គ្រាប់ស្វាយចន្ទីកម្ពុជា ជាគ្រាប់ធុញ្ញជាតិមួយប្រភេទដែលមានប្រជាប្រិយភាពខ្ពស់ មានគេចូលចិត្តទទួលទានច្រើន ខណៈដែលប្រមុខរាជរដ្ឋាភិបាលបានដាក់គោលដៅសម្រេចឱ្យបាននូវរហស្សនាមថាជា«អធិរាជស្វាយចន្ទី» នៅពេលខាងមុខនេះ ។ អ្វីដែលជាធ្វើឱ្យគ្រាប់ស្វាយមានប្រជាប្រិយភាព និងតម្លៃលក់នៅលើទីផ្សារខ្ពស់ ក៏ព្រោះគេអាចកែច្នៃធ្វើជាអាហារក្រៀម (គ្រាប់ស្វាយចន្ទី) ធ្វើជាប្រេង ជាពិសេសគេអាចផលិតជាប័រម្យ៉ាង ដែលជាផលិតផលថ្មី សម្រាប់ទទួលទានជាមួយអាហារ និងផ្លែឈើផ្សេងទៀតបានយ៉ាងមានឱជារស ហើយមានប្រយោជន៍ច្រើនចំពោះសុខភាពថែមទៀតផង។

Cashew Butter by Aiden ជាប្រភេទប័រមួយប្រភេទ ដែលកែច្នៃចេញពីគ្រាប់ស្វាយចន្ទីក្នុងប្រទេសកម្ពុជា ផលិតដោយសិប្បកម្មមួយកន្លែងនៅខេត្តសៀមរាប និងកំពុងដាក់លក់ដុំ និងរាយនៅលើទីផ្សារក្នុងស្រុកយ៉ាងទូលាយ មានទាំងនៅផ្សារបែបប្រពៃណី ផ្សារទំនើប និងបណ្តាម៉ាតមួយចំនួនទៀត។

អ្នកស្រី ចន យូម៉ា ជាម្ចាស់សិប្បកម្មកែច្នៃ និងផលិរប័រចេញពីវត្ថុធាតុដើមនៃគ្រាប់ស្វាយចន្ទីកម្ពុជាបានមានប្រសាសន៍ថា ៖

«ខ្ញុំមានគំនិតផលិតប័រគ្រាប់ស្វាយចន្ទីនេះ ដោយសារតែកាលពីដំបូងឡើយ យើងញ៉ាំតែប្រភេទប័រសណ្ដែកដី តែស្រុកយើងមានគ្រាប់ស្វាយចន្ទីច្រើនក៏នឹកឃើញយកមកក្រឡុកធ្វើជាប័រឱ្យដូចប័រសណ្ដែកដីដែរ ហើយវាមានរសជាតិឆ្ងាញ់ ល្អសម្រាប់សុខភាព ក៏បានចាប់ផ្ដើមជាអាជីវកម្មនៅឆ្នាំ២០២៣ ហើយបច្ចុប្បន្នយើងអាចលក់បានប្រមាណ ៥០-៨០គីឡូក្រាមក្នុងមួយខែ»។

អ្នកស្រីបន្ថែមថា៖

«ប័រគ្រាប់ស្វាយចន្ទីនេះយើងមានលក់នៅតាមបណ្ដាផ្សារម៉ាតនានា ក្នុងខេត្តសៀមរាប និងលក់ឱ្យសណ្ឋាគារធំៗ ដោយតម្លៃយើងលក់ ២៥ដុល្លារ ក្នុង១គីឡូក្រាម រីឯតម្លៃនៅតាមម៉ាត ៣ដុល្លារសម្រាប់កំប៉ុងតូច ទម្ងន់៩០ក្រាម និង ៥.៥ដុល្លារ សម្រាប់កំប៉ុងធំ ទម្ងន់ ១៨០ក្រាម»។

