ភ្នំពេញ ៖ ការប្រើប្រាស់កម្ចីពីគ្រឹះស្ថានហិរញ្ញវត្ថុផ្លូវការ ដែលសំដៅទៅលើធនាគារ និងគ្រឹះស្ថានមីក្រូហិរញ្ញវត្ថុមានអជ្ញាប័ណ្ណត្រឹមត្រឹវពីធនាគារជាតិនៃកម្ពុជា គឺជាមធ្យោបាយមួយជួយដល់ប្រជាជនក្នុងការពង្រីក ឬបង្កើតមុខរបរចិញ្ចឹមជីវិត ពិសេសជួយឱ្យជីវភាពប្រជាជនមានភាពល្អប្រសើរជាងមុន។

ជាស្តែង អ្នកស្រី ឆាង លក្ខិណា អាយុ ២៨ឆ្នាំ ជាស្រ្តីមេម៉ាយ មានមុខរបរជាអ្នកផាត់មុខ និងធ្វើសក់ នៅក្នុងផ្សារមួយដែលនៅជិតផ្ទះរបស់គាត់បានសម្រេចចិត្តប្រើប្រាស់កម្ចីពីគ្រឹះស្ថានមួយកន្លែងដែលជាមួយធម្យោបាយជួយបង្កើតមុខរបរផ្ទាល់ខ្លួនសម្រាប់អ្នកស្រី ហើយបានជួយក្រុមគ្រួសារអ្នកស្រីមានជីវភាពល្អប្រសើរជាងមុន។

ស្ថិតនៅក្នុងភូមិគោកស្រុក ឃុំពួក ស្រុកពួក ខេត្តសៀមរាប អ្នកស្រីបានរៀបរាប់ថា អ្នកស្រីត្រូវចិញ្ចឹមកូនស្រីតូចម្នាក់ និងម្តាយផងដែរ។ ដោយសារតែអ្នកស្រីជាស្រ្តីមេម៉ាយ ហេតុដូចនេះ នៅក្នុងឆ្នាំ២០១៨ អ្នកស្រីបានសម្រេចចិត្តបង្កើតអាជីវកម្មផ្ទាល់ខ្លួនមួយដើម្បីរកប្រាក់ចំណូលសម្រាប់ផ្គត់ផ្គង់គ្រួសារដោយប្រើប្រាស់កម្ចីជាមួយគ្រឹះស្ថានមីក្រូហិរញ្ញវត្ថុមួយកន្លែងជាលើកដំបូងចំនួន ៥០០ ដុល្លារ ដើម្បីទិញសម្ភារដូចជា ម៉ាស៊ីនកៀបសក់ កៅអី និងផលិតផលថែរក្សាសក់ផ្សេងៗ។

អ្នកស្រីបានមានប្រសាសន៍បន្តថា ដោយសារតែចំនួនអតិថិជនមានការកើនឡើងពីមួយថ្ងៃទៅមួយថ្ងៃ អ្នកស្រីក៏បានប្រើប្រាស់កម្ចីជាលើកទី៤ ចំនួន ៣ លានរៀល ដើម្បីយកទៅទិញផលិតផល និងសម្ភារបន្ថែម។ មកដល់ឆ្នាំ២០២២ អ្នកស្រីបានកម្ចីពីគ្រឹះស្ថានមីក្រូហិរញ្ញវត្ថុនោះជាលើកទី៧ ចំនួន ៤ លានរៀល ដើម្បីយកមកកែលម្អតូបរបស់អ្នកស្រីឱ្យកាន់តែមានភាពទាក់ទាញបន្ថែមទៀត ពីព្រោះបច្ចុប្បន្ន មានការប្រកួតប្រជែងនៅក្នុងទីផ្សារយ៉ាងខ្លាំងសម្រាប់អាជីវកម្មមួយនេះ។

