ខេត្តកណ្តាល ៖ សម្រាប់មុខរបរលក់ដូរតូចតាចនៅតាមផ្ទះ ឬរបរលក់ចាប់ហួយមើលទៅហាក់ដូចជាមិនសូវទទួលបានចំណូលច្រើន ប៉ុន្តែវាបានជួយសម្រួលដល់ជីវភាពរបស់អាជីវករបានសមរម្យ។ ជាក់ស្តែង អ្នកស្រី ព្រីង វុធថឺន មានអាយុ ៥៣ឆ្នាំ ជាស្រ្តីមេម៉ាយ រស់នៅក្នុងភូមិចុងកោះ ឃុំកោះឧកញ៉ាតី ស្រុកខ្សាច់កណ្តាល ខេត្តកណ្តាល អាចមានលទ្ធភាពគ្រប់គ្រាន់ក្នុងកាតព្វកិច្ចចិញ្ចឹមបីបាច់កូនចំនួន ៦នាក់ ក្រោមប្រភពចំណូលពីការលក់ចាប់ហួយ និងការទ្រទ្រង់កម្ចីដើមទុនពីគ្រឹះស្ថានមីក្រូហិរញ្ញវត្ថុ។  

អ្នកស្រី ព្រីង វុធថឺន បានឱ្យដឹងថា ចាប់តាំងពីស្វាមីរបស់អ្នកស្រីបានទទួលមរណភាព អ្នកស្រីមានកាតព្វកិច្ចចិញ្ចឹមបីបាច់កូនចំនួន ៦នាក់ តែម្នាក់ឯង។ នៅពេលនោះ អ្នកស្រីមានជីវភាពលំបាកណាស់ ដោយត្រូវក្រោកពីព្រលឹម ដើម្បីទៅទិញបន្លែជារៀងរាល់ថ្ងៃ ដោយមធ្យោបាយជិះកង់យកមកដាក់លក់។

មកដល់ឆ្នាំ២០១១ ដោយឃើញថាការចំណាយក្នុងគ្រួសារមានការកើនឡើង អ្នកស្រីមានបំណងចង់ពង្រីកមុខរបរដើម្បីអាចទប់ទល់នឹងចំណាយ។  គ្រានោះ អ្នកស្រីក៏បានសម្រេចចិត្តប្រើប្រាស់កម្ចីជាមួយគ្រឹះស្ថានមីក្រូហិរញ្ញវត្ថុមួយកន្លែងជាលើកទីដំបូងចំនួន ៤០០ ០០០ រៀល ដើម្បីទិញមងដាក់ត្រី និងមួយផ្នែកទៀតទិញបន្លែយកទៅលក់បន្ត។

បន្ទាប់ពីប្រើប្រាស់កម្ចីជាបន្តបន្ទាប់ជាមួយគ្រឹះស្ថានមីក្រូហិរញ្ញវត្ថុនោះ អ្នកស្រីបានសង្កេតឃើញថា ជីវភាពក៏ដូចជាអាជីវកម្មរបស់អ្នកស្រី កាន់តែប្រសើរឡើងពីមួយថ្ងៃទៅមួយថ្ងៃ ។ ហេតុដូចនេះ អ្នកស្រីក៏បានសម្រចចិត្តស្នើសុំកម្ចីជាមួយគ្រឹះស្ថានមីក្រូហិរញ្ញវត្ថុដដែលជាលើកទី៥ ចំនួន ៨០០ ០០០ រៀល ដើម្បីយកទៅទិញបន្លែលក់បន្ថែមទៀត។

អ្នកស្រីបានបន្តឲ្យដឹងទៀតថា ប៉ុន្មានឆ្នាំកន្លងមកនេះ អ្នកស្រីបានសន្សំប្រាក់មួយចំនួន ក្នុងគោលបំណងចង់ផ្លាស់ប្តូរមុខរបរពីការលក់ត្រី បន្លែ មកលក់ឥវ៉ាន់ចាប់ហួយវិញ។ រហូតដល់ឆ្នាំ២០១៦ អ្នកស្រីបានសម្រេចបំណងប្រាថ្នារបស់ខ្លួន ដោយការប្រើដើមទុនបន្ថែមពីគ្រឹះស្ថានមីក្រូហិរញ្ញវត្ថុនោះ ចំនួន ១ ២០០ ០០០ រៀល ដើម្បីទៅទិញអីវ៉ាន់ចាប់ហួយមកលក់នៅផ្ទះ។

អ្នកស្រីបានបន្តថា តាំងពីប្រកបអាជីវកម្មថ្មីមក ឃើញថាគ្រួសារអ្នកស្រីមានជីវភាពល្អប្រសើរជាងមុន ហើយអ្នកស្រីផ្ទាល់ក៏មិនចាំបាច់ក្រោកពីព្រលឹមទៅទិញបន្លែ និងត្រីដែរ។ ម្យ៉ាងវិញទៀត អ្នកស្រីមានលទ្ធភាពកែលម្អគេហដ្ឋាន និងសាងសង់តូបសម្រាប់លក់ដូរនៅមុខផ្ទះផងដែរ។ ក្នុងឆ្នាំ២០២២ អ្នកស្រីបានបន្តប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុជាលើកទី១៦ ចំនួន ៧៥០ ដុល្លារសហរដ្ឋអាមេរិក សម្រាប់ទិញអីវ៉ាន់ចូលស្តុកបន្ថែមទៀត។

ដោយឡែកចំពោះបំណងប្រាថ្នាទៅថ្ងៃអនាគត អ្នកស្រីមានបំណងចង់ពង្រីកអាជីវកម្មនេះឲ្យកាន់តែធំជាងមុន ដើម្បីទុកបន្តឱ្យកូនស្រីរបស់គាត់។ ជាមួយគ្នានេះ អ្នកស្រីក៏បានថ្លែងអំណរគុណដល់គ្រឹះស្ថានមីក្រូហិរញ្ញវត្ថុ ដែលបានផ្តល់ឱកាសដល់ដៃគូដែលជាស្រ្តី ជាពិសេសគឺស្ត្រីមេម៉ាយ ដូចរូបអ្នកស្រីជាដើម ក្នុងការប្រើប្រាស់កម្ចី ដែលអាចធ្វើឲ្យអ្នកស្រី និងក្រុមគ្រួសារមានអាជីវកម្ម និងជីវភាពសមរម្យរហូតមកដល់បច្ចុប្បន្ន៕