បរទេស ៖ ស្ថិតនៅក្នុងស្ថានការណ៍នៃភ្លើងសង្គ្រាមនៅមិនទាន់រលត់នៅឡើយ រដ្ឋបាលរបស់លោក ដូណាល់ ត្រាំ កំពុងរៀបចំផែនការតាមរយៈការដាក់ចេញនូវវិធានការសេដ្ឋកិច្ចយ៉ាងតឹងរ៉ឹងបំផុតដែលមិនធ្លាប់មានដើម្បីបង្កើនសម្ពាធលើអ៊ីរ៉ង់ ខណៈអ្នកជំនាញបានព្យាករណ៍ពីជម្រើសមួយចំនួនដែលអាចនឹងដាក់ទៅលើសេដ្ឋកិច្ចអ៊ីរ៉ង់។

កាលពីថ្ងៃសុក្រ ចុងសប្ដាហ៍កន្លងទៅនេះ ប្រធានាធិបតីអាម៉េរិក លោក Donald Trump បានបង្ហាញពីការប្តេជ្ញាចិត្តយ៉ាងខ្ពស់ទៅលើការវាយប្រហារសេដ្ឋកិច្ចអ៊ីរ៉ង់ឱ្យធ្ងន់ធ្ងរ ខណៈដែលរដ្ឋមន្ត្រីក្រសួងរតនាគារ លោក Scott Bessent បានប្រកាសថា វ៉ាស៊ីនតោន នឹងដាក់ចេញនូវវិធានការប្រឆាំងនឹងក្រុងតេអេរ៉ង់ ឲ្យបានយ៉ាងឆាប់រហ័សបំផុតនៅសប្តាហ៍នេះ។

គួរកត់សម្គាល់ដែរថា ទាំងអាម៉េរិក អង្គការសហប្រជាជាតិ និងសហភាពអឺរ៉ុប បានអនុវត្តការដាក់ទណ្ឌកម្មលើការហាមឃាត់ពាណិជ្ជកម្ម និងការបង្កកទ្រព្យសម្បត្តិរបស់អ៊ីរ៉ង់ចាប់តាំងពីចុងទសវត្សរ៍ឆ្នាំ ១៩៧០ មកម្ល៉េះ ពាក់ព័ន្ធនឹងកម្មវិធីនុយក្លេអ៊ែរ ការរំលោភសិទ្ធិមនុស្ស និងការគាំទ្រក្រុមប្រដាប់អាវុធ។ ដោយឡែក ចាប់តាំងពីផ្ទុះសង្គ្រាមនៅមជ្ឈិមបូព៌ានាថ្ងៃទី២៨ ខែកុម្ភៈ ឆ្នាំ២០២៦ មក វ៉ាស៊ីនតោនបានបន្ថែមទណ្ឌកម្មលើផ្នែកនាវាចរណ៍ ថាមពល និងហិរញ្ញវត្ថុ ព្រមទាំងបានធ្វើសកម្មភាពបិទផ្លូវទឹកទៀតផង។ ការិយាល័យត្រួតពិនិត្យទ្រព្យសម្បត្តិបរទេស (OFAC) របស់ក្រសួងរតនាគារអាមេរិក បានបង្ហាញថា អាម៉េរិក បានដាក់ទណ្ឌកម្មលើបុគ្គលដែលមានឥទ្ធិពល រួមទាំងនាវា និងយន្តហោះសរុបជាង ១ ០០០ ករណី ចាប់តាំងពីលោក ត្រាំ បានចូលកាន់តំណែងជាលើកទីពីរ។ វិធានការនាពេលថ្មីៗនេះបានកំណត់គោលដៅលើក្រុមនាវាដឹកប្រេងសម្ងាត់របស់អ៊ីរ៉ង់ ក្រុមហ៊ុនធានារ៉ាប់រងនាវាចរណ៍ បុគ្គល និងអង្គភាពដែលជួយសម្រួលដល់ការទិញអាវុធរបស់អ៊ីរ៉ង់ និងទីផ្សារប្តូរប្រាក់ឌីជីថល​ ឬ គ្រីបតូ ពាក់ព័ន្ធនឹងអ៊ីរ៉ង់ប្រមាណជា ៥០០ ពាន់លានដុល្លារ។ ទន្ទឹមនឹងនេះ អ្នកជំនាញបានព្យាករណ៍ថា រដ្ឋបាល លោក ត្រាំ អាចពិចារណាសាកល្បងជម្រើសថ្មីបន្ថែមផ្សេងទៀតចំនួន ៥ សម្រាប់បន្ថែមសម្ពាធលើអ៊ីរ៉ង់ រួមដូចជា ៖

១. ការដាក់ទណ្ឌកម្មលើរោងចក្រចម្រាញ់ប្រេងឯករាជ្យរបស់ចិន៖ ចិនទិញប្រេងជាង ៨០ ភាគរយពីអ៊ីរ៉ង់ ហើយរោងចក្រតូចៗទាំងនោះជាអ្នកស្រូបយកប្រេងច្រើនជាងគេ ដោយពួកគេអាចប្រឈមនឹងទណ្ឌកម្មបន្ទាប់បន្សំពីអាម៉េរិក។

២. ទណ្ឌកម្មលើធនាគារចិន៖ អាម៉េរិកអាចពិចារណាដាក់ទណ្ឌកម្មលើធនាគារធំៗរបស់ចិន ប្រសិនបើមានការផ្ទេរប្រាក់ពាក់ព័ន្ធនឹងប្រេងអ៊ីរ៉ង់ បើទោះជាអាចប្រឈមនឹងការសងសឹកពីក្រុងប៉េកាំងក៏ដោយ។

៣. វិធានការដេញតាមចាប់ចន្លោះប្រហោង៖ អាម៉េរិកអាចបន្តដាក់ទណ្ឌកម្មលើបុគ្គល និងក្រុមហ៊ុនដែលជួយអ៊ីរ៉ង់គេចពីទណ្ឌកម្ម ព្រមទាំងការរឹតបន្តឹងលើផ្នែកអាកាសចរណ៍ និងបន្ថែមលើការបិទផ្លូវទឹកនៅច្រកសមុទ្រ Hormuz។

៤. ការបិទផ្លូវគោក៖ អាម៉េរិកអាចពិភាក្សាអំពីលទ្ធភាពសហការជាមួយប្រទេសជិតខាងរបស់អ៊ីរ៉ង់ដូចជា អ៊ីរ៉ាក់ តួកគី ប៉ាគីស្ថាន អាហ្វហ្គានីស្ថាន តួកមេនីស្ថាន អាស៊ែបៃសង់ និង អាមេនី ដើម្បីរារាំងការនាំចូលទំនិញតាមផ្លូវគោក។

៥. ការដំឡើងពន្ធបន្ថែម៖ អាម៉េរិកអាចប្រកាសគំរាមដំឡើងពន្ធលើទំនិញមកពីប្រទេសណាដែលបន្តធ្វើពាណិជ្ជកម្ម ឬជួយជ្រោមជ្រែងផ្នែកអាវុធដល់អ៊ីរ៉ង់៕