តំបន់ស្វ័យតទីបេ-ចិន៖ អ្នកសារព័ត៌មានមកពី៦ប្រទេសដែលស្ថិតនៅតាមដងទន្លមេគង្គ រួមមាន ចិន ថៃ មីយ៉ាន់ម៉ា ឡាវ កម្ពុជា និងវៀតណាម បានពិភាក្សាគ្នាដើម្បីចែករំលែកទស្សនៈស្តីពីការជំរុញកិច្ចសហប្រតិបត្តិការមេគង្គ-ឡានឆាង នៅស្រុកណាងឈាន( Nangqian) នៃក្រុងអ៊ីស៊ូ (Yushu) តំបន់ស្វ័យភាពទីបេ ខេត្តឈីងហៃ ប្រទេសចិន។

កិច្ចសន្ទនានេះជាផ្នែកមួយនៃព្រឹត្តិការណ៍ «សប្តាហ៍រូបថត និងវីដេអូ អន្តរជាតិឡានឆាង-មេគង្គ ឆ្នាំ២០២៤ – Lancang-Mekong International Photo and Video Week 2024» ដែលបានប្រារព្ធធ្វើពីថ្ងៃ​ទី​១៦ ដល់ថ្ងៃទី២២ ខែសីហាឆ្នាំ២០២៤ នៅលើទឹកដីនៃតំបន់ខ្ពង់រាបទីបេ ប្រភពដើមនៃទឹកទន្លេមេគង្គ។

អ្នកសារព័ត៌កម្ពុជាដែលចូលរួមចែករំលែកទស្សនៈនៅក្នុងកិច្ចសន្ទនាដើម្បីចែករំលែកជំរុញកិច្ចសហប្រតិបត្តិការ និងពិភាក្សាអំពីមធ្យោបាយសំដៅរួមចំណែកដល់ការអភិវឌ្ឍន៍ទន្លេក្នុងតំបន់នេះ មកពីសារព័ត៌​មា​ន AMS ,បណ្តាញព័ត៌មាន Fresh News និងទីភ្នាក់ងារព័ត៌មានកម្ពុជា (AKP)។

អំឡុងពេលពិភាក្សាដែលបានប្រព្រឹត្តទៅនៅថ្ងៃទី២០ ខែសីហាក្នុងតំបន់ Nangqian ក្រុមអ្នកសារព័ត៌មានបានផ្លាស់ប្តូរទស្សនៈយល់ឃើញអំពីតួនាទីរបស់ប្រព័ន្ធផ្សព្វផ្សាយក្នុងការលើកកម្ពស់កិច្ចសហប្រតិបត្តិការក្នុងតំបន់ និងការអភិវឌ្ឍប្រកបដោយចីរភាព។ ក្រុមអ្នកសារព័ត៌មានបានសង្កត់ធ្ងន់លើសារៈសំខាន់នៃព័ត៌មានត្រឹមត្រូវ(ប្រឆាំងព័ត៌មានក្លែងក្លាយ-Fake News) និងមានតុល្យ​ភាព ដើម្បីកសាងទំនុកចិត្ត និងការយល់ដឹងក្នុងចំណោមប្រទេសឡានឆាង-មេគង្គ ជាពិសេសផ្តោតទៅលើតួនាទីរបស់សារពត៌មានក្នុងការជួយលើកកម្ពស់កិច្ចសហប្រតិបត្តិការឡានឆាង -មេគង្គ។

លោក ប៉ា ជេដ្ឋា អគ្គនាយករងបណ្តាញព័ត៌មាន Fresh News និងប្រតិភូព័ត៌មានមកពីកម្ពុជាយល់ឃើញដូចគ្នា និងប្រតិភូមកពីប្រទេសថៃ និងឡាវ ដែលបានលើកឡើងថា ការចែករំលែកព័ត៌មាន គឺជាសារៈ​សំខាន់នៃកិច្ចសហប្រតិបត្តិការឆ្លងព្រំដែន ក្នុងការពង្រឹងកិច្ចសហប្រតិបត្តិការ ឡានឆាងមេគង្គ ជាពិសេសលើការប្រយុទ្ធប្រឆាំងនឹងព័ត៌មានក្លែងក្លាយ។

លោក ប៉ា ជេដ្ឋា បានលើកឡើងក្នុងកិច្ចពិភាក្សាថា៖

«តាមរយៈការចែករំលែកព័ត៌មាន និងបទពិសោធន៍ យើងអាចលើកឡើងពីឱកាស និងបញ្ហាប្រឈម ក្នុងមហាអនុតំបន់ទន្លេឡានឆាង-មេគង្គ ហើយជំរុញកិច្ចខិតខំប្រឹងប្រែងរួមគ្នាដោះស្រាយ ដើម្បីធានាដល់ការអភិឌ្ឍ ប្រកបដោយចីរភាព និងផលប្រយោជន៍រួមគ្នា ពិសេសការប្រឆាំងព័ត៌មានក្លែងក្លាយក្នុងយុគសម័យបច្ចេកវិទ្យាAI»។

