សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការសិក្សារបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) បានបង្ហាញថា ហាងលក់ទំនិញស្ទើរទាំងអស់នៅក្នុងទីក្រុងភ្នំពេញ បានបិទស្លាកតម្លៃជាប្រាក់រៀល ជាមួយនឹងប្រាក់ដុល្លារអាមេរិក ខណៈហាងលក់ទំនិញកាន់តែច្រើនឡើងបានទទួលការទូទាត់ប្រាក់រៀលតាមប្រព័ន្ធអេឡិចត្រូនិក។
ផ្អែកតាមលទ្ធផលនៃការធ្វើអង្កេតការណ៍របស់ទីភ្នាក់ងារសហប្រតិបត្តិការអន្តរជាតិជប៉ុន (JICA) កាលពីឆ្នាំ២០២២ ទៅលើការប្រើប្រាស់ប្រាក់រៀល ដែលបានចេញផ្សាយកាលថ្មីៗនេះបានបង្ហាញថា ក្នុងចំណោមហាងទំនិញចំនួន ៣៥៩ នៅក្នុងរាជធានីភ្នំពេញ ដែលបានធ្វើអង្កេតឃើញថា មានហាងទំនិញ ៨០% ទទួលការទូទាត់តាមប្រព័ន្ធអេឡិចត្រូនិក ដែលក្នុងនោះមានហាងទំនិញប្រមាណ ៤៧% ទទួលការទូទាត់ជាប្រាក់រៀលផង និងប្រាក់ដុល្លារអាមេរិកផង។ ទោះយ៉ាងណា មានហាងទំនិញប្រមាណ ២៨% ទទួលការទូទាត់តែជាប្រាក់ដុល្លារអាមេរិកប៉ុណ្ណោះ ដែលបញ្ហានេះទាមទារឱ្យមានកិច្ចសហការបន្ថែមទៀត។
ឯកឧត្តម យឹម លាត ទេសសាភិបាលរង ធនាគារជាតិនៃកម្ពុជា បានថ្លែងថា ការប្រើប្រាស់ប្រាក់រៀលកាន់តែច្រើនមានសារៈសំខាន់ណាស់ក្នុងការពង្រឹងប្រសិទ្ធភាព ការអនុវត្តនយោបាយម៉ាក្រូសេដ្ឋកិច្ចជាតិ ជាពិសេសក្នុងការរក្សាអត្រាអតិផរណាឱ្យស្ថិតនៅកម្រិតទាប គ្រប់គ្រងបានកម្រិតអត្រាការប្រាក់ កាត់បន្ថយចំណាយប្រតិបត្តិការ ជំរុញការនាំចេញ ជំរុញការវិនិយោគ និងការប្រើប្រាស់ បង្កើនទុនបម្រុងអន្តរជាតិ បង្កើនសុខុមាលភាពសង្គម ទទួលចំណូលពីការបោះពុម្ពក្រដាសប្រាក់ ព្រមទាំងពង្រឹងអត្តសញ្ញាណជាតិ និងអធិបតេយ្យជាតិ។
ឯកឧត្តម បានថ្លែងបន្តថា ថ្មីៗនេះ តាមរយៈរបាយការណ៍វាយតម្លៃស្ថានភាពសេដកិច្ច មូលនិធិរូបិយវត្ថុអន្តរជាតិបានទទួលស្គាល់ថា ការបង្កើនការប្រើប្រាស់ប្រាក់រៀលនឹងជួយបង្កើនភាពធនរបស់សេដ្ឋកិច្ច ទប់ទល់នឹងវិបត្តិសេដ្ឋកិច្ចដែលអាចកើតឡើងជាយថាហេតុ។
