សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្នាំ២០២៦នេះ សេដ្ឋកិច្ចកម្ពុជាត្រូវបានរំពឹងថានឹងមានកំណើន ៥ភាគរយ ដោយបន្តគាំទ្រដោយវិស័យសំខាន់ៗចំនួន៣ រួមមាន វិស័យឧស្សាហកម្ម វិស័យសេវាកម្ម និងវិស័យកសិកម្ម ក្នុងនោះ វិស័យឧស្សាហកម្ម ជាវិស័យសំខាន់ជាងគេក្នុងការជំរុញ និងគាំទ្រដល់កំណើនសេដ្ឋកិច្ចកម្ពុជា។ នេះបើតាមសេចក្ដីព្រាងរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ ។
នៅក្នុងសេចក្ដីព្រាងរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា វិស័យឧស្សាហកម្មដែលជាវិស័យសំខាន់ក្នុងការទ្រទ្រង់ដល់កំណើនសេដ្ឋកិច្ចឆ្នាំ២០២៦ ត្រូវបានរំពឹងថា នឹងមានកំណើនត្រឹម ៧,២ភាគរយ បើធៀបនឹងឆ្នាំ២០២៥មានការធ្លាក់ចុះបន្តិច ដោយសារការថមថយនៃតម្រូវការនាំចេញផ្នែកអនុវិស័យកាត់ដេរ និងកម្មន្តសាលមិនមែនកាត់ដេរ ក្រោយការរំពឹងទុកទៅលើបច្ច័យនៃការអនុវត្តពន្ធគយរបស់អាមេរិក ដែលនឹងធ្វើឱ្យតម្រូវការសកលមាននិន្នាការធ្លាក់ចុះ ។
នៅក្នុងសេចក្ដីព្រាងដដែលបានបង្ហាញថា អនុវិស័យកាត់ដេរ ត្រូវបានព្យាករថា អាចនឹងបន្តរក្សាបានកំណើន ត្បិតថាការនាំចេញទៅកាន់ទីផ្សារសហរដ្ឋអាម៉េរិកអាចប្រឈមនឹងហានិភ័យនៃការធ្លាក់តម្រូវការ ប៉ុន្តែវិស័យនេះនៅតែអាចបន្តកំណើនបានដែលគាំទ្រដោយនិន្នាការវិជ្ចមាននៃការធ្វើពិពិធកម្មទីផ្សារនាំចេញរបស់កម្ពុជា ដូចជា ទីផ្សារសហភាពអឺរ៉ុប និងអាស៊ាន ជាដើម ។ ជាមួយគ្នានេះដែរ អនុវិស័យកម្មន្តសាលមិនមែនកាត់ដេរ ត្រូវបានព្យាករថា នឹងមានការងើបមកវិញក្នុងឆ្នាំ២០២៦ ប៉ុន្តែក្នុងល្បឿនទាប គួបផ្សំនឹងការជំរុញការនាំចេញផលិតផលឧស្សាហកម្មយុទ្ធសាស្ត្រសំខាន់ៗក្រោយរបត់គោលនយោបាយពាណិជ្ជកម្មថ្មី។
នៅក្នុងសៀវភៅរបាយការណ៍ថវិកាសង្ខេបឆ្នាំ២០២៦របស់ក្រសួងសេដ្ឋកិច្ច និងហិរញ្ញវត្ថុ ក៏បានបង្ហាញផងដែរពីអនុវិស័យសំខាន់ ដែលរំពឹងថានឹងបន្តងើប ប៉ុន្តែក្នុងសភាពយឺត ហើយនៅតែមានកំណើនទាបជាងនិន្នាការមុនវិបត្តិកូវីដ១៩ ដែលទ្រទ្រង់ដោយសកម្មភាពសាងសង់លំនៅឋាន ឆ្លើយតបទៅនឹងតម្រូវការពិតក្នុងស្រុក គួបផ្សំនឹងការបន្តនិន្នាការកើនឡើងនៃសកម្មភាពវិស័យសំណង់ បម្រើឱ្យឧស្សាហកម្មមួយចំនួន ដូចជា រោងចក្រ សហគ្រាស និងឃ្លាំងជាដើម ដែលនឹងក្លាយជានិន្នាការថ្មីជួយគាំពារកំណើននៃអនុវិស័យនេះក្នុងរយៈពេលខ្លី និងមធ្យមខាងមុខ ។ ស្របគ្នានេះដែរ អនុវិស័យនៃផលិតផលម្ហូបអាហារ និងអនុវិស័យភេសជ្ជៈ រំពឹងថានឹងបន្តនិន្នាការកើនឡើង។
គួររម្លឹកថា ក្នុងរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងឆ្នាំ២០២៥កន្លងទៅ វិស័យឧស្សាហកម្មបានស្រូបទាញទុនវិនិយោគច្រើនជាងគេ ដោយក្នុងរយៈពល ១ឆ្នាំពេញ វិស័យទាក់ទាញទុនវិនិយោគចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC) ប្រមាណ ៥,៦ពាន់លានដុល្លារអាម៉េរិក ក្នុងចំណោមទុនវិនិយោគសរុបប្រមាណ ១០ពាន់លានដុល្លារអាម៉េរិក ។
ឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ការបិទច្រកព្រំដែនកម្ពុជា-ថៃ ពីសំណាក់ភាគីថៃ មានទាំងផលអវិជ្ជមាន និងផលវិជ្ជមាន ហើយសម្រាប់ផលវិជ្ជមាន គឺសហគ្រាសក្នុងស្រុកបានបង្កើនការផលិត និងការវិនិយោគលើឧស្សាហកម្មកាន់តែច្រើនដើម្បីបម្រើឱ្យសេចក្ដីត្រូវការរបស់ទីផ្សារក្នុងស្រុកដែលកំពុងមានតម្រូវការខ្ពស់ ដូច្នេះ វាជាបច្ច័យល្អសម្រាប់សហគ្រាសក្នុងស្រុក ។ ប៉ុន្តែ ចំពោះកសិផលដែលកម្ពុជាធ្លាប់នាំចេញទៅប្រទេសថៃគឺពិបាកស្វែងរកទីផ្សារបន្តិច ៕
Account
Security
Favourite Content