ក្នុងដំណើរទស្សនកិច្ចរយៈពេល១សប្តាហ៍នេះ បានផ្តល់ឱកាសសម្រាប់អ្នកសារព័ត៌មាន អ្នកបង្កើតមាតិកាលើបណ្តាញសង្គម អ្នកថតរូប និងថតវីដេអូអាជីពបានឃើញដោយផ្ទាល់នូវសមិទ្ធផលអេកូឡូស៊ី និងវឌ្ឍនភាពសេដ្ឋកិច្ចសង្គមនៅក្នុងតំបន់នៃប្រភពទឹកទន្លេមេគង្គ។ បណ្តាអ្នកសារព័ត៌មានបានចុះទៅសហគមន៍មូលដ្ឋាន ធ្វើការទំនាក់ទំនងជាមួយអ្នកស្រុក និងដើរគយគន់មើលទេសភាពដ៏ស្រស់ត្រកាល នៃអាងទន្លេឡានឆាង ស្វែងយល់ពីវប្បធម៌ និងប្រភពដើមនៃទន្លេមេគង្គក្នុងស្រុក Zaduo និងស្រុក Nangqian នៃក្រុងអ៉ីស៊ូ (Yushu)។

លោក ញ៉ែម សុផល ផ្នែកការិយាល័យព័ត៌មានសេដ្ឋកិច្ចនៃសារព័ត៌មាន AMS បានគូសរំលេចពីតួនាទីយ៉ាងសំខាន់របស់សារព័ត៌មានចំពោះការជំរុញកិច្ចសហប្រតិបត្តិការ LMC ។ លោកជំរុញឱ្យមានការបង្កើតនូវវេទិកាជួបជុំពិភាក្សាគ្នាជាប់ជាប្រចាំដើម្បីរួមគ្នាដោះស្រាយបញ្ហាប្រឈមក្នុងតំបន់។

លោកបញ្ជាក់ថា៖

«យើងគួរបង្កើតឱ្យមានវេទិកាសន្និសីទសារព័ត៌មាន ឬសិក្ខាសាលាថ្នាក់តំបន់ ដែលជាឱកាសសម្រាប់អ្នកសារព័ត៌មានពិភាក្សាពីបញ្ហាប្រឈមផ្សេងៗរបស់តំបន់មេគង្គ-ឡានឆាង ក៏ដូចជាការចែករំលែកនូវបទពិសោធន៍ល្អៗ និងស្វែករកដំណោះស្រាយរួមគ្នាបែបវិជ្ជមាន»។

លោក សុផល បានបញ្ជាក់ថា ៖ កិច្ចសហប្រតិបត្តិការឡានឆាង-មេគង្គ គឺជាវេទិកាតំបន់លើកកម្ពស់កិច្ចសហប្រតិបត្តិការក្នុងចំណោមបណ្ដាប្រទេសដែលស្ថិតនៅតាមបណ្ដោយទន្លេមេគង្គ ហើយសារព័ត៌មានដើរតួនាទីសំខាន់នៃកិច្ចសហប្រតិបត្តិការនេះ។

គួរជម្រាបឱ្យដឹងថា ៖ ព្រឹត្តិការណ៍ Lancang-Mekong International Photo and Video Week 2024 ត្រូវបានរៀបចំរួមគ្នាដោយគណៈកម្មាធិការនៃគណបក្សកុម្មុយនិស្តចិនប្រចាំទីក្រុង Yushu និង China News Service នៃខេត្ត Qinghai និងអង្គភាពផ្សេងទៀត ដែលប្រព្រឹត្តទៅពីថ្ងៃទី១៦ ដល់ថ្ងៃទី២២ ខែសីហា ឆ្នាំ២០២៤ ក្នុងទីក្រុង Yushu ខេត្ត ឈីងហៃ(Ginghai)។

ដំណើរទស្សនកិច្ចរយៈពេល១សប្តាហ៍នេះ បានផ្តល់ឱកាសសម្រាប់អ្នកសារព័ត៌មាន អ្នកបង្កើតមាតិកាលើបណ្តាញសង្គម អ្នកថតរូប និងថតវីដេអូអាជីពបានឃើញដោយផ្ទាល់នូវសមិទ្ធផលអេកូឡូស៊ីនិងវឌ្ឍនភាពសេដ្ឋកិច្ចសង្គមនៅក្នុងតំបន់នៃប្រភពទឹកទន្លេ មេគង្គ។ប្រតិភូបានចុះទៅមានសហគមន៍មូលដ្ឋាន ធ្វើការទំនាក់ទំនងជាមួយអ្នកស្រុក និងដើរគយគន់មើលទេសភាពដ៏ស្រស់ត្រកាល នៃអាងទន្លេឡានឆាង ស្វែងយល់ពីវប្បធម៌ និងប្រភពដើមនៃទន្លេមេគង្គក្នុងស្រុក Zaduo និងស្រុក Nangqian នៃក្រុងអ៊ីស៊ូ (Yushu)។

ព្រឹត្តិការណ៍នេះ មានគោលបំណងនាំយកប្រព័ន្ធផ្សព្វផ្សាយមកពីបណ្ដាប្រទេស LMC មកកាន់ទីក្រុង Yushu ដែលជាប្រភពដើមនៃទន្លេមេគង្គ ដើម្បីចែករំលែករឿងរ៉ាវ ផ្លាស់ប្តូរវប្បធម៌ ស្វែងយល់ពីវឌ្ឍនភាពក្នុងការអភិវឌ្ឍន៍សេដ្ឋកិច្ច និងការការពារប្រព័ន្ធអេកូឡូស៊ី និងលើកកម្ពស់កិច្ចសហប្រតិបត្តិការប្រព័ន្ធផ្សព្វផ្សាយ រួមចំណែកកសាងអនាគតរួមគ្នាសម្រាប់អាងទន្លេមេគង្គឡាងឆាង (Lancang-Mekong)៕