ភ្នំពេញ ៖ ជាការពិតដែលថា សេវាធានារ៉ាប់រង គឺជាតម្រូវការបន្ទាប់ដែលមនុស្សនឹងចាប់ផ្ដើមគិត​គូរនៅ​ពេលដែលពួកគេអាចបំពេញតម្រូវការមូលដ្ឋាន (ការហូបចុក ការស្នាក់នៅ) បានគ្រប់គ្រាន់។ ដូច្នេះហើយ នៅក្នុងប្រទេសដែលមានការអភិវឌ្ឍតិចតួច វិស័យធានារ៉ាប់រងក៏មិនទាន់អាចមានលទ្ធភាពរីកលូតលាស់ខ្លាំងនោះដែរ។ មិនទាន់អាចរីកលូតលាស់ព្រោះ ប្រជាជននៅមានចំណូលទាប ម្លោះហើយពួកគេចាំបាច់ត្រូវយកចំណូលនោះទៅបំពេញតម្រូវការចាំបាច់ប្រចាំថ្ងៃ។ ប៉ុន្តែនៅពេលដែលសេដ្ឋកិច្ចប្រទេសមួយចាប់ផ្ដើមរីកចម្រើន ចំណូលរបស់ប្រជាជនក៏មានការកើនឡើង ពួកគេក៏នឹងចាប់ផ្ដើមឈានដល់ដំណាក់កាលដែលត្រូវការសេវាធានារ៉ាប់រងក្នុងជីវភាពរស់នៅប្រចាំថ្ងៃ

ការធានារ៉ាប់នោះអាចរួមមាន ការធានាទៅលើទ្រព្យសម្បត្តិដែលបុគ្គលមាន និងការធានាទៅលើ​សុខភាពរបស់បុគ្គលជាដើម។

ទាក់ទិននឹងចំណុចនេះ ឯកឧត្តម ប៊ូ ច័ន្ទភីរ៉ូ អគ្គនាយកនៃនិយ័តកររ៉ាប់រងកម្ពុជាបានលើកឡើងថា តម្រូវការធានារ៉ាប់រងនេះលេចរូបរាងឡើងដើម្បីដោះស្រាយនូវការបារម្ភរបស់ប្រជាជន។ ការបារម្ភទៅលើអាជីវកម្មដែលពួកគេកំពុងប្រកប ការបារម្ភទៅលើសុខភាពពួកគេដែលជាប្រភពចំណូល និងការបារម្ភទៅលើស្ថានភាពសេដ្ឋកិច្ចគ្រួសារជាដើម។

សម្រាប់កម្ពុជា វិស័យធានារ៉ាប់រងបានកកើតឡើងនៅក្នុងអំឡុងឆ្នាំ១៩៥៦ ប៉ុន្តែក៏ត្រូវបាត់រូបរាងទៅវិញនៅក្នុងអំឡុងទសវត្សរ៍ទី ៧០-៨០ លុះរហូតដល់ចុងទសវត្សរ៍ទី ៨០ ទើបវិស័យនេះបានរើបឡើង​វិញ និងចាប់ផ្ដើមស្គាល់ភាពរីកចម្រើនជាបន្តបន្ទាប់។

ក្នុងឆ្នាំ២០២៣ ភាគទានធានារ៉ាប់រងទៅក្នុងសេដ្ឋកិច្ចកម្ពុជាមានចំនួន ១.១៦% ខណៈដែល​ដង់ស៊ីតេ​ធានារ៉ាប់រងសម្រាប់ប្រជាជនម្នាក់មានចំនួន ២១$។ ចំនួននេះនៅមានទំហំតូចនៅឡើយបើធៀបទៅនឹងប្រទេសជិតខាងដែលមានសេដ្ឋកិច្ចជឿនលឿនជាងកម្ពុជា។ ដូច្នេះ ដើម្បីរួមចំណែកកាន់តែច្រើនទៅក្នុងសេដ្ឋកិច្ចកម្ពុជា និយ័តករធានារ៉ាប់រងកម្ពុជាបានលើកទិសដៅឈានទៅសម្រេចបាននូវភាគទានធានារ៉ាប់រងទៅក្នុងសេដ្ឋកិច្ចចំនួន ៥.៥% ជាមួយនឹង​ដង់ស៊ីតេ​ធានារ៉ាប់រងសម្រាប់ប្រជាជនម្នាក់មានចំនួន ១៣៥$ នៅត្រឹមឆ្នាំ២០៣០ខាងមុខ។

ជាមួយគ្នានេះ ដើម្បីសម្រេចបាននូវគោលដៅនេះផងដែរ ការកសាងទំនុកចិត្តរវាងប្រជាជនកម្ពុជាចំពោះវិស័យគឺជាអាទិភាពសំខាន់មួយ ដែលបច្ចុប្បន្ននេះទាំងនិយ័តករ ទាំងក្រុមហ៊ុនធានារ៉ាប់រងផ្ទាល់ កំពុងផ្ដោតការយកចិត្តទុកដាក់។

គួរបញ្ជាក់ថា បច្ចុប្បន្ននេះ កម្ពុជាមានក្រុមហ៊ុនធានារ៉ាប់រងដែលកំពុងប្រតិបត្តិការសរុបចំនួន ៤០ ដោយបែងចែកជាប្រភេទផ្សេងៗដូចជា៖ ក្រុមហ៊ុនភ្នាក់ងារធានារ៉ាប់រង ក្រុមហ៊ុនជើងសាធានារ៉ាប់រង ក្រុមហ៊ុនធានារ៉ាប់រងទូទៅ ក្រុមហ៊ុនធានារ៉ាប់រងអាយុជីវិត ក្រុមហ៊ុនធានារ៉ាប់រងខ្នាតតូច និងក្រុមហ៊ុនធានារ៉ាប់រងបន្ត៕