សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វេទិការ និងពិព័រណ៍កសិកម្មឆ្នាំ២០២៦ ដែលហៅកាត់ថា CAFE26 បានបិទបញ្ចប់ទៅដោយរលូន និងទទួលបានផ្លែផ្កាគួរជាទីមោទន កាលពីល្ងាចថ្ងៃទី២៥ ខែតុលា ឆ្នាំ២០២៦។ ប៉ុន្ដែរដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ទំនាក់ទំនង ភាពជាដៃគូ និងឱកាសដែលភាគីពាក់ព័ន្ធបានបង្កើតឡើងនៅក្នុងព្រឹត្ដិកាណ៍នេះ នៅតែបន្តទៅមុខជាមួយនឹងកិច្ចព្រមព្រៀង ការវិនិយោគ និងដំណោះស្រាយថ្មីៗ។
ថ្លែងក្នុងពិធីបិទកាលពីល្ងាចថ្ងៃទី២៥ ខែតុលា នៅសាលសន្និសីទ និងពិព័រណ៍កោះពេជ្រ ឯកឧត្ដម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណដល់បងប្អូនប្រជាកសិករដែលបានចំណាយពេលចូលរួមយ៉ាងច្រើនកុះករ បង្កើតទៅជាព្រឹត្តិការណ៍ដ៏ធំលើសពីឆ្នាំ២០២៥ ដែលរៀបចំឡើងជាលើកដំបូងទៅទៀត។ ឯកឧត្ដមសង្ឃឹមថា ព្រឹត្តិការណ៍ CAFE26 នឹងធ្វើនៅឆ្នាំ២០២៧ បន្ដទៀត ដើម្បីនាំមកនូវផលប្រយោជន៍ជាច្រើនសម្រាប់កសិករ ដូចជា ទទួលបានចំណេះដឹងថ្មីៗ ការសាកល្បងដោយផ្ទាល់ជាមួយបច្ចេកវិទ្យាកសិកម្មទំនើបៗ ផ្សាភ្ជាប់ទៅទីផ្សារ ជួបអ្នកផ្តល់សេវាកម្ម និងធុរជននានា។
ជាមួយគ្នានេះ តំណាងអង្គការស្បៀង និងកសិកម្ម នៃសហប្រជាជាតិ ហៅកាត់ថា FAO ប្រចាំកម្ពុជា អ្នកស្រី Rebekah Bell បានមានប្រសាសន៍ទទួលស្គាល់ថា CAFE26 ពិតជាបានបើកឱកាសជួបគ្នា និងបង្កើនចំណេះដឹងកសិកម្មថ្មីៗ រវាងអ្នកធ្វើគោលនយោបាយ អ្នកវិនិយោគ និងតភ្ជាប់ទៅកសិករដោយផ្ទាល់។
អ្នកស្រីបញ្ជាក់ថា ចំពោះអង្គការ FAO បានមើលឃើញថា CAFE26 គឺជាស្មារតីបង្កើតគំនិតផ្ដួចផ្ដើមរួមក្នុងការធ្វើការងារជាធ្លុងមួយជាមួយរដ្ឋាភិបាលកម្ពុជា ដៃគូអភិវឌ្ឍន៍ អ្នកវិនិយោគ និងសហគមន៍កសិកម្ម ដើម្បីពន្លឿនបដិវដ្ដកម្មកសិចំណីអាហារ។ ទន្ទឹមគ្នានេះ FAO ក៏បន្ដជួយរាជរដ្ឋាភិបាល តាមរយៈក្រសួងកសិកម្ម ដើម្បីបង្កើតភាពធន់លើវិស័យកសិកម្មកម្ពុជា និងសុវត្ថិភាពស្បៀងអាហារពិភពលោកនៅកម្ពុជា។
យោងតាមរបាយការណ៍របស់ឯកឧត្ដម ប្រាក់ ដាវីដ ប្រធានគណៈកម្មការរៀបចំព្រឹត្ដិកាណ៍ CAFE26 ឱ្យដឹងថា រយៈពេល ៣ថ្ងៃ នៃព្រឹត្ដិការណ៍ CAFE26 មានអ្នកចូលទស្សនាស្ដង់ និងជាវសម្ភារៈផ្សេងៗចំនួន ៣៥ ០០០នាក់។ តួលេខនេះ បានកើនឡើង ១០ ០០០នាក់ បើធៀបនឹងរយៈពេលដូចគ្នា នៃព្រឹត្ដិការលើកទី១ ឆ្នាំ២០២៥។ តាមរយៈសកម្មភាពចូលទស្សនាស្ដង់ និងទិញម្ហូបអាហារ សម្ភារៈកសិកម្មផ្សេងៗ សរុបទាំង ៤៤៦ស្ដង់ បានបង្កើតជាចរន្ដសេដ្ឋកិច្ចប្រមាណ ១,៨ លានដុល្លារសហរដ្ឋអាមេរិក។
ដោយឡែក វេទិកា CAFE26 ត្រូវបានឯកឧត្ដមរាយការណ៍ថា មានអ្នកចូលរួមចំនួន ២ ៥០០នាក់ ក្នុងនោះមានភ្ញៀវអន្ដរជាតិដែលត្រូវបានអញ្ជើញមកពីប្រទេសចំនួន ១០ ដោយមិនរាប់បញ្ចូលចំនួនធុរជន និងគណៈប្រតិភូអន្ដរជាតិដែលកំពុងស្ថិតនៅក្នុងប្រទេសកម្ពុជាស្រាប់។ ក្នុងនោះមានវាគ្មិនជាតិ អន្ដរជាតិសរុប ១៤១រូប បានចូលរួមធ្វើបទបង្ហាញស្ដីពីការវិនិយោគកសិកម្ម នវានុវត្ដន៍ដល់យុវជន កសិករជាស្ដ្រី និងការចែករំលែកបទពិសោធន៍ ចំណេះដឹងសហគមន៍កសិកម្មទំនើបជាច្រើនវគ្គ។
សូមរំលឹកជូនថា វេទិកា និងពិព័រណ៍កសិកម្មឆ្នាំ២០២៦ បានរៀបចំឡើងរយៈពេល ៣ថ្ងៃពេញ ចាប់ពីថ្ងៃទី២៣ ដល់២៥ ខែតុលា ឆ្នាំ២០២៦ ដែលរៀបចំឡើងដោយក្រសួងកសិកម្ម អង្គការ FAO និងអង្គការ Hand in Hand ដោយសហការគាំទ្រពីក្រសួង ស្ថាប័ន ដៃគូអភិវឌ្ឍន៍ ធនាគារ និងដៃគូក្នុងវិស័យឯកជនចំនួន ៣៩ ស្ថាប័ន៕
Account
Security
Favourite Content