ភ្នំពេញ ៖ ការដែលមានគំនិតក្នុងការបង្កើតអាជីវកម្មមួយឱ្យទទួលបានជោគជ័យ មិនត្រឹមតែគិតពីផលចំណេញមួយមុខនោះទេ តែត្រូវគិតពីភាពថ្មីប្លែក និងផលប្រយោជន៍ចំពោះសហគមន៍ទើបធ្វើឱ្យអាជីវកម្មនោះអាចអភិវឌ្ឍប្រកបដោយនិរន្តរភាព។ ក្នុងនោះ មានអាជីវកម្មចំនួនបីដែលបង្កើតឡើងក្រោមគំនិតច្នៃប្រឌិតខ្ពស់ ផ្ដល់ប្រយោជន៍ជារួម ពិសេសជួយជីវភាពសហគមន៍ក្នុងតំបន់។

មួយក្នុងចំណោមអាជីវកម្មទាំងបីគឺ អាជីវកម្មកែច្នៃសម្បកកង់រថយន្តចាស់ៗទៅជាធុងបរិស្ថានដែលមានរូបរាងស្អាត និងមានគម្របបិតជិត ពិសេសគឺអាចប្រើប្រាស់បានយូរឆ្នាំ។ អ្នកស្រី សឿង សុថាវី ជាម្ចាស់សិប្បកម្មកែច្នៃសំបកកង់រថយន្ត Eco Bin បានបញ្ជាក់ថា៖

«ដោយសារក្ដីស្រឡាញ់ការងារសង្គម ហើយខ្ញុំគិតថាអាជីវកម្មនេះអាចជួយដល់បរិស្ថាន និងអាចផ្ដល់ឱកាសការងារឱ្យប្រជាជនក្នុងតំបន់ផងនោះ គ្រួសារខ្ញុំបានសម្រេចចាប់យកអាជីពជាអ្នកកែច្នៃសំណល់សម្បកកង់ឡានចាស់ៗដែលមិនងាយរលាយឲ្យក្លាយជាសម្ភារៈប្រើប្រាស់មានប្រយោជន៍តាមរយៈការបង្កើតជាធុងសំរាមបរិស្ថាននេះឡើង»។

អ្នកស្រីបន្តថា ធុងបរិស្ថាននេះត្រូវបានផលិត២ប្រភេទ មានគុណភាពល្អ ក្រាស់ មាំ ស្វិត អាចប្រើប្រាស់បានច្រើនឆ្នាំទោះបីដាក់ហាលថ្ងៃ ហាងខ្យល់ក៏ដោយក៏ភាពធន់នៅតែមានដែរ ហើយចំពោះតម្លៃមាន២៥ដុល្លារ និង៣៥ដុល្លារ អាស្រ័យតាមទំហំ។ ម៉្យាងវិញទៀត ធុងប្រភេទនេះក៏ផ្ដល់នូវភាពងាយស្រួលសម្រាប់អ្នកប្រើប្រាស់ផងដែរ ពិសេសនៅពេលសម្អាត គឺគ្រាន់តែបាញ់ទឹកលាងធម្មតា មិនប្រើកម្លាំងច្រើននោះទេ ដោយសារធុងនេះមានចោះរន្ធសម្រាប់បង្ហូរទឹកស្រាប់។ ក្រៅពីនេះ វាមានដៃយួរសងខាងដែលអាចបង្កភាពងាយស្រួលដល់អ្នកប្រមូលសំរាមក្នុងការលើកចាក់ចូលទៅក្នុងរថយន្តដឹកសំរាមតែម្ដង។

អាជីវកម្មមួយទៀតនោះគឺ សិប្បកម្ម សាន ពៅ​ ដែលមានការកែច្នៃដើមត្នោតទៅជាសម្ភារៈប្រើប្រាស់ជាច្រើនមុខ ហើយសម្ភារដែលពេញនិយមជាងគេ គឺប្រភេទសម្ភារផ្ទះបាយដូចជា ចាន ស្លាបព្រា ចង្កឹះ វែក កែវ ដែលភាគច្រើនខាងហាង ក៏ដូចជាភោជនីយដ្ឋានគេត្រូវការច្រើន។

