កម្មវិធីហិរញ្ញវត្ថុគាំទ្រការវិនិយោគ (ISF) នឹងជំរុញកំណើនក្នុងវិស័យជលផលនៅកម្ពុជា​

ភ្នំពេញ ៖ តាមរយៈកម្មវិធីជំរុញកំណើនវិស័យជលផលប្រកបដោយចីរភាព គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) សាជីវកម្មធានាឥណទានកម្ពុជា (CGCC)  រដ្ឋបាលជលផល (FiA) និងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) ប្រកាសដាក់ដំណើរការជាផ្លូវការ កម្មវិធីហិរញ្ញវត្ថុគាំទ្រការវិនិយោគ (ISF) ដែលជាកម្មវិធីហិរញ្ញវត្ថុគាំទ្រការវិនិយោគចម្រុះ គាំទ្រថវិកាដោយសហភាពអឺរ៉ុប (EU) ដើម្បីជំរុញកំណើនក្នុងវិស័យជលផលក្រោយប្រមូលផលនៅកម្ពុជា​។

ជាមួយបេតិកភណ្ឌវប្បធម៌ និងធនធានជលផលដ៏សម្បូរបែប កម្ពុជាមានសក្តានុពលខ្ពស់ក្នុងការប្រកួតប្រជែងផលិតផលជលផលក្នុងទីផ្សារសកលលោក ។ ទោះជាបែបនេះក្តី អនុវិស័យជលផលនេះពើបប្រទះនូវបញ្ហាប្រឈមជាច្រើន ដែលបានរារាំងដល់ការទទួលបាននូវជំនឿទុកចិត្តពីអ្នកបរិភោគ និងការប្រកួតប្រជែងជាលក្ខណៈសកល ដូចជា បច្ចេកវិទ្យាកែច្នៃនៅមានកម្រិត កង្វះគុណតម្លៃបន្ថែម និងបញ្ហាពាក់ព័ន្ធនឹងសុវត្ថិភាពម្ហូបអាហារជាដើម។

ផ្អែកតាមបទពិសោធន៍ជោគជ័យនៃការអនុវត្តកម្មវិធីគាំទ្រសហគ្រាសជលផលខ្នាតតូច និងមធ្យម (VCIS-FTS) គម្រោង CAPFISH-Capture បានរៀបចំបង្កើតកម្មវិធី ISF ដើម្បីគាំទ្រដល់សហគ្រាសជលផលក្រោយប្រមូលផល អ្នកផ្គត់ផ្គង់ធាតុចូល និងដៃគូអាជីវកម្មក្នុងខ្សែច្រវាក់ក់តម្លៃជលផល ជម្នះនូវបញ្ហាប្រឈមទាំងនេះ ក៏ដូចជាបង្កើនផលិតភាពផលិតកម្ម ទទួលបាននូវផលិតផលមានគុណភាព និងសុវត្ថិភាពខ្ពស់។ កម្មវិធី ISF​ នេះ មានការចូលរួមធនធានផ្ទាល់ពីសហគ្រាស កម្ចីអាជីវកម្មដែលមានការធានាពីគ្រឹះស្ថានហិរញ្ញវត្ថុ និងទុនឧបត្ថម្ភពីគម្រោង។ បន្ថែមពីលើសហគ្រាសទាំង ៥០ ដែលត្រូវបានគាំទ្រដោយកម្មវិធី VCIS-FTS នាពេលបច្ចុប្បន្ន កម្មវិធីថ្មីនេះផ្តោតលើសហគ្រាសគោលដៅចំនួនជាង ១០០ ផ្សេងទៀត​ ដែលមានគុណវុឌ្ឍិគ្រប់គ្រាន់នៅក្នុងខ្សែច្រវាក់ក់តម្លៃជលផល។​

CGCC មានតួនាទីជាអង្គភាពគ្រប់គ្រង ISF ដោយធ្វើការជាមួយធនាគារពាណិជ្ជ និងគ្រឹះស្ថានហិរញ្ញវត្ថុនៅកម្ពុជា។ 

ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ (MEF) និងជាសមាជិកក្រុមប្រឹក្សាភិបាលរបស់ CGCC មានប្រសាសន៍ថា ISF ពិតជាមានសារៈសំខាន់ និងអត្ថប្រយោជន៍យ៉ាងខ្លាំងចំពោះវិស័យជលផលនៅកម្ពុជា។ តាមរយៈគម្រោងនេះ ប្រតិបត្តិករពាក់ព័ន្ធក្នុងវិស័យជលផលក្រោយប្រមូលផល នឹងមានលទ្ធភាពទទួលបាននូវការគាំទ្រជំនួយបច្ចេកទេស ការសាងសមត្ថភាព និងជំនួយហិរញ្ញប្បទាន ដែលរួមមានជំនួយឥតសំណង និងឥណទានដែលមានការធានាក្នុងលក្ខខណ្ឌអនុគ្រោះជាច្រើន។

ឯកឧត្តមបណ្ឌិត ម៉ី វ៉ាន់ បានថ្លែងបន្តថា គម្រោង ISF នឹងចូលរួមជំរុញកំណើនសេដ្ឋកិច្ច និងលើកកម្ពស់ការអភិវឌ្ឍវិស័យកសិកម្ម ដែលជាអាទិភាពចម្បងរបស់រាជរដ្ឋាភិបាលនីតិកាលទី៧ នៃរដ្ឋសភា តាមរយៈការធ្វើទំនើបកម្ម ការបង្កើនផលិតភាពនៃវិស័យកសិកម្ម ជាមួយការរក្សាបាននូវគុណភាពនៃផលិតផលកសិកម្ម និងកសាងបាននូវភាពធន់នៃវិស័យនេះ ដើម្បីធានាបាននូវសន្តិសុខ និងសុវត្ថិភាពស្បៀង ក៏ដូចជាការបង្កើនបាននូវតម្លៃបន្ថែមកាន់តែខ្ពស់ និងភាពប្រកួតប្រជែង ទាំងតម្លៃ និងគុណភាព។ គំនិតផ្តួចផ្តើមនឹងចូលរួមលើកតម្កើងនូវកម្រិតជីវភាពរស់នៅរបស់ប្រជាពលរដ្ឋកម្ពុជាឱ្យបានប្រសើរទ្បើង។

ផ្អែកលើតួនាទីរបស់ ISF ក្នុងការលើកកម្ពស់ភាពប្រកួតប្រជែងរបស់វិស័យជលផលក្រោយប្រមូលផលនៅកម្ពុជា លោក ដឺជេនេ តេហ្សេរ៉ា នាយកផ្នែកអភិវឌ្ឍន៍ហេដ្ឋារចនាសម្ព័ន្ធ និងកសិពាណិជ្ជកម្មរបស់អង្គការ UNIDO លើកឡើងថា «អង្គការ UNIDO ពិតជាមានមោទនភាពក្នុងការដាក់ចេញនូវកម្មវិធី ISF សម្រាប់បម្រើឱ្យវិស័យនេះ។ តាមរយៈបទពិសោធន៍ដ៏រឹងមាំរបស់ UNIDO លើការអភិវឌ្ឍខ្សែច្រវាក់តម្លៃ និងហិរញ្ញវត្ថុប្រកបដោយនវានុវត្តន៍ យើងមានជំនឿយ៉ាងមុតមាំថាគម្រូកម្មវិធី ​ISF នេះ ពិតជាអាចរួមចំណែកបង្កើនគុណតម្លៃ និងបរិមាណនៃ ផល ផលិតផលជលផលដែលប្រកបដោយគុណភាព និងសុវត្ថិភាព ជួយឱ្យសហគ្រាសកែច្នៃផល ផលិតផលជលផលទទួលបានជោគជ័យនៅក្នុងទីផ្សារសកល។ តាមរយៈការវិនិយោគលើការបង្កើតថ្មី និងការកសាងសមត្ថភាព​ ​  គឺជាការត្រួសត្រាយ និងកសាងផ្លូវដ៏ត្រឹមត្រូវជួយឱ្យវិស័យជលផលកម្ពុជាលេចធ្លោរលើឆាកអន្តរជាតិ​ ផ្តល់នូវឧត្តមភាព ជំនឿទុកចិត្ត និងវិបុលភាពសម្រាប់សហគមន៍ និងប្រជាជនកម្ពុជាទាំងមូល។»​

