ននោង ជារុក្ខជាតិទ្រើង ក៏ដូចជាបន្លែមួយប្រភេទដែលបងប្អូនប្រជាជនខ្មែរនិយមទទួលទាន ជាពិសេសអាចច្នៃចម្អិនជាម្ហូបបានច្រើនមុខដ៏មានឱជារសឆ្ងាញ់ពិសា។ ជាមួយគ្នានេះ ដើម្បីដាំននោងឱ្យបានជោគជ័យ កសិករត្រូវដឹងពីបច្ចេកទេសមួយចំនួនរាប់ចាប់តាំងពីការរៀបចំដី ការដាំដុះ ការថែទាំ និងការប្រមូលផល។

ជំហានដំបូងមុននឹងចាប់ផ្ដើមដាំដំណាំននោង កសិករត្រូវរៀបចំដីសម្អាតដីឱ្យស្អាត បន្ទាប់មកភ្ជួររាស់ដីឱ្យបានម៉ដ្ឋល្អ ហើយហាលដីពី ១០-១៥ថ្ងៃ ទើបគេភ្ជួរដីម្ដងទៀតជម្រៅពី ១៥-២០សង់ទីម៉ែត្រ។ បន្ទាប់មក គេត្រូវលើករងដោយមានទទឹង ១ម៉ែត្រ ឯបណ្ដោយអាស្រ័យទៅតាមប្រវែងដី និងកម្ពស់រងចន្លោះ ២-៣តឹកនៅរដូវប្រាំង ឬ ៣-៥តឹកនៅរដូវវស្សា។

បន្ទាប់ពីលើករងហើយ គេត្រូវដាក់ជីលាមកសត្វ ឬជីកំប៉ុស្តិ៍ ពី ១-២គីឡូក្រាមសម្រាប់ផ្ទៃដី ១ម៉ែត្រការ៉ កប់ទ្រាប់បាតរងដោយច្របល់វាឱ្យសព្វល្អជាមួយដីរង ហើយធ្វើការគ្របរងដោយថង់ប្លាស្ទិក ឬដោយប្រើចំបើង ដើម្បីទប់ស្កាត់ការហូរច្រោះរង និងការពារសំណើមដី។ ក្រៅពីរងសម្រាប់ដាំ កសិករក៏ត្រូវធ្វើរោងបណ្ដុះកូនននោងដើម្បីឱ្យគ្រាប់ដុះបានល្អ កាត់បន្ថយការរលួយកូន និងការពារកូនដំណាំពីការឆ្លងជំងឺ ក៏ដូចជាការបំផ្លាញពីសត្វចង្រៃ។ សម្រាប់ទំហំរោង គេអាចធ្វើដំបូលកម្ពស់ ១.៨-២ម៉ែត្រ ដើម្បីងាយចេញចូល និងការពារកម្ដៅ ឯកម្ពស់រានដំណាំពី ០.៨-១ម៉ែត្រ និងទទឹងពី ០.៨-១ម៉ែត្រ។

ចំពោះការលាយដីសម្រាប់បណ្ដុះកូនននោង គេត្រូវយកដីចំនួន ២ភាគ លាយជាមួយជីលាមកគោ ១ភាគ ផេះអង្កាម ៤-៦ភាគ ឬអាចលាយជាមួយមម៉ោគ ឬស្រកីដូងម៉ដ្ឋ ១ភាគ។ យកល្បាយដែលច្របល់ហើយ ទៅលីងឱ្យក្ដៅសព្វល្អ ទុកឱ្យត្រជាក់ និងច្រកចូលកន្ទោង ឬថាសបណ្ដុះ។

ពាក់ព័ន្ធនឹងការបណ្ដុះគ្រាប់វិញ គេអាចធ្វើបានពីររៀបគឺ ការបណ្ដុះគ្រាប់ជាមុន និងការដាក់គ្រាប់បណ្ដុះដោយផ្ទាល់ក្នុងថាសបណ្ដុះ តែវិធីទាំងពីរនេះគេត្រូវយកគ្រាប់ននោងដែលផ្អាប់ហើយ ឬមិនទាន់ផ្អាប់ចំនួន ១គ្រាប់ដាក់បណ្ដុះក្នុងប្រឡោះថាស និងស្រោចទឹកព្រឹកល្ងាចឱ្យជោកចៀសវាងគ្រាប់មិនដុះ។

ចំណែកការដាំកូនននោងវិញ គេត្រូវរើសយកកូនណាដែលមានដើមរឹកមាំល្អ អាយុពី ៧-១២ថ្ងៃ ហើយត្រូវដាក់វាហាលពី ២-៣ថ្ងៃដើម្បីពង្រឹងកូនមុនពេលដាំ។ មុនពេលដាំ គេត្រូវបញ្ចូលទឹកតាមរងសម្រាប់រងគ្របថង់ប្លាស្ទិក និងស្រោចទឹកលើរងគ្របចំបើង រួចបន្ថែមជីនៅតាមរណ្ដៅកូនដំណាំហើយច្របល់ឱ្យសព្វដោយទុករយៈពេលពី ៦-៧ថ្ងៃ ហើយស្រោចទឹក ៥-៦ដងមុនពេលដាំ ហើយគេគួរដាក់ដាំកូនននោងនៅពេលល្ងាចមេឃត្រជាក់ល្អ។

សម្រាប់ការថែទាំដំណាំននោងក៏មិនខុសពីការថែទាំដំណាំផ្សេងទៀតដែរ ដែលកសិករត្រូវស្រោចទឹក ដាក់ជីឱ្យបានទៀតទាត់ដើម្បីឱ្យដំណាំផ្ដល់ផ្លែផ្លាបានច្រើន។ ឯការដាក់ជីក៏អាស្រ័យលើប្រភេទដីផងដែរ ដូចជាដីល្បាយនិងដីខ្សាច់ត្រូវដាក់ជីរៀងរាល់ ៧ថ្ងៃម្ដង តែចំពោះដីខ្សាច់ត្រូវដាក់ជីច្រើនជាងដីល្បាយចំនួន ២ភាគ៣ ឬពាក់កណ្ដាល។

ការដាក់ជីនេះទៀតសោត ដើម្បីឱ្យដំណាំស្រូបបានច្រើន គេត្រូវដាក់ជីភ្លាមស្រោចទឹកភ្លាម ហើយការដាក់ជីបំប៉នត្រូវកប់ក្នុងរន្ធសងខាងរណ្ដៅ ចម្ងាយពីគល់ដំណាំ ៨-២៥សង់ទីម៉ែត្រទៅតាមអាយុដំណាំ។ ហើយការស្រោចទឹក គេត្រូវស្រោចព្រឹកល្ងាចឱ្យបានទៀងទាត់ ចៀសវាងដីស្ងួតធ្វើឱ្យដំណាំលូតលាស់មិនបានល្អ។ 

បន្ទាប់ពីដំាំបាន ២៣-២៥ថ្ងៃ ដើមននោងចាប់ផ្ដើមបែកខ្នែងចេញពីដើមមេ ដែលគេត្រូវកាត់ខ្នែងននោងក្រោមថ្នាំងទី១០​ ចោល ដើម្បីឱ្យដំណាំទទួលបានជីជាតិគ្រាប់គ្រាន់ លូតលាស់បានលឿន។ ថែមលើនេះ គេក៏ត្រូវសម្អាតស្មៅឱ្យបានស្អាត ទោះបីជារងគ្របប្លាស្ទិក ឬចំបើងក៏ដោយ គេត្រូវដកស្មៅនៅតាមចន្លោះរងចេញ ព្រោះវាអាចជាជម្រកសត្វចង្រៃបំផ្លាញដំណាំ។ ទន្ទឹមនឹងនេះ ដំណាំននោងក៏អាចជួបប្រទះនឹងជំងឺ ក៏ដូចជាកត្តាចង្រៃផងដែរដូចជា ជំងឺទុំលឿងស្លឹក ជំងឺខ្លោចចុងស្លឹករាងត្រីកោណ និងសត្វបំផ្លាញដូចជា ដង្កូវមូលស្លឹក និងចៃជាដើម​ ដែលសកិករអាចការពារនិងកម្ចាត់បានដោយការដកសម្អាត ថែទាំអនាម័យ ឬប្រើថ្នាំគីមីក៏បាន៕