ភ្នំពេញ ៖ នាព្រឹកថ្ងៃទី ១៣ ដល់ថ្ងៃទី ១៦ ខែធ្នូ ឆ្នាំ២០២៤ ក្រសួងពាណិជ្ជកម្ម តាមរយៈ​នាយកដ្ឋានកិច្ចការ​ពិព័រណ៍បានរៀបចំនូវ «ពិព័រណ៍ពាណិជ្ជកម្មកម្ពុជា(CTE)» ក្រោមអធិបតីភាពដ៏ខ្ពង់ខ្ពស់របស់​សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ថ្លែងក្នុងឱកាសបើកពិព័រណ៍នាព្រឹកថ្ងៃទី ១៣ ខែធ្នូ នេះ សម្ដេចធិបតី ហ៊ុន ម៉ាណែត បានមានប្រសាសន៍កោតសរសើរ និងលើកទឹកចិត្តឱ្យក្រសួងពាណិជ្ជកម្មបន្តបេសកកម្មធ្វើការបន្ថែមទៀតដើម្បីជំរុញការនាំចេញ​ផលិតផលខ្មែរទៅកាន់ទីផ្សារក្រៅប្រទេសឱ្យបានកាន់តែច្រើន។

ជាមួយគ្នានេះ ដើម្បីអាចឈានទៅសម្រេចនូវគោលដៅនៃការនាំចេញ សម្ដេចបានរំលេចអំពីភាពចាំបាច់​នៅក្នុងការ​រៀបចំស្តង់ដារផលិតផលក្នុងស្រុកឱ្យកាន់តែប្រសើរ។ ទន្ទឹមនឹងនេះ ឌីជីថលក៏ជាទំនោរថ្មីមួយដែលក្រសួងអាចប្រើប្រាស់ដើម្បីជាប្រយោជន៍ក្នុងការជំរុញការនាំចេញ ជាពិសេស ការសម្រួលនិតិវិធីសម្រាប់នាំចេញជាដើម។

ក្នុងឱកាសដដែលនេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានឱ្យដឹងថា​ បេសកកម្ម​ចម្បងរបស់ពិព័រណ៍នេះគឺដើម្បីជំរុញសកម្មភាពពាណិជ្ជកម្មកម្ពុជា និងធ្វើឱ្យកាន់តែប្រសើរឡើង​នូវបរិយាកាស និងឱកាសធុរកិច្ច ព្រមទាំងជំរុញសកម្មភាពនាំចេញ នាំចូល និងការផ្សារភ្ជាប់ទំនាក់ទំនង​ពាណិជ្ជកម្ម ការកសាងបណ្ដាញរវាងអ្នកចូលរួមតាំងពិព័រណ៍ក្នុងស្រុក និងអន្តរជាតិ ព្រមទាំងអ្នក​ចូលរួ​មទស្សនាពិព័រណ៍ផងដែរ។

ពិព័រណ៍នេះ ក្រៅពីមានការតាំងបង្ហាញផលិតផល និងសេវាកម្មដ៏សម្បូរបែប ក៏ជាវេទិកាសម្រាប់​ពង្រឹង​ទំនាក់ទំនងពាណិជ្ជកម្មរវាងកម្ពុជាជាមួយទីផ្សារសកល និងការតាំងបង្ហាញផលិតផលរបស់​ដៃគូ​អន្តរជាតិរបស់យើងផងដែរ។

បើតាមការលើកឡើងរបស់លោកជំទាវ ក្រសួងពាណិជ្ជកម្មមានសុទិដ្ឋិនិយម និងជឿជាក់ថា ពិព័រណ៍ CTE នៅឆ្នាំនេះ នឹងក្លាយជាបទពិសោធន៍ដ៏អស្ចារ្យមិនអាចបំភ្លេចបាន ដែលមិនត្រឹមតែសម្រាប់អ្នកទស្សនា​ដែលចូលរួមក្នុងព្រឹត្តិការណ៍ជាច្រើននាក់ប៉ុណ្ណោះទេ ប៉ុន្តែក៏សម្រាប់បណ្តាដៃ​គូពាណិជ្ជកម្ម​ដែលនឹងអាចទទួលបានលទ្ធផលជាទីគាប់ចិត្តតាមរយៈការភ្ជាប់ទំនាក់ទំនងជាមួយពាណិជ្ជករមកពីជុំវិញពិភពលោក។

យ៉ាងណាមិញ ពិព័រណ៍ពាណិជ្ជកម្មកម្ពុជាឆ្នាំ២០២៤ នេះធ្វើឡើងក្រោមមូលបទ “យុគសម័យថ្មី​នៃពាណិជ្ជកម្ម”តំណាងឱ្យការស្តារឡើងវិញ និងការរីកចម្រើននៃពាណិជ្ជកម្មរបស់កម្ពុជា ដែលបង្ហាញពីសករាជថ្មីនៃការអភិវឌ្ឍសេដ្ឋកិច្ច ការចូលរួមជាសកល និងការពង្រឹងភាពប្រកួតប្រជែង។ ពាក្យ “យុគ សម័យថ្មី”ឆ្លុះបញ្ចាំងពីវិធីសាស្ត្រដ៏សកម្ម និងប្រកបដោយថាមវន្តនៃបេសកកម្ម​ពាណិជ្ជកម្ម​បច្ចុប្បន្ន និងបង្ហាញពីការប្តេជ្ញាចិត្តរបស់កម្ពុជាក្នុងការសម្រេចឱ្យបាននូវចក្ខុវិស័យ​ឆ្នាំ២០៣០។

គួររំលឹកថា «ពិព័រណ៍ពាណិជ្ជកម្មកម្ពុជា(CTE)» ដើមឡើយមានឈ្មោះថា «ពិព័រណ៍ផលិតផលខ្មែរ និងទំនិញ នាំចេញ-នាំចូល (CIEGE)» ដែលបានប្រារព្ធចាប់តាំងពីឆ្នាំ២០០៦មក និងបានរៀបចំ​ឡើងដោយជោគជ័យ ចំនួន១៦លើកមកហើយ។

បើតាមក្រសួងពាណិជ្ជកម្ម ការផ្លាស់ប្តូរ ឈ្មោះពិព័រណ៍CIEGE ក្នុងគោល​បំណង​ធ្វើឱ្យឈ្មោះ​ពិព័រណ៍​នេះ កាន់តែមានភាពសាមញ្ញ ឆ្លុះបញ្ចាំងពីគោលគំនិត នៃឧត្តមភាព និងប្រកបដោយភាព​ទាក់ទាញ​ក្នុង ទីផ្សារសម័យថ្មី ដែលមានភាពរស់រវើក និងការយកចិត្តទុកដាក់លើ គុណភាពខ្ពស់ និងភាព​សាមញ្ញ៕