងត្រូវសន្សំឱ្យបានទៀងទាត់ជារៀងរាល់ខែ ហើយវានឹងក្លាយជាទម្លាប់សន្សំ។ លើសពីនេះ នៅពេលអ្នកចំណូលសុទ្ធបានច្រើន អាចបង្កើនការសន្សំទៅតាមនោះ។

• បង្កើតទម្លាប់តាមដានការចំណាយរបស់អ្នក

ការស្ទង់មតិពីគេហទំព័រហិរញ្ញវត្ថុផ្ទាល់ខ្លួន The Ascent បានរកឃើញថា ២៦% នៃអ្នកឆ្លើយតបចង់សន្សំនៅឆ្នាំ ២០២៣ ដើម្បីឆ្លើយតបនឹងគ្រាអាសន្ន ឬត្រូវហិរញ្ញវត្ថុបន្ទាន់។ អ្នកផ្សេងទៀតដែលត្រូវបានស្ទង់មតិ បាននិយាយថា ពួកគេចង់រក្សាទុកសាច់ប្រាក់ដើម្បីធ្វើការទិញទំនិញសម្រាប់គ្រួសារ ដូចជាទូរទស្សន៍ ឬរថយន្តថ្មី។

ទោះបីជាហេតុផលរបស់អ្នកយ៉ាងណាក៏ដោយ ការកំណត់ការចំណាយដើម្បីដឹងថា តើលុយរបស់អ្នកប្រើប្រាស់លើអ្វីខ្លះជារៀងរាល់ខែ គឺជាជំហានដំបូងដ៏ល្អក្នុងការកសាងផែនការសន្សំ។ ជាមួយ នៅពេលដែលអ្នកឃើញលុយរបស់អ្នកកើនឡើង អ្នកនឹងចង់បង្កើនការសន្សំរបស់អ្នក។

ច្បាប់ដ៏ល្អមួយ នោះគឺត្រូវបែងចែក ៥០% នៃប្រាក់បៀវត្សរ៍របស់អ្នកចំពោះតម្រូវការប្រចាំថ្ងៃ និង ៣០% សម្រាប់របស់ដែលអ្នកចង់បាន ខណៈពេលដែលដកប្រាក់ ២០% នៃប្រាក់ចំណូលរបស់អ្នកសម្រាប់ការសន្សំ។

• កាត់បន្ថយបំណុលរបស់អ្នក ហើយកុំចំណាយលើសកម្រិត

ក្នុងចំណោមជនជាតិអាមេរិកដែលមានគម្រោងរកដំណោះស្រាយហិរញ្ញវត្ថុនៅឆ្នាំ ២០២៣ នេះ ៣២% និយាយថា ពួកគេចង់កាត់បន្ថយបន្ទុកបំណុលរបស់ពួកគេ នេះបើយោងតាមការសិក្សាពី Fidelity Investments ។ យោងតាមការស្ទង់មតិបានឱ្យដឹងទៀតថា  ៣៩% និយាយថា ពួកគេចង់សន្សំកាន់តែច្រើន និង ២៨% ចង់កាត់បន្ថយចំណាយរបស់ពួកគេ។

ដំបូន្មានមួយគឺខិតខំប្រឹងប្រែងរកចំណូល និងបង្កើនប្រភពចំណូលឱ្យកាន់តែច្រើន ដើម្បីកាត់បន្ថយកម្រិតបំណុលរបស់អ្នក ហើយត្រូវចងចាំថា មិនត្រូវចំណាយលើរបស់របរមិនចាំបាច់ ដែលអាចធ្វើឱ្យចំណាយរបស់អ្នកលើសកម្រិត។

លើសពីនេះ ដើម្បីជៀសវាងការចំណាយលើសកម្រិត យើងត្រូវមានបញ្ជីកត់ត្រាឱ្យបានច្បាស់លាស់សម្រាប់ចំណាយចំណូលប្រចាំខែលើរបស់បរដែលត្រូវបានជាចាំបាច់ ដូចម្ហូបអាហារ សំលៀកបំពាក់ ទឹក ភ្លើងជាដើម ប៉ុន្តែការជួបជុំមួយចំនួនដែលមានចាំបាច់ គួរតែរំលង ដើម្បីកាត់បន្ថយការចំណាយលើកម្រិត។

ជារួម ការបង្កើតទម្លាប់សន្សំគឺចំណុចចាប់ផ្តើមមួយ ដែលអាចជួយឱ្យមានបង្កើតប្រព័ន្ធហិរញ្ញវត្ថុរបស់អ្នកឱ្យកាន់រឹងមាំ និងជួយឱ្យអ្នកមានផែនការហិរញ្ញវត្ថុត្រឹមត្រូវសម្រាប់អ្នក ក៏ដូចជាគ្រួសាររបស់អ្នក នាពេលអនាគត ឬ ប្រើប្រាស់ចាំបាច់ក្នុងនាគ្រាអាសន្ននាមួយ នៅពេលអ្នកមានផែនការហិរញ្ញវត្ថុច្បាស់លាស់។

សូមបញ្ជាក់ថា ក្រៅពីទម្លាប់ទាំង៣ខាងលើ អ្នកក៏អាចបង្កើតរូបមន្តសន្សំប្រាក់បានដោយខ្លួនផងដែរ៕