សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ លទ្ធផលនៃកិច្ចប្រជុំរវាងថ្នាក់ដឹកនាំកំពូលកម្ពុជា -វៀតណាម- ឡាវ ក្នុងជំនួបកាលពីថ្ងៃចុងសប្ដាហ៍កន្លងទៅនេះ បានសង្កត់ធ្ងន់លើសារសំខាន់នៃទំនាក់ទំនង និងកិច្ចសហប្រតិបត្តិការរវាងប្រទេសទាំង៣ សម្រាប់កិច្ចអភិវឌ្ឍន៍ ការរក្សាសន្តិភាព ស្ថិរភាពក្នុងតំបន់ រួមទាំងកិច្ចឯកភាពគ្នា ជំរុញទំហំពាណិជ្ជកម្មទៅវិញទៅមកនៃប្រទេសទាំង៣ ឱ្យកើនឡើងទ្វេដង ជាមួយនឹងការអនុវត្តគោលនយោបាយទេសចរណ៍ «ប្រទេស៣ គោលដៅមួយ» ដើម្បីជំរុញប្រទេសទាំង៣ ឱ្យក្លាយជាគោលដៅទេសចរណ៍សម្រាប់ភ្ញៀវទេសចរនៃប្រទេសទាំង៣ និងប្រទេសផ្សេងៗទៀតជុំវិញពិភពលោក។
ភាគីនៃប្រទេសទាំង៣ ក៏បានឯកភាពបន្តបង្កើនការផ្លាស់ប្តូរព័ត៌មាន សហការយ៉ាងជិតស្និទ្ធក្នុងការប្រយុទ្ធប្រឆាំងនឹងសកម្មភាពប្រឆាំងរបស់ពួកអមិត្ត ភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ជាពិសេសបទល្មើសឆបោកអនឡាញ គ្រឿងញៀន និងការជួញដូរមនុស្ស ព្រមទាំងរួមគ្នាដោះស្រាយបញ្ហាប្រឈមនានា ដូចជា ជំងឺឆ្លង ការប្រែប្រួលអាកាសធាតុ និងគ្រោះមហន្តរាយផ្សេងៗនៅតាមតំបន់ព្រំដែន។
បន្ថែមពីនេះ ក៏មានកិច្ចពិភាក្សាលើការជំរុញដោះស្រាយបញ្ហាព្រំដែនដែលនៅសេសសល់ឱ្យបានឆាប់រហ័ស ដើម្បីទុកជាកេរមរតកដល់កូនចៅជំនាន់ក្រោយនូវព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ក៏ដូចជាបន្តភាពជិតស្និទ្ធជួយគ្នាទៅវិញទៅមក ក្នុងវេទិកាមហាអនុតំបន់ទន្លេមេគង្គ តំបន់ និងអន្តរជាតិ ព្រមទាំងប្តេជ្ញាការពារសាមគ្គីភាព មជ្ឈភាពអាស៊ាន និងគោលការណ៍ដោះស្រាយជម្លោះដោយសន្តិវិធី និងគោរពច្បាប់អន្តរជាតិ។
ជាមួយគ្នានេះ ភាគីកម្ពុជា បានថ្លែងអំណរគុណដល់មិត្តវៀតណាម និងមិត្តឡាវ ដែលបានចូលរួមជាមួយសមាជិកអាស៊ានដទៃទៀត គាំទ្របទឈប់បាញ់រវាងកម្ពុជា-ថៃ និងបានចូលរួមចំណែកដល់បេសកកម្មក្រុមសង្កេតការណ៍អាស៊ាន ដើម្បីជួយធានាការអនុវត្តបទឈប់បាញ់ឱ្យមានប្រសិទ្ធភាព។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញប្រទេសទាំង៣ បន្តការផ្លាស់ប្តូររវាងប្រជាជន និងប្រជាជន និងការតភ្ជាប់កាន់តែទូលំទូលាយ តាមរយៈហេដ្ឋារចនាសម្ព័ន្ធ ការដឹកជញ្ជូន វប្បធម៌ ទេសចរណ៍ ថាមពលអគ្គីសនី ។ល។ និងជំរុញក្រុមការងារបច្ចេកទេសពន្លឿនការកំណត់ទីតាំងតភ្ជាប់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបាយកម្ពុជា-វៀតណាម។
ដោយឡែក ប្រមុខរដ្ឋាភិបាល កម្ពុជា-ឡាវ ក៏បានពិភាក្សាអំពីការពន្លឿនតភ្ជាប់ហេដ្ឋារចនាសម្ព័ន្ធដឹកជញ្ជូន ដែលអាចឱ្យកម្ពុជាដឹកជញ្ជូនផលិតផលកសិកម្មទៅកាន់ប្រទេសទី៣ ដោយឆ្លងកាត់ប្រទេសឡាវ ចំណែកឯប្រទេសឡាវក៏អាចចាត់ទុកកម្ពុជាជាច្រកផ្លូវដឹកជញ្ជូនទំនិញពីប្រទសឡាវ ទៅកាន់ទីផ្សារអន្តរជាតិ ដោយឆ្លងកាត់កម្ពុជា និងប្រើប្រាស់ផែសមុទ្រកម្ពុជា ស្របតាមយុទ្ធសាស្ត្រប្រែក្លាយប្រទេសឡាវពីប្រទេសដែលគ្មានព្រំដែនជាប់សមុទ្រ (landlocked) ទៅជាប្រទេសដែលមានការតភ្ជាប់ (land-linked)។
សម្តេចធិបតី ក៏បានកត់សម្គាល់ពីវឌ្ឍនភាពនៃទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំង៣ នាពេលកន្លងមក និងដាក់ចេញនូវគំនិតផ្តួចផ្តើមមួយចំនួន ដើម្បីបន្តលើកកម្ពស់កិច្ចសហប្រតិបត្តិការពាណិជ្ជកម្មបន្ថែមទៀត ដើម្បីសម្រេចបាននូវទំហំពាណិជ្ជកម្ម៧០០លានដុល្លារអាម៉េរិក នៅឆ្នាំ២០៣០ ជាមួយប្រទេសឡាវ និងទំហំពាណិជ្ជកម្ម២០ពាន់លានដុល្លារអាម៉េរិក ជាមួយប្រទេសវៀតណាម នាពេលខាងមុខ៕
Account
Security
Favourite Content