លោក សាន ពៅ ជាម្ចាស់សិប្បកម្មផ្ទាល់ បានប្រាប់ AMS ឱ្យដឹងថា៖

«ខ្ញុំចាប់ផផ្ដើមអាជីវកម្មនេះ ដោយសារតែខ្ញុំជាកូនកសិករក្រីក្រ ហើយឃើញដើមត្នោតត្រូវបានគេកាប់ចោលច្រើន ក៏បានយកវាមកច្នៃជាស្លាបព្រា និងគ្រឿងតូចផ្សេងៗទៀត លុះមានការចាប់អារម្មណ៍ ក៏បានពង្រីកជាអាជីវកម្មជាបន្តបន្ទាប់រហូតដល់យើងមានក្រុមអ្នកផលិតប្រមាណជាង ២០០ នាក់ដែលជាជនមានពិការភាព ហើយយើងក៏មានផ្ដល់នូវកន្លែងស្នាក់នៅ និងប្រាក់ខែសមរម្យ»។

ចុងក្រោយគឺអាជីវកម្មផលិតទៀនក្រអូប ដែលជួយសម្រួលអារម្មណ៍តានតឹង កាត់បន្ថយស្ត្រេស បំបាត់ភាពហត់នឿយ និងធ្វើឱ្យអារម្មណ៍ស្រស់ស្រាយក្នុងការរស់នៅប្រចាំថ្ងៃ។ កញ្ញា ភាព សុថុន ស្ថាបនិក ហត្ថានារី បានរៀបរាប់ថា៖

«កត្តាសំខាន់ៗដែលជំរុញឱ្យខ្ញុំបង្កើតហត្ថានារីឡើងគឺដោយសារមើលឃើញពីបញ្ហារបស់បងប្អូនយើងផង ណាមួយមានជំនាញផ្នែកគីមីចំណីអាហារស្រាប់ផង ទើបខ្ញុំចង់ប្រើជំនាញនេះដើម្បីបង្កើតនូវអ្វីដែលជះផលវិជ្ជមានដល់ការរស់នៅ ពិសេសជួយជីវភាពបងប្អូនស្ត្រីនៅជនបទបានមួយកម្រិតផងដែរ»។

កញ្ញាបន្ថែមទៀតថា  ផលិតផលរបស់ហត្ថានារី ផ្ដោតលើ គ្រីមធម្មជាតិ ដូចជា គ្រីមការពារមូស គ្រីមជំនួយដំណេក និងគ្រីមលាបនៅពេលឈឺក្បាល ចំណែកប្រភេទតែមាន ៩រសជាតិ មានដូចជា តែរមៀត តែខ្ញី និងតែស្លឹកគ្រៃលាយស្លឹកក្រូច និងរំដេង តែផ្កាអមតៈ តែស្លឹកតើយ តែផ្កាឡេវអាវ តែម្ជូរព្រឹក និងតែព្នៅ។ ក្រៅពីនេះគេក៏មានជាប្រភេទទៀនក្រអូបដែលមានចំនួន ១២ក្លិន ផ្សំឡើងពីវត្ថុធាតុដើមក្នុងស្រុក និងមានការរចនារូបលើដបទឹកផងដែរ។

ជារួមមកឃើញថា អាជីវកម្មនីមួយៗសុទ្ធតែមានគោលគំនិតប្លែកៗគ្នា អាស្រ័យទៅតាមតំបន់ សក្ដានុពលវត្ថុធាតុដើមសម្រាប់ផលិត ប៉ុន្តែសុទ្ធតែផ្ដល់ផលប្រយោជន៍រួមសម្រាប់ជីវភាពសហគមន៍ដូចគ្នា។ ដូច្នេះសម្រាប់បងប្អូនដែលមានគំនិតចង់បង្កើតអាជីវកម្មណាមួយ គួរគិតគូរឱ្យបានគ្រប់ជ្រុងជ្រោយទើបអាចទទួលបានជោគជ័យ៕