ភ្នំពេញ ៖ មន្ត្រីជាន់ខ្ពស់ក្រសួងទេសចរណ៍បានចាត់ទុកថា ការចូលរួមពីវិស័យឯកជនតាមរយៈការបង្កើតសេវាកម្ម និងផលិតផលទេសចរណ៍ថ្មីៗគឺជាឃ្នាស់ ឬជាចលករយ៉ាងសំខាន់ក្នុងការជួយជ្រោមជ្រែង និងអភិវឌ្ឍន៍ឧស្សាហកម្មទេសចរណ៍កម្ពុជាឱ្យមានសកម្មភាពរស់ឡើងវិញ។

ឯកឧត្តម នី ផល្លី រដ្ឋលេខាធិការក្រសួងទេសចរណ៍ នាពិធីសម្ពោធកម្មវិធីដំណើរកម្សាន្តក្នុងស្រុកតាមតំបន់សមុទ្រ «រដូវកាលបៃតង» របស់សមាគមទេសចរណ៍អាស៊ីប៉ាស៊ីហ្វិក កម្ពុជា នាព្រឹកថ្ងៃទី១៤ ខែឧសភា ឆ្នាំ២០២៥ បានមានប្រសាសន៍ថា ក្រោយការដាក់ចេញនូវយុទ្ធនាការទេសចរណ៍រដូវកាលបៃតងរបស់ក្រសួងទេសចរណ៍ ដែលដឹកនាំដោយឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ គ្រប់ភាគីពាក់ព័ន្ធទាំងអស់បានចូលរួមយ៉ាងផុលផុស ដើម្បីជំរុញចលនាទេសចរណ៍នៅក្នុងរដូវកាលបៃតងនេះ ដែលកន្លងមកបានប្រែក្លាយពីរដូវកាលភ្លៀងមកជារដូវកាលបៃតង ដោយសង្កេតឃើញថា វិស័យឯកជនក្នុងស្រុកបានចូលរួមយ៉ាងផុលផុស ដែលជាកម្លាំងចលករជួយឱ្យឧស្សាហកម្មមួយនេះរស់ឡើងវិញជាបណ្តើរៗ។

ឯកឧត្តមបានបញ្ជាក់ថា ៖

« សម្បទាទេសចរណ៍នៅក្នុងវិស័យទេសចរណ៍តាមតំបន់ឆ្នេរសមុទ្រកម្ពុជា និងនៅតាមគោលដៅផ្សេងៗទៀត គឺនៅតែមានភាពល្អប្រសើរ ការផ្ដល់សេវាកម្មគឺនៅដដែល និងមានលក្ខណៈល្អដូចនៅក្នុងរដូវកាលក្ដៅដដែល។ ប៉ុន្តែទោះជាយ៉ាងណា យើងសង្កេតឃើញថា ចរន្តភ្ញៀវនៅតែមានទៅលេងកម្សាន្ត ហើយការផ្ដល់សេវាកម្មក៏នៅតែល្អ គ្រាន់តែនៅក្នុងរដូវកាលនេះគឺមានការបញ្ចុះតម្លៃពិសេស ហើយការរៀបចំកញ្ចប់ទេសចរណ៍គឺមានតម្លៃសមរម្យផងដែរ»។

នៅក្នុងឱកាសនេះដែរ ឯកឧត្តម នី ផល្លី បានបញ្ជាក់ដែរថា សម្រាប់បងប្អូនភ្ញៀវជាតិ និងអន្តរជាតិ ដែលមានបំណងចង់ធ្វើដំណើរកម្សាន្តនៅក្នុងរដូវកាលបៃតងនេះ គឺជាបទពិសោធន៍មួយថ្មី បទពិសោធន៍មួយពិសេស ដែលអាចទទួលបានការកម្សាន្ដជាមួយនឹងធម្មជាតិដ៏ស្រស់ត្រកាលបៃតង និងទទួលបានកញ្ចប់តម្លៃនៃការចំណាយតិចជាងមុន ហើយទទួលបានបទពិសោធន៍ល្អមិនចាញ់នៅក្នុងរដូវកាលក្ដៅនោះទេ ក្រោមការរៀបចំយ៉ាងយកចិត្តទុកដាក់ពីសំណាក់ក្រុមហ៊ុនភ្នាក់ងារទេសចរណ៍ដោយផ្ទាល់។

លោកបណ្ឌិត ធួន ស៊ីណាន ប្រធានសមាគមទេសចរណ៍ អាស៊ីប៉ាស៊ីហ្វិក កម្ពុជា បានលើកឡើងឱ្យដឹងថា សម្រាប់កម្មវិធីដំណើរកម្សាន្តក្នុងស្រុកតាមតំបន់សមុទ្រ រដូវកាលបៃតងរបស់សមាគមទេសចរណ៍អាស៊ីប៉ាស៊ីហ្វិក កម្ពុជា នាពេលនេះគឺជាលើកដំបូងដែលផ្តួចផ្តើមដោយសមាគមផ្ទាល់ ក្រោមការគាំទ្រពីសំណាក់ក្រសួងទេសចរណ៍ ជាពិសេសមានការចូលរួមពីបណ្តាក្រុមហ៊ុនភ្នាក់ងារទេសចរណ៍ក្នុងស្រុកមួយចំនួន។