ឯកឧត្តម អ៊ីហ្គ័រ ទ្រីសមែន ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា​កោតសរសើរចំពោះការដាក់ឱ្យដំណើរការទាន់ពេលវេលានៃកម្មវិធី ISF ដោយគូសបញ្ជាក់អំពីផលជះដ៏មានសក្តានុពល លើវិស័យជលផលរបស់កម្ពុជា។ សង្គតិភាពនឹងលក្ខខណ្ឌតម្រូវទីផ្សារអន្តរជាតិ រួមទាំងសហភាពអឺរ៉ុប កម្មវិធី ISF មិនត្រឹមតែរួមចំណែកលើកកម្ពស់ភាពប្រកួតប្រជែង និងនិរន្តរភាពប៉ុណ្ណោះទេ ថែមទាំងទ្រទ្រង់ឆ្អឹងខ្នងសេដ្ឋកិច្ច ការពារសុខភាពសាធារណៈ និងបង្កើតការងារក្នុងស្រុកក្នុងវិស័យនេះ។ ខ្ញុំមានសុទិដ្ឋិនិយមថា ជោគជ័យក្នុងការអនុវត្តកម្មវិធី ISF ក្នុងវិស័យជលផលនេះ​អាច យកទៅអនុវត្តឡើងវិញសម្រាប់អនុវិស័យកសិកម្មផ្សេងទៀត ដែលជាកាតាលីករជំរុញឱ្យមានការអភិវឌ្ឍន៍គ្រប់ជ្រុងជ្រោយ និងការវិនិយោគបន្ថែមទៀតក្នុងវិស័យកសិកម្មកម្ពុជា លើគ្រប់ផ្នែក។ នេះបើតាមការបញ្ជាក់បន្ថែមរបស់ ឯកឧត្តម។

ដោយបានវាយតម្លៃខ្ពស់នូវកិច្ចគាំទ្រប្រកបដោយប្រសិទិ្ធភាពរបស់សហភាពអឺរ៉ុប និងអង្គការ UNIDO លើការជំរុញ សុវត្ថិភាពម្ហូបអាហារ និងអភិវឌ្ឍន៍វិស័យជលផលប្រកបដោយចីរភាព ឯកឧត្តម ឌិត​ ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ជាថ្មីម្តងទៀតអំពីជំហរ និងការប្តេជ្ញាចិត្តអភិវឌ្ឍន៍វិស័យ ជលផលកម្ពុជាឲ្យជោគជ័យបន្ថែមទៀត។

ដូចមានគូសបញ្ជាក់នៅក្នុងសសរស្តម្ភទី២ នៃយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាស្តីពី៖ ពិពិធភាព សេដ្ឋកិច្ច និងបង្កើនភាពប្រកួតប្រជែង ឯកឧត្តម ឌិត ទីណា បានបញ្ជាក់ថា កម្មវិធីហិរញ្ញវត្ថុគាំទ្រការវិនិយោគ គឺជាគំនិតផ្ដួចផ្ដើមមួយដ៏ល្អ សម្រាប់គាំទ្រដល់កិច្ចសហការរវាងរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ព្រមទាំងអង្គការ UNIDO និងវិស័យឯកជន ដើម្បីជំរុញកំណើនក្នុងវិស័យជលផលក្រោយប្រមូលផលនៅកម្ពុជា។

ឯកឧត្តម ឌិត ទីណា សង្ឃឹមថា កម្មវិធីនេះនឹងជួយលើកកម្ពស់ការកែច្នៃផលិតផលជលផលក្រោយប្រមូលផល ឱ្យកាន់តែមានស្តង់ដារនិងគុណភាពខ្ពស់ តាមរយៈគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ព្រមទាំងផ្ដល់ផលចំណេញផ្នែកសេដ្ឋកិច្ចដល់ប្រជានេសាទ និងសហគ្រាសកែច្នៃផងដែរ៕


