សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទិន្នផលម្រេចកំពតក្នុងសមាគមលើកកម្ពស់ម្រេចកំពត ឆ្នាំ២០២៦នេះ រំពឹងទទួលបាន ១២០តោនពីសមាជិកក្នុងសមាគម ៣៤១ គ្រួសារ ខណៈតម្លៃ បានកើនឡើង ៥ដុល្លារបន្ថែមក្នុងមួយគីឡូក្រាម ។ នេះបើតាមការបញ្ជាក់ពីលោក កាន់ ស៊ីណុច ប្រធានក្រុមប្រឹក្សាភិបាលនៃសមាគមលើកកម្ពស់ម្រេចកំពត ។
លោក កាន់ ស៊ីណុច បានមានប្រសាសន៍ប្រាប់បណ្ដាញព័ត៌មាន AMS ឱ្យដឹងថា ក្នុងសមាគមលើកកម្ពស់ម្រេចកំពត មានសមាជិកចំនួន ៣៤១គ្រួសារ ដោយបានដាំដុះលើផ្ទៃដីសរុបទំហំ ២០៤ហិកតា បើគិតជាជន្លង់មានចំនួន ៥០១ ៥១៥ជន្លង់(គុម្ព) ក្នុងនោះ ម្រេចដែលឱ្យផលមានចំនួន ៣៥៨ ៦៧០ជន្លង់។
ប្រធានសមាគមរូបនេះបានបន្តថា ៖
«ក្នុងរយៈពេល ២ឆ្នាំចុងក្រោយនេះ ម្រេចកំពតរបស់បងប្អូនផលិតករក្នុងសមាគមបានឡើងថ្លៃបន្ថែម ៥ដុល្លារទៀតក្នុងមួយគីឡូក្រាម ដោយម្រេច ស មានតម្លៃខ្ពស់ជាងគេ ពោលគឺមានតម្លៃ ៣២ដុល្លារអាម៉េរិកក្នុងមួយគីឡូក្រាម ហើយម្រេចក្រហមមានតម្លៃ ៣០ដុល្លារអាម៉េរិកក្នុងមួយគីឡូក្រាម ចំណែកម្រេចខ្មៅ មានតម្លៃ ២០ដុល្លារអាម៉េរិក»។
បើតាមកសិករដាំដុះម្រេចក្នុងខេត្តកំពតបានបញ្ជាក់ថា ម្រេចស ម្រេចក្រហម និងម្រេចខ្មៅ គឺជាម្រេចតែមួយ មិនមែនពូជស ក្រហម ឬខ្មៅនោះទេ ប៉ុន្តែការធ្វើវាឱ្យក្លាយជាម្រេច ស ក្រហម ឬខ្មៅ គឺមានវិធីសាស្ត្រផ្សេងៗគ្នា ។ ម្រេចស ជាម្រេចដែលកសិករបេះផ្លែទុំ ហើយយកមកដាំទឹកស្រុះ ឬស្ងោរ រួចហើយយកសំបក និងសាច់អស់ ទុកតែគ្រាប់ម្រេចសុទ្ធឱ្យចេញពណ៌ស ដូច្នេះហើយ ទើបវាមានតម្លៃខ្ពស់ជាងគេ ព្រោះតែនីតិវិធីធ្វើវាពិបាក និងយូរ ។ ដោយឡែកម្រេចក្រហម ក៏ជាម្រេចដែលកសិករបេះ ផ្លែពេលវាទុំដែរ ប៉ុន្តែមិនយកទៅស្ងោរ ឬស្រុះទឹកក្ដៅនោះទេ គឹគ្រាន់តែយកមកហាលថ្ងៃឱ្យស្ងួតប៉ុណ្ណោះ ។ ចំណែកម្រេចខ្មៅ កសិករបេះផ្លែនៅពេលវាចាស់ដែលមានពណ៌បៃតង ហើយយកមកហាល និងលុញយកសំបកវាចេញ ពេលនោះវានឹងចេញពណ៌ខ្មៅដូចដែលយើងទាំងអស់គ្នាបានឃើញ ។
លោក អូន វិបុល ផលិតករម្រេចមួយរូបនៅភូមិអង្គរជ័យទី២ ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត បានឱ្យដឹងថា ការដាំដុះសម្រេចមានលក្ខណៈខុសពីដំណាំទូទៅ ។ អ្នកដាំម្រេចត្រូវយកបេះដូង និងដាក់ចិត្តដាំពិតប្រាកដ ពីព្រោះថា ម្រេចជាដំណាំមួយប្រភេទដែលពិបាកថែទាំ ភ្លៀងពេកក៏មិនល្អ ក្ដៅខ្លាំងពេកក៏មិនល្អដែរ ។ បើសិនជាអាកាសធាតុអំណោយផល នោះទិន្នផលម្រេចក៏នឹងបានច្រើន ប៉ុន្តែបើសិនក្នុងឆ្នាំណាអាកាសធាតុក្ដៅខ្លាំង ឬក៏ភ្លៀងខ្លាំងវានឹងធ្វើឱ្យទិន្នផលធ្លាក់ចុះទៅតាមនោះដែរ ដូច្នេះហើយទើបនៅតាមចម្ការម្រេចនីមួយៗ មានគ្របស្បៃពីលើ និងបិទបាំងសងខាងចម្ការ ដើម្បីទប់កម្ដៅ ឬទប់ស្កាត់ដំណក់ទឹកភ្លៀងជោគជាំ។
លោកបន្តថា ៖
«ម្ចាស់ចម្ការម្រេចនីមួយៗ អារម្មណ៍របស់ពួកគាត់គឺនៅជាប់តែនឹងចម្ការ និងត្រូវទៅមើលថែរាល់ថ្ងៃ ។ អ្នកខ្លះក៏សង់រោង ឬក៏ផ្ទះចម្ការនៅជាប់ចម្ការតែម្ដង ព្រោះនៅពេលមានភ្លៀង មានខ្យល់កន្ត្រាក់ ងាយស្រួលក្នុងការទប់ស្កាត់ ។ ឧទាហរណ៍ថា បើសិនមានភ្លៀងខ្យល់ធ្វើឱ្យជន្លង់ម្រេចណាទ្រេត ឬក៏បាក់ត្រូវលើកវាឱ្យត្រង់ ឬក៏ដាំជន្លង់ថ្មីជាបន្ទាន់»។
លោក ហ៊ុន សុភ័ក្តិ កសិករដាំដុះម្រេចមួយកន្លែងនៅក្នុងខេត្តកំពតដែរនោះក៏បានឱ្យដឹងថា ដំណាំម្រេច ពិតជាពិបាកដាំដុះ និងថែទាំពិតមែន ប៉ុន្តែវាលក់បានថ្លៃជាងដំណាំផ្សេងៗ និងបានឡើងថ្លៃជាបន្តបន្ទាប់ ជាក់ស្ដេង តាំងពីជាង ១០ដុល្លាររហូតមដល់ជាង ៣០ដុល្លារ គឺបានឡើងជាបន្តបន្ទាប់ ហើយបើសិនជាកសិករ ដែលមានភាពឧស្សាហ៍ព្យាយាម ក៏ទទួលបានផលទៅតាមនោះដែរ ។
លោកបញ្ជាក់ថា ៖