បច្ចុប្បន្ននេះ កសិករដែលមានដីស្រែអាចមានជម្រើសច្រើនក្នុងការកែច្នៃដីរបស់ខ្លួនដើម្បីបង្កើនចំណូលក្រៅពីការធ្វើស្រែតែមួយមុខ ដូចជាការច្នៃដីទៅជាស្រះសម្រាប់ចិញ្ចឹមបង្កង ឬចិញ្ចឹមត្រីជាដើម។ ជាក់ស្ដែង កសិកររស់ក្នុងនៅខេត្តសៀមរាបមួយរូបបានកែប្រែដីស្រែរបស់ខ្លួនមកចិញ្ចឹមត្រីក្រាញ់ ហើយទទួលបានទិន្នផលល្អ និងមានទីផ្សារខ្ពស់ក្នុងតំបន់។

លោក ឆន លី ជាអ្នកចិញ្ចឹមត្រីក្រាញ់នៅ ឃុំសំបួរ ស្រុកក្រឡាញ់ ខេត្តសៀមរាបបានមានប្រសាសន៍ថា ៖

«ខ្ញុំចិញ្ចឹមត្រីក្រាញ់ដោយសារ ក្រៅពីធ្វើស្រែ យើងចង់សាកធ្វើវារីប្បកម្មបន្ថែមទៀតដើម្បីរកចំណូលបន្ថែមចូលគ្រួសារ ហើយពេលចិញ្ចឹមត្រីក្រាញ់ឃើញថាវាមានទីផ្សារល្អ ចាប់លក់ឱ្យអ្នកក្នុងភូមិស្ទើរមិនទាន់»។

លោកបន្តថា សម្រាប់ស្រះចិញ្ចឹមត្រីនេះ គឺកែច្នៃពីដីស្រែមកធ្វើជាស្រះ ហើយការចិញ្ចឹមនេះទៀតសោត គឺចិញ្ចឹមបែបធម្មជាតិ មិនប្រើប្រាស់ថ្នាំគីមីឡើយ សូម្បីតែចំណីក៏ប្រើជាប្រភេទចកអាស៊ូឡាប្រមាណ៩០ភាគរយ ហើយការប្រើចកអាស៊ូឡានេះក៏មានផលចំណេញច្រើន កាត់បន្ថយចំណាយ ជាពិសេសគឺសម្បូរសារធាតុល្អៗធ្វើឲ្យត្រីឆាប់ធំ និ​ងធន់នឹងជំងឺផ្សេងៗ។

ចំពោះពូជត្រីក្រាញ់នេះ វាស្រួលចិញ្ចឹម ដែលចំណាយពេលត្រឹមជាង ២-៣ខែគឺអាចចាប់លក់បាន ហើយតម្លៃក្នុងទីផ្សារគេអាចលក់បាន ១ម៉ឺនរៀលក្នុងមួយគីឡូក្រាម ដោយជាធម្មតាលោកអាចបង់សំណាញ់ចាប់ត្រីបានប្រមាណ ២០គីឡូក្រាមក្នុងមួយថ្ងៃ។

លោកបានបញ្ជាក់ថា ៖

«យើងដាក់ដំបូងប្រមាណ ១០ម៉ឺនក្បាល ដោយក្នុងមួយម៉ែត្រការេដាក់បានតែ ១០ក្បាលប៉ុណ្ណោះ ដោយសារតែកត្តាដើមទុន និងចំណី ប៉ុន្តែបើមានលទ្ធភាពផ្ដល់ចំណីបានគ្រាប់គ្រាន់គេអាចបានដល់ទៅ ១៥ – ៣០ក្បាលក្នុងមួយម៉ែត្រការេ។ ដោយឡែក រយៈពេលចិញ្ចឹមប្រមាណ ៣ខែ ដែលអាចធំយឺតជាងត្រីស៊ីចំណីបន្តិចតែកាត់បន្ថយចំណាយច្រើន។ ចំណែករសជាតិរបស់សាច់ត្រីឆ្ងាញ់ ឬអត់ គឺអាស្រ័យទៅលើទឹក ថាតើមានកម្រិតអំបិល កម្រិត PH កម្រិតអុកស៊ីសែនប៉ុណ្ណា មិនពាក់ព័ន្ធនឹងទីតាំង ឬកន្លែងចិញ្ចឹមដូចជាក្នុងតង់ ក្នុងលូ ក្នុងស្រះនោះទេ»។

ជាចុងក្រោយ ម្ចាស់ស្រះចិញ្ចឹមត្រីខាងលើបានផ្តល់ជាទស្សនៈទានថា សម្រាប់អ្នកដែលចង់ចិញ្ចឹមត្រីប្រភេទនេះ គួរគិតគូរពីផ្នែកចំណីជាមុនសិន ដូចជាការដាំចកអាស៊ូឡា ដែលធានាបាននូវចំណីត្រីរួចជាស្រេច ដូចជាការដាំចកអាសូឡាជាមុន លុះពេលចាប់ផ្តើមចិញ្ចឹមគឺមានចំណីបែបធម្មជាតិមួយផ្នែក ដែលវិធីសាស្ត្រនេះអាចជួយកាត់បន្ថយចំណាយបានមួយផ្នែកធំ៕