របាយការណ៍ថ្មីៗ

មើលទាំងអស់ ➧

ព័ត៌មានទូទៅ

មើលទាំងអស់ ➧

ចំណេះដឹងផ្នែកហិរញ្ញវត្ថុ មានភាពចាំបាច់បំផុតសម្រាប់មនុស្សគ្រប់រូប ជាពិសេសអាចជួយជំរុញកំណើនដល់សេដ្ឋកិច្ចជាតិ

ព្រឹត្តិការណ៍, ហិរញ្ញវត្ថុ

• 07/02/2025

ចំណេះដឹងហិរញ្ញវត្ថុរបស់ប្រជាពលរដ្ឋ គឺជាកត្តាចាំបាច់មួយក្នុង​កា​រជំរុញកំណើនសេដ្ឋកិច្ច និងសង្គម ម្លោះហើយការផ្ដោតការយកចិត្តទុកដាក់លើការលើកកម្ពស់ ចំណេះដឹងផ្នែកហិរញ្ញវត្ថុរបស់ប្រជាជន គឺជាការងារអាទិភាពមួយ

ឧបនាយករដ្ឋមន្ត្រី សាយ សំអាល់ ៖ ការកសាងបញ្ជាការដ្ឋានកងរាជអាវុធហត្ថខេត្តតាកែវ ជាការពូនជ្រុំ និងកសាងបន្តនូវស្មារតី ៧ មករា

ព្រឹត្តិការណ៍, អចលនទ្រព្យ

• 07/02/2025

ថ្នា្កក់ដឹកនាំក្រសួងរៀបចំដែនដី នគរូបនីយកម្ម និងសំណង់ ចាត់ទុកការកសាងបញ្ជាការដ្ឋានកងរាជអាវុធហត្ថខេត្តតាកែវថាជាការពូនជ្រុំនិងកសាងបន្តនូវស្មារតី ៧ មករា រក្សាបាននូវសុខសុវត្ថិភាព សន្តិភាព និងភាពសុខដុមរមនាសម្រាប់ប្រទេសជាតិ និងប្រជាជន

កូនខ្មែរមានសត្ថភាពផលិតគ្រឿងសំអាង និងមានការគាំទ្រច្រើននៅលើទីផ្សារ

ជំនួញ, ព្រឹត្តិការណ៍

• 07/02/2025

ដោយមើលឃើញសក្តានុពល និងភាពងាយស្រួលក្នុងការស្វែងរកវត្ថុធាតុដើមដ៏សំបូរបែប កូនខ្មែរមួយរូបបានខិតខំរិះរកគំនិតកែច្នៃរុក្ខជាតិធ្វើជាគ្រឿងសំអាង ហើយដាក់លក់នៅលើទីផ្សារក្នុងស្រុក

កម្ពុជាលើកទឹកចិត្តអង្គការស្បៀង និងកសិកម្មនៃអង្គការសហប្រជាជាតិ ជួយដល់សហគមន៍កសិកម្មទំនើប

ព្រឹត្តិការណ៍, សេដ្ឋកិច្ច

• 07/02/2025

កម្ពុជាលើកទឹកចិត្តអង្គការFAOជួយដល់សហគមន៍កសិកម្មទំនើបដែលជួយកាត់បន្ថយថ្លៃដើមផលិត មានប្រសិទ្ធភាពសេដ្ឋកិច្ច និង មាននិរន្តរភាព

ក្រុមហ៊ុន​ផលិត​រថយន្ត​​របស់ចិន BYD សម្រេចបោះទុន​បង្កើត​រោងចក្រ​ផ្គុំ​ និងដំឡើ​ង​នៅ​ខេត្តព្រះសីហនុ

ព្រឹត្តិការណ៍, សេដ្ឋកិច្ច

• 07/02/2025

ទី​បំផុ ក្រុមហ៊ុន​ផលិត​រថយន្តអគ្គិសនី​របស់ចិន បាន​សម្រេច​បោះទុនវិនិយោគបង្កើត​រោងចក្រ​ដំឡើង​រថយន្តអគ្គិសនី​នៅកម្ពុជា​ហើយ​