អ្នកស្រីបានឱ្យដឹងថា ចាប់តាំងពីប្រើប្រាស់កម្ចីជាមួយគ្រឹះស្ថានមីក្រូហិរញ្ញវត្ថុកន្លងមក ក្រុមគ្រួសារអ្នកស្រីមានជីវភាពល្អប្រសើរជាងមុន តាំងពីមិនមានយានជំនិះផ្ទាល់ខ្លួនប្រើប្រាស់ត្រឹមត្រូវ រហូតដល់មានអ្វីៗជាច្រើនដែលគាត់ត្រូវការ។ លើសពីនេះទៅទៀត អ្នកស្រីអាចរកប្រាក់ចំណូលបានក្នុងមួយថ្ងៃពី ១០ ម៉ឺនរៀល ទៅ ២០ ម៉ឺរៀល បើធៀបពីមុនអ្នកស្រីអាចរកចំណូលបានត្រឹមតែ ៤ម៉ឺន ទៅ ៥ម៉ឺរៀល តែប៉ុណ្ណោះក្នុងមួយថ្ងៃ។

នាពេលអនាគត អ្នកស្រីមានបំណងចង់ទិញតូបមួយបន្ថែមទៀត និងផ្ទះផ្ទាល់ខ្លួន ដោយសារសព្វថ្ងៃនេះ អ្នកស្រីរស់នៅជាមួយម្តាយ។ ជាចុងក្រោយ អ្នកស្រីបានលើកឡើងដោយរីករាយថា គ្រឹះស្ថានមីក្រូហិរញ្ញវត្ថុបានផ្តល់កម្ចីជូនដល់អ្នកស្រីដែលធ្វើឱ្យអ្នកស្រីមានមុខរបរផ្ទាល់ខ្លួនមួយច្បាស់លាស់ និងមានជីវភាពល្អប្រសើរ លើសពីនេះគ្រឹះស្ថានមីក្រូហិរញ្ញវត្ថុ គឺជាស្ថាប័នដែលគ្មានការរើសអើងទៅលើស្ត្រីមេម៉ាយនោះឡើយ។

លោក​ សុខ វឿន ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានថ្លែងថា វិស័យមីក្រូហិរញ្ញវត្ថុនៅកម្ពុជានៅតែបន្តរក្សាបាននូវស្ថិរភាពរបស់ខ្លួន តាមរយៈការផ្តល់នូវសេវាកម្មជាមួយស្មារតីទទួលខុសត្រូវខ្ពស់ និងកិច្ចការពារអតិថិជន។

លោកបានបន្តថា សមាគមមីក្រូហិរញ្ញវត្ថុកម្ពុជា បាន និងកំពុងបន្តកិច្ចខិតខំប្រឹងប្រែងរបស់ខ្លួនជាមួយនឹងស្មារតីទទួលខុសត្រូវខ្ពស់ និងមានចក្ខុវិស័យច្បាស់លាស់ ក្រោមការដឹកនាំប្រកប​ដោយភាពឈ្លាសវៃពីសំណាក់រាជរាដ្ឋាភិបាល តាមរយៈធនាគាជាតិនៃកម្ពុជា ដោយបានដាក់ឱ្យអនុវត្តនូវគំនិតផ្តួចផ្តើមសំខាន់ៗក្នុងការអភិវឌ្ឍវិស័យ​​មីក្រូហិរញ្ញវត្ថុនៅកម្ពុជា។

សូមបញ្ជាក់ផងដែរថា គិតត្រឹមត្រីមាសទី៣ ឆ្នាំ២០២៣ កន្លងទៅនេះ វិស័យមីក្រូហិរញ្ញវត្ថុមានសមតុល្យឥណទានសរុបជាង ៥ពាន់លានដុល្លារសហរដ្ឋអាមេរិក និងមានអតិថិជនឥណទានសរុបជាង ១,៥លាននាក់។ សមតុល្យប្រាក់បញ្ញើនៅតាមគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ មានជាង ២០០០លានដុល្លារសហរដ្ឋអាមេរិក និងមានអតិថិជនដាក់ប្រាក់បញ្ញើសរុបជិត ២លាននាក់។ ចំណែកការិយាល័យប្រតិបត្តិមានសរុបជាង ៩០០ការិយាល័យ និងមានបុគ្គលិកដែលកំពុងបម្រើការងារក្នុងវិស័យជាង ២ម៉ឺននាក់។ គួរបញ្ជាក់ថា ទិន្នន័យនេះមិនរាប់បញ្ចូលធនាគារដែលជាសមាជិករបស់សមាគមទេ៕