សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កន្លងមក អត្រាប្រាក់រៀលហាក់មានតម្លទាបក្នុងចន្លោះពី ៤១០០រៀល ឬ ៤០៥០រៀល ធៀបនឹង ១ដុល្លារ ប៉ុន្តែរហូតមកទល់ថ្ងៃទី២៧ ខែមិនា ឆ្នាំ២០២៥ ដែលជាពេលវេលាកាន់តែខិតចូលមកដល់រដូវកាលនៃពិធីបុណ្យចូលឆ្នាំថ្មីប្រពៃណីជាតិខ្មែរ អត្រាប្រាក់រៀលបានឡើងថ្លៃខ្ពស់រហូតដល់ប្រមាណជា ៤០០២រៀលក្នុង១ដុល្លារអាមេរិក។
លោក រ័ត្ន សោភ័ណ ប្រធានសមាគមធនាគារនៅកម្ពុជា បានទទួលស្គាល់ថា ប្រាក់រៀលពិតជាឡើងថ្លៃជាងមុនបន្តិចមែន ដោយគិតមកទល់ចុងខែមីនា ឆ្នាំ២០២៥ ប្រាក់រៀលមានតម្លៃខ្ពស់ ដោយជួនកាល ១ដុល្លារអាមេរិកអាចប្ដូរបានទាបជាង ៤០០០រៀល ឬ ១ដុល្លារអាមេរិកមានតម្លៃត្រឹម៤០០២រៀលប៉ុណ្ណោះ។
លោកបញ្ជាក់ថា ៖
«វាជារឿងធម្មតាទេសម្រាប់ប្រាក់រៀលឡើងថ្លៃនៅពេលមានតម្រូវការចាំបាច់ ដូចជាតម្រូវការបើកប្រាក់ខែ តម្រូវការនៅពេលរដូវបុណ្យទាន ដូចជាបុណ្យចូលឆ្នាំចិន បុណ្យចូលឆ្នាំខ្មែរ និងពិធីបុណ្យភ្ជុំបិណ្ឌជាដើម»។
យោងតាមរបាយការណ៍ធនាគារជាតិនៃកម្ពុជាបានបង្ហាញថា អត្រាប្តូរប្រាក់រៀលធៀបនឹងប្រាក់ដុល្លារអាមេរិកនៅក្នុងអំឡុងឆ្នាំ២០២៤កន្លងទៅនេះ បន្តមានស្ថិរភាព ហើយប្រាក់រៀលមាននិន្នាការឡើងថ្លៃទៅរកគន្លងមុនពេលកូវីត។ ការឡើងថ្លៃនេះបណ្តាលមកពីការកើនឡើងនូវតម្រូវការប្រាក់រៀលរបស់គ្រឹះស្ថានធនាគារ និងហិរញ្ញវត្ថុសម្រាប់ជាប្រភពទុនក្នុងការផ្តល់ឥណទាន គួបផ្សំនឹងការពង្រឹងលើការគ្រប់គ្រងថវិការដ្ឋាភិបាល។
អត្រាប្តូរប្រាក់មានកម្រិតជាមធ្យម ៤.០៧១ រៀលក្នុង ១ដុល្លារអាមេរិក ដែលបានឡើងថ្លៃ ០,៩% ធៀបនឹងឆ្នាំ២០២៣ (៤.១១០ រៀល) ប៉ុន្តែថយថ្លៃ ០,៥% ធៀបនឹងឆ្នាំ២០១៦-២០១៨ (៤.០៥២រៀល)។ ចំណែករូបិយប័ណ្ណប្រទេសដៃគូពាណិជ្ជកម្មសំខាន់ៗរបស់កម្ពុជាមួយ ចំនួន បានធ្លាក់ថ្លៃធៀបនឹងដុល្លារអាមេរិក ដូចជា យ៉េនជប៉ុន (-៧,១%) យ៉ន់ចិន (១,២%) ដុងវៀតណាម(-៤,៦%) និងបាតថៃ (-០,៦%) ខណៈដែលផោនអង់គ្លេសនិងប្រាក់អឺរ៉ូ បានកើនថ្លៃ៣,១% និង០.៥% រៀងគ្នា។ ជារួមប្រាក់រៀលបានឡើងថ្លៃធៀបនឹងរូបិយប័ណ្ណដៃគូពាណិជ្ជកម្ម ២,៥%។
ការឡើងថ្លៃប្រាក់រៀល ធៀបនឹងរូបិយប័ណ្ណដៃគូនាំចេញ ផាត់ទាត់ដោយអតិផរណាកម្ពុជាទាបជាងអតិផរណាដៃគូនាំចេញ ធ្វើឱ្យសន្ទស្សន៍អត្រាប្តូរប្រាក់ប្រសិទ្ធភាពពិត ថ្លឹងតាម ការនាំចេញ(EREER) ថយចុះ១,៤% ដែលបង្ហាញពីភាពអាចប៉ះពាល់ដល់ឧត្តមភាពប្រកួតប្រជែងលើការនាំចេញទំនិញ។ ទោះយ៉ាងណា សម្ពាធអតិផរណាពីការនាំចូលមិនមានការថយចុះនោះទេ ដោយសន្ទស្សន៍អត្រាប្តូរប្រាក់ប្រសិទ្ធភាពពិតថ្លឹងតាមការនាំចូល (IREER) ថយចុះ ២,៥%។
គួររំលឹកថា ប្រតិបត្តិការជួញដូរប្រាក់ដុល្លារអាមេរិក រវាងគ្រឹះស្ថានធនាគារ និងហិរញ្ញវត្ថុនៅលើថ្នាលធនាគារជាតិនៃកម្ពុជា(NBCP) ក្នុងឆ្នាំ២០២៤ មានចំនួន ២,៧ ប៊ីលានដុល្លារអាមេរិក(១.៩៧១ ប្រតិបត្តិការ) ដែលកើនឡើង៤២% ធៀបនឹងឆ្នាំ២០២៣(១,៨ ប៊ីលានដុល្លារអាមេរិក ស្មើនឹង១.៤៨៣ ប្រតិបត្តិការ)៕ វិន ឈុនហ៊ាត
Account
Security
Favourite Content