វិថីតេជោសន្តិភាពឆ្នេរអង្កោល កំពុងលើកសម្រស់ខេត្តកែបឱ្យកាន់តែស្រស់ស្អាត និងទាក់ទាញទេសចរ

ព្រឹត្តិការណ៍, អចលនទ្រព្យ

• 07/02/2025

«វិថីតេជោសន្តិភាពឆ្នេរអង្កោល» ជាសមិទ្ធផលឆ្លងសម័យកាល ពោល​ត្រូវបានសាង​សង់​ឡើង​ក្នុងពេលសម្តេច​តេជោជានាយករដ្ឋមន្ត្រី ហើយសម្រេចក្នុងពេលសម្តេចមហាបវរធិបតីជានាយក​រដ្ឋមន្ត្រី។

ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរ និងបន្លែផ្លែឈើ ជំរុញផលិតកម្មក្នុងស្រុក

ព្រឹត្តិការណ៍, សេដ្ឋកិច្ច

• 07/02/2025

ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរនិង បន្លែផ្លែឈើ ក្នុងគោលបំណងជំរុញផលិតកម្មក្នុងស្រុក គាំទ្រផលិតផលខ្មែរ និងផ្គូផ្គងពាណិជ្ជកម្មរវាងអ្នកផលិត និងអ្នកទិញ

តម្លៃមាសបន្តឡើងថ្លៃខ្ពស់ ១តម្លឹង ៣ ៤៤១ ដុល្លារអាម៉េរិក ដោយសារភាពតានតឹងផ្នែកពាណិជ្ជកម្មរបស់ប្រទេសមហាអំណាច

ព្រឹត្តិការណ៍, សេដ្ឋកិច្ច

• 07/02/2025

តម្លៃមាសឡើងថ្លៃ ១ ភាគរយ ឬ ២ ៨៥៨ ដុល្លារអាម៉េរិកក្នុងមួយអោន (នៅលើទីផ្សារកម្ពុជា មាសមួយតម្លឹងមានតម្លៃ ៣ ៤៤១ ដុល្លារអាម៉េរិក និង មួយជីមានតម្លៃ ៣៤៤ ដុល្លារអាម៉េរិក)។ អ្នកវិភាគព្យាករណ៍ថា តម្លៃអាចឡើងថ្លៃដល់ ២ ៩០០ ដុល្លារអាម៉េរិកក្នុងមួយអោននាពេលឆាប់ៗនេះ

គិតត្រឹមឆ្នាំ២០២៤ កម្ពុជា​មានអ្នក​ប្រើទូរសព្ទចល័ត​ចំនួន ២០,៦លាន ខណៈអ្នកប្រើប្រាស់សេវាអ៊ីនធើណេត​មានចំនួន ១៩​លាន​

ព្រឹត្តិការណ៍, សេដ្ឋកិច្ច

• 07/02/2025

គិតត្រឹម​ចុងឆ្នាំ២០២៤ ទូទាំង​ប្រទេស​កម្ពុជា​មាន​អ្នកប្រើប្រាស់ទូរសព្ទចល័ត​ចំនួន ​២០​លាន ​៦សែន ដែល​មានន័យ​ថា មនុស្ស​ម្នាក់អាច​មានទូរសព្ទ ២គ្រឿង​ និងខ្លះ​ ៣គ្រឿង

សុវត្ថិភាពទិន្នន័យ គឺជាមូលដ្ឋានគ្រឹះយ៉ាងសំខាន់នៅក្នុងបច្ចេកវិទ្យាព័ត៌មាន

ព្រឹត្តិការណ៍, អាជីវកម្មថ្មី និងនវានុវត្ត

• 07/02/2025

ផ្អែកតាមមជ្ឈមណ្ឌលកម្ពុជា 4.0 បានបញ្ជាក់ថា សុវត្ថិភាពទិន្នន័យ គឺជាដំណើរការនៃការការពារព័ត៌មានឌីជីថលពីការលួច ឬការចូលប្រើប្រាស់ដោយគ្មានការអនុញ្ញាត