លោកបណ្ឌិតបានបញ្ជាក់ថា ៖

«ក្រោមកិច្ចគាំទ្រ និងជំរុញជួយសម្រួលពីសំណាក់ប្រមុខរាជរដ្ឋាភិបាល ស្ថានភាពនៃវិស័យទេសចរណ៍កម្ពុជានៅមិនទាន់បានវិលត្រឡប់ទៅដូចមុនគ្រាជួបវិបត្តិនៅឡើយនោះទេ ប៉ុន្តែស្ថានការណ៍មានភាពធូរស្រាលជាងមុនច្រើន ជាពិសេសកំណើនទេសចរក្នុងស្រុកតែម្ដង។ ក្នុងឱកាសនេះ ក្នុងនាមខ្ញុំជាប្រធានសមាគម និងជាអ្នកប្រតិបត្តិលើវិស័យនេះផ្ទាល់សូមថ្លែងអំណរគុណដល់ប្រមុខរាជរដ្ឋាភិបាល ដែលលោកតែងខិតខំ និងយកចិត្តទុកដាក់ជួយសម្រួល និងលើកស្ទួយវិស័យទេសចរណ៍តាមរយៈយុទ្ធសាស្ត្រជាច្រើនរូបភាព»។

យ៉ាងណាក៏ដោយ លោក ធួន ស៊ីណាន នៅតែលើកទឹកចិត្តដល់ប្រជាពលរដ្ឋកម្ពុជាដែលជាទេសចរក្នុងស្រុកកាត់បន្ថយការចំណាយធនធាន និងពេលវេលាក្នុងការចេញកម្សាន្តនៅក្រៅប្រទេស ហើយងាកមកចាប់អារម្មណ៍ជាមួយដំណើរកម្សាន្តនៅតាមតំបន់ទេសចរណ៍ជាច្រើនទាំងជាទេសចរណ៍វប្បធម៌ ទេសចរណ៍ធម្មជាតិ ក៏ដូចជាតំបន់ទេសចរណ៍កែច្នៃ ជាពិសេសទស្សនានៅតាមតំបន់កោះ និងឆ្នេរសមុទ្រកម្ពុជា ដែលមានភាពស្រស់ស្អាតជាប់កម្រិតពិភពលោក។

លោក ម៉េត សុជាតិ អគ្គលេខាធិការសមាគមទេសចរណ៍ អាស៊ីប៉ាស៊ីហ្វិក កម្ពុជា ដែលជាអ្នកដឹកនាំកម្មវិធីដំណើរកម្សាន្តក្នុងស្រុកតាមតំបន់សមុទ្រ «រដូវកាលបៃតង» បានប្រាប់ឱ្យដឹងថា សម្រាប់កម្មវិធីលើកដំបូងនេះ មានរយៈពេល ១យប់ ២ថ្ងៃ នៅតាមតំបន់ឆ្នេរសមុទ្រនាទីក្រុងកោះរ៉ុង ខេត្តព្រះសីហនុ។

លោកបានបញ្ជាក់ឱ្យដឹងទៀតថា ៖ ក្នុងរយៈពេល២ថ្ងៃនៃដំណើរកម្សាន្តនេះ ក្រោយពេលជិះទូកឆ្លងសមុទ្រទៅដល់ទីក្រុងកោះរ៉ុង ដែលជាគោលដៅ និងសម្រាកនៅ រីហ៊្សត លើឆ្នេរឡុងសិត ក្រុមភ្ញៀវទេសចរបានបន្តដំណើរដោយការជិះរថយន្តទស្សនាតាមឆ្នេរនានា ដូចជា ឆ្នេរសុខសាន្ត ឆ្នេរ Long Beach មើលថ្ងៃលិច ក៏ដូចជាទស្សានរីហ៊្សតដែលស្ថិតនៅជិតកោះសង្សារ ជាពិសេស មានពិធីទទួលទានអាហារពេលរាត្រី (BBQ Diner) នៅមាត់ឆ្នេរឡុងសិត។ លុះព្រឹកឡើង មានអ្នកខ្លះជួលទូកជិះស្ទូចត្រី ខ្លះជួលម៉ូតូកម្សាន្តតាមភូមិ ខ្លះទស្សនាតាមព្រៃកោងកាង ហើយខ្លះទៀតនៅងូតទឹកសមុទ្រលេងយ៉ាងរីករាយរហូតដល់វេលាកំណត់ដែលត្រូវជិះទូកវិលត្រឡប់មកផែទេសចរណ៍ព្រះសីហនុ ដើម្បីបន្តដំណើរឆ្ពោះទៅរាជធានីភ្នំពេញវិញ។ សូមជម្រាបដែរថា បច្ចុប្បន្ន សមាគមទេសចរណ៍ អាស៊ីប៉ាស៊ីហ្វិច កម្ពុជា បានបើកការិយាល័យផ្តល់ព័ត៌មាន និងកក់សំបុត្រទូក កក់រីហ៊្សត នៅកំពង់ផែទេសចរណ៍ព្រះសីហនុ ដើម្បីផ្តល់ភាពងាយស្រួល និងជួយសម្រួលផ្តល់ព័ត៌មានជូនភ្ញៀវជាតិ និងអន្តរជាតិ៕