សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ស្ពឺ ៖ ធ្យូងអនាម័យ ដែលផលិតពីកាកសំណល់កសិកម្ម និងកម្ទេចកម្ទីធ្យូងកាលពីពេលកន្លងទៅបានហក់ឡើងថ្លៃមួយរយៈ ស្របពេលមានភាពតានតឹង និងកើតមានវិបត្តិថាមពលនៅតំបន់មជ្ឈិមបូព៌ា ដែលប៉ះពាល់ដល់តម្លៃប្រេង។ យ៉ាងណាក៏ដោយ នៅពេលបច្ចុប្បន្ននេះ បើទោះបីជាស្ថានការណ៍នៅមជ្ឈិមបូព៌ាបានធូរស្រាលបន្តិច ប៉ុន្តែទីផ្សារធ្យូងអនាម័យនៅតែមានតម្រូវការខ្ពស់ និងទទួលបានតម្លៃល្អដដែល។
ក្នុងអំឡុងមានភាពតានតឹងខ្លាំងនៅតំបន់មជ្ឈិមបូព៌ាដែលធ្វើឱ្យតម្លៃប្រេងឥន្ធនៈកើនឡើងខ្ពស់ ប្រជាពលរដ្ឋជាច្រើនបានងាកមកប្រើប្រាស់ធ្យូងអនាម័យ។ កាលនោះ ធ្យូងអនាម័យមានតម្រូវការច្រើន ហើយតម្លៃក៏បានកើនឡើងគួរឱ្យកត់សម្គាល់ផងដែរ។ ប៉ុន្តែបច្ចុប្បន្ន តម្រូវការបានវិលត្រឡប់មកកម្រិតធម្មតាវិញហើយ។
លោក ហេង មករា ម្ចាស់សិប្បកម្មធ្យូងអនាម័យ TH (Cambodia) Energy Solution ដែលមានទីតាំងនៅក្រុងឧដុង្គម៉ែជ័យ ខេត្តកំពង់ស្ពឺ បានរំលឹកថា កាលពីពេលផ្ទុះសង្រ្គាមនៅមជ្ឈឹមបូព៌ា ធ្យូងអនាម័យប្រភេទលេខ១ បានឡើងថ្លៃដល់ ៤ ៥០០រៀលក្នុង១គីឡូក្រាម គឺឡើងថ្លៃ ៥០០រៀល។ ចំណែកធ្យូងលេខ២ ដែលគេប្រើជាទូទៅ បានឡើងថ្លៃដល់ ២ ៥០០រៀលក្នុងមួយគីឡូក្រាម ខណៈតម្លៃធម្មតាគឺក្រោម ២ ០០០រៀលប៉ុណ្ណោះ ហើយការផលិតត្រូវបានលក់អស់ពីស្តុក។ ប៉ុន្តែចាប់ពីខែមិថុនាមក តម្រូវការបានវិលត្រឡប់មកប្រក្រតីភាពវិញ ដោយតម្លៃលក់ដុំជាមធ្យមគឺប្រមាណ ១លានរៀលក្នុងមួយតោន។ បច្ចុប្បន្ន ក្រុមហ៊ុនរបស់លោកផលិតធ្យូងអនាម័យបានប្រមាណ ៣០ ទៅ ៤០តោនក្នុងមួយខែ។
លោក ហេង មករា បានឱ្យដឹងទៀតថា ដោយសារក្រុមហ៊ុនរបស់លោកប្រើកម្ទេចកម្ទីធ្យូងជាវត្ថុធាតុដើម លោកក៏ទទួលទិញធ្យូងជាកាកសំណល់គ្រប់ប្រភេទពីប្រជាពលរដ្ឋក្នុងតម្លៃ ២០០រៀលក្នុងមួយគីឡូក្រាមផងដែរ។
ធ្យូងអនាម័យ គឺជាធ្យូងផលិតពីកម្ទេចកម្ទីធ្យូងគ្រប់ប្រភេទ និងកាកសំណល់កសិកម្ម ដូចជា ត្រឡោកដូង កម្ទេចឈើ ស្លឹកឈើ និងសម្បកគ្រាប់រុក្ខជាតិ។ វត្ថុធាតុដើមទាំងនេះត្រូវបានដុតឱ្យក្លាយជាធ្យូង បន្ទាប់មកយកទៅកិន លាយជាមួយម្សៅមី និងទឹកស្អាត មុនបញ្ចូលទៅក្នុងម៉ាស៊ីនចាក់ពុម្ព ហើយហាលថ្ងៃ ឬសម្ងួតក្នុងឡរហូតដល់ស្ងួត។ ធ្យូងប្រភេទនេះមានគុណភាពខ្ពស់ ឆេះបានយូរ មិនផ្ទុះ មិនបង្កផ្សែង ឬធូលីរំខាន ហើយមិនធ្វើឱ្យប្រឡាក់ដៃ និងសម្លៀកបំពាក់ពេលប្រើប្រាស់។
ធ្យូងប្រភេទនេះ អាចឆេះបានរយៈពេល ៣ ទៅ ៤ម៉ោង ពោលគឺឆេះរយៈពេលយូរជាងធ្យូងធម្មតាប្រមាណ ២ ទៅ ៣ដង។ ធ្យូងអនាម័យស័ក្តិសមសម្រាប់ការអាំងសាច់ ព្រោះវាឆេះងំបានយូរ និងផ្តល់កម្តៅស្មើៗគ្នា មិនធ្វើឱ្យសាច់ឆាប់ខ្លោចដូចធ្យូងធម្មតា។ លើសពីនេះ ការផលិតធ្យូងអនាម័យក៏រួមចំណែកបង្កើនតម្រូវការម្សៅមី ដែលផលិតពីដំឡូងមីក្នុងស្រុកផងដែរ៕ ដោយ៖ ម៉ាដេប៉ូ
Account
Security
Favourite Content