លោក រ័ត្ន សោភ័ណ ប្រធានសមាគមធនាគារនៅកម្ពុជា បានឱ្យដឹងថា ការចូលរួមប្រើប្រាស់ប្រាក់រៀលបានកាន់តែច្រើន គឺជួយរក្សាស្ថិរភាពប្រាក់រៀល ក៏ដូចជារក្សានូវស្ថិរភាពសេដ្ឋកិច្ចជាតិផងដែរ។ លោកបានបន្តថា កត្តាសំខាន់ជាច្រើនដែលវិស័យធនាគារបានចូលរួមក្នុងការរក្សាស្ថិរភាពប្រាក់រៀល មានដូចជា ការលើកកម្ពស់ការប្រើប្រាស់ប្រាក់រៀលនៅក្នុងផលិតផលឥណទាន កញ្ចប់ប្រាក់បញ្ញើ និងការរក្សានូវស្ថេរភាពអត្រាប្តូរប្រាក់ជាដើម។
នៅក្នុងឆមាសទី១ ឆ្នាំ២០២៤ ចំនួនប្រតិបត្តិការជាប្រាក់រៀលតាមប្រព័ន្ធបាគងមាន ៧៥,៥ លានប្រតិបត្តិការ កើនឡើង ១,៨ ដង ធៀបនឹងគ្រាដូចគ្នាឆ្នាំមុន ខណៈដែលទំហំប្រតិបត្តិការជាទឹកប្រាក់មានចំនួន ៦៤,៩ ទ្រីលានរៀល កើនឡើង ១,៤ ដង ហើយចំនួន និងទំហំប្រតិបត្តិការជាប្រាក់ដុល្លារអាមេរិកមាន ៩៩,៨ លានប្រតិបត្តិការ កើនឡើង ១,៣ ដង និង ៣៨,៨ ប៊ីលានដុល្លារអាមេរិក កើនឡើង ១,៣ ដង រៀងគ្នា។ នេះបើយោងតាមរបាយការណ៍របស់ធនាគារជាតិនៃកម្ពុជា។
គួររំលឹកឡើងវិញផងដែរថា ក្នុងគោលបំណងលើកកម្ពស់ការប្រើប្រាស់ប្រាក់រៀល និងសម្រួលដល់ការទូទាត់ឆ្លងដែនជាមួយនឹងប្រទេសដៃគូ ធនាគារជាតិនៃកម្ពុជា ត្រៀមដាក់បញ្ចូលគ្នានូវប្រព័ន្ធទូទាត់ទាំងប្រាក់រៀល និងដុល្លារអាមេរិក ដោយប្រើ KHQR Code តែមួយ។ គម្រោងដាក់ឱ្យប្រើប្រាស់ KHQR តែមួយ ដែលតម្រូវឱ្យអ្នកប្រើប្រាស់ទាំងអស់មានគណនីជាលុយរៀល ត្រូវបានរំពឹងថានឹងជួយលើកស្ទួយសេដ្ឋកិច្ចជាតិ តាមរយៈការប្រើប្រាស់ប្រាក់រៀលដែលជារូបិយវត្ថុជាតិ។
ធនាគារនៅកម្ពុជាទាំងអស់នឹងបើកគណនីប្រាក់រៀលជូនអ្នកប្រើប្រាស់ដោយស្វ័យប្រវត្តិ និងមិនគិតកម្រៃសេវាទាំងអស់ បើទោះបីជាគណនីប្រាក់រៀល មិនត្រូវបានប្រើប្រាស់ ឬគ្មានសកម្មភាពអ្វីក៏ដោយ។ អតិថិជនរបស់ធនាគារទាំងអស់នៅកម្ពុជា នឹងអាចស្កែនបានទាំងលុយរៀល និងលុយដុល្លារតាមប្រព័ន្ធ KHQR តែមួយ ដោយមិនចាំបាច់ស្កេន QR Code ជាលុយដុល្លារ និង QR Code ជាលុយរៀល ដែលកំពុងប្រើប្រាស់នាពេលបច្ចុប្បន្ន៕
Account
Security
Favourite Content