ម្ចាស់សិប្បកម្មកែច្នៃក្នុងស្រុករូបនេះបញ្ជាក់ឱ្យដឹងដែរថា ចំពោះផលិតផលប័រគ្រាប់ស្វាយចន្ទី គេអាចទទួលទានដោយផ្ទាល់ជាមួយនំប៉័ង ផ្លែឈើស្រស់ ផ្លែឈើសម្ងួត ឬអាចលាយជាមួយទឹកក្រឡុក ជាគ្រឿងផ្សំលាយទឹកជ្រលក់ និងអាចលាយជាមួយម្សៅធ្វើនំក៏បាន។ ចំណែកចំណុចពិសេសរបស់ប័រគ្រាប់ស្វាយចន្ទីប្រភេទនេះគឺត្រូវបានកែច្នៃ និងផលិតឡើងតាមតាមរូបមន្តផ្ទាល់ខ្លួនរបស់អ្នកស្រីដែលមានសិក្សាស្រាវជ្រាវបែបធម្មជាតិ ដោយមិនមានលាយនូវសារធាតុរក្សាទុក និងអាចរក្សាបានរសជាតិដើម មានប្រយោជន៍ច្រើនសម្រាប់សុខភាព។ នេះជាអ្វីដែលអ្នកស្រីបានលើកឡើង។

អ្នកស្រីបញ្ជាក់ថា ៖

« ត្បិតមិនមានផ្ទុកនូវសារធាតុរក្សាទុក ប៉ុន្តែប័ររបស់យើងអាចរក្សាទុកបាន ១ឆ្នាំ ឬយូរជាងនេះ បើទុកក្នុងទូរទឹកកក គ្រាប់សាច់តែប័រអាចឡើងខាប់ជាងធម្មតាបន្តិច ប៉ុន្តែគុណភាព និងរជាតិនៅរក្សាដដែល ពោលគឺទាំងគុណភាព គុណប្រយោជន៍មិនមានការបាត់បង់នោះទេ ខណៈដែលអតិថិជនដែលគាំទ្រភាគច្រើន គឺជនជាតិបរទេសដែលរស់នៅក្នុងតំបន់ ដែលតែងមកទិញជាប់ជាប្រចាំ»។

ដោយឡែក ពាក់ព័ន្ធនឹងបច្ចេកទេស និងវិធីសាស្ត្រក្នុងការកែច្នៃ ផលិតវិញត្រូវបានរៀបរាប់ប្រាប់ត្រួសៗថា ៖

«ដំបូងយើងយកគ្រាប់ស្វាយចន្ទីទៅដុត ដោយមានលាយជាមួយអំបិលសុខភាព និងប្រេងដូង បន្ទាប់មកយកវាទៅកិនបំបែកឱ្យម៉ដ្ឋល្អ ទើបអាចយកទៅដាក់ក្នុងម៉ាស៊ីនលាយជាមួយនឹងគ្រឿងផ្សំផ្សេងទៀតឱ្យសព្វល្អ ហើយអាចវេចខ្ចប់ដាក់ក្នុងកំប៉ុងជាការស្រេច។ ចំណែកបរិមាណនៃការផលិត យើងផលិតតិចៗជាប្រចាំសម្រាប់ស្តុកទុកប្រមាន ១៥-២០គីឡូក្រាម ឬអាចច្រើនជាងនេះនៅពេលមានភ្ញៀវកម្ម៉ង់ច្រើន»។

យ៉ាងណាមិញ ជាមួយនឹងដំណើរការនៃការកែច្នៃ និងផលិតនេះទៀតសោត អ្នកស្រី ចន យូម៉ា បញ្ជាក់ថា ចំពោះផលលំបាក ភាគច្រើនទាក់ទងនឹងសង្វាក់ផលិតកម្មរបស់សិប្បកម្មនៅមានទ្រងទ្រាយតូច ហើយសម្ភារមិនសូវទំនើប ប៉ុន្តែនៅថ្ងៃខាងមុខ បើមានលទ្ធភាពគ្រប់គ្រាន់ ឬមានដៃគូសហការ អ្នកស្រីនឹងពង្រីកទំហំសិប្បកម្មឱ្យធំជាងបច្ចុប្បន្ន បង្កើនការផលិត ដើម្បីផ្គត់ផ្គង់ទីផ្សារឱ្យបានទូលំទូលាយ នៅទូទាំងក្នុងប្រទេសកម្ពុជា ហើយអាចឈានដល់ការនាំចេញផងដែរ៕