សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្ញៀវទេសចរកម្ពុជា បានឈរនៅលំដាប់ទី ៥ ក្នុងចំណោមទេសចរបរទេសដែលបានចូលទស្សនាប្រទេសវៀតណាមច្រើនជាងគេបំផុតក្នុងរយៈពេល ៥ ខែដំបូងនៃឆ្នាំ ២០២៦ នេះ ពោលគឺកើនឡើង ៤០ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមការចុះផ្សាយរបស់សារព័ត៌មានវៀតណាម VN Express។
សន្ទុះនេះបន្ទាប់ពីប្រទេសកម្ពុជាត្រូវគេដឹងថា បានរងការបង្កជម្លោះពីប្រទេសថៃ។ ហើយប្រទេសជិតខាងកម្ពុជាមួយនេះបានបិទព្រំដែនគោកទាំងអស់ជាមួយកម្ពុជា ជាឯកតោភាគី។
នៅមិនទាន់មានរបាយការណ៍ផ្លូវការណាមួយពីក្រសួងទេសចរណ៍កម្ពុជានៅឡើយស្តីពីទេសចរធ្វើដំណើរកម្សាន្តទៅកាន់ប្រទសវៀតណាមនោះ។ ប៉ុន្តែ លោកជំទាវ ហ៊ុន ដានី អ្នកនាំពាក្យក្រសួងទេសចរណ៍ បានកត់សម្គាល់ពីសន្ទុះទេសចរកម្ពុជា ទៅប្រទេសវៀតណាម មានការកើនឡើង ក្រោយពីជម្លោះព្រំដែនរវាងកម្ពុជា និងថៃ។
អ្នកនាំពាក្យក្រសួងទេសចរណ៍ បញ្ជាក់ថា កត្តាជាតិនិយមដែលកើតឡើងពីជម្លោះព្រំដែនខ្មែរ-ថៃ និងការបិទច្រកព្រំដែនជាឯកតោភាគីរបស់ថៃ បានធ្វើឲ្យទេសចរខ្មែរ បង្វែទិសដៅពីប្រទេសថៃ ហូរចាក់ទៅវៀតណាម ច្រើនជាងមុន។ ម្យ៉ាងវិញទៀត វៀតណាម គឺជាប្រទេសក្នុងតំបន់ជិតខាងគ្នា ងាយធ្វើដំណើរទាំងផ្លូវគោក ផ្លូវទឹក និងផ្លូវអាកាស ដែលធ្វើឲ្យចរន្តនៃការចំណាយមិនសូវខ្ពស់ដូចប្រទេសដទៃ។
កំណើនទេសចរកម្ពុជា ទៅប្រទេសវៀតណាម បានបង្ហាញពីសក្ដានុពលខ្លាំងនៃតម្រូវការការធ្វើដំណើរក្នុងតំបន់ ស្របពេលដែលប្រទេសជិតខាងទាំងពីរនេះបានពង្រីកទំនាក់ទំនងពាណិជ្ជកម្មជាមួយគ្នា។ ទេសចរកម្ពុជា ដែលទៅប្រទេសវៀតណាម ភាគច្រើន ជាទេសចរណ៍ដំណើរកម្សាន្តជាលក្ខណៈគ្រួសារ ការដើរទិញឥវ៉ាន់ និងការផ្លាស់ប្តូរអាជីវកម្ម។ នេះបើយោងតាមសារព័ត៌មាន VN Express ដែលចេញផ្សាយនៅថ្ងៃចន្ទ ទី ៨ ខែមិថុនា នេះ។
លោក Pham Anh Vu អគ្គនាយករងនៃក្រុមហ៊ុន Viet Tourism Media JSC បាននិយាយថា ប្រទេសកម្ពុជានៅតែជាទីផ្សារអន្តរជាតិដែលមានស្ថិរភាព ហើយភ្ញៀវទេសចរកម្ពុជា ធ្វើដំណើរទៅកាន់ប្រទេសវៀតណាម មិនត្រឹមតែសម្រាប់ការកម្សាន្ត និងទស្សនា ប៉ុណ្ណោះទេ ថែមទាំងសម្រាប់ការដើរទិញឥវ៉ាន់ ការសួរសុខទុក្ខសាច់ញាតិ ការព្យាបាល និងពិនិត្យសុខភាព ផងដែរ។
កិច្ចសហប្រតិបត្តិការទេសចរណ៍រវាងវៀតណាម និងកម្ពុជា បានទទួលលទ្ធផលជាវិជ្ជមាន ក្នុងប៉ុន្មានឆ្នាំចុងក្រោយនេះ ដែលគាំទ្រដោយការតភ្ជាប់ការដឹកជញ្ជូនកាន់តែងាយស្រួល។ លោក Pham Anh Vu យល់ឃើញថា កម្ពុជានឹងអាចក្លាយជាប្រភពចំណូលទេសចរណ៍ដ៏គួរឱ្យទុកចិត្ត និងនិរន្តរភាពបំផុតមួយសម្រាប់ប្រទេសវៀតណាម ក្នុងរយៈពេលប៉ុន្មានឆ្នាំខាងមុខនេះ។
យោងតាម VN Express វៀតណាម បានស្វាគមន៍ភ្ញៀវទេសចរណ៍ពីកម្ពុជា ជាង ៤០ ម៉ឺន ២ ពាន់នាក់ ក្នុងឆ្នាំ ២០២៣ កើនដល់ជាង ៤៧ ម៉ឺន ៤ ពាន់នាក់ ក្នុងឆ្នាំ ២០២៤ និងបានឈានដល់ជាង ៦៨ ម៉ឺន ៧ពាន់នាក់ ក្នុងឆ្នាំ ២០២៥។ ប្រទេសវៀតណាម បានដាក់ប្រទេសកម្ពុជា ក្នុងចំណោមទីផ្សារទេសចរណ៍ដ៏សំខាន់បំផុតរបស់ខ្លួន៕ អត្ថបទ៖ ខន ណារី AMS
Account
Security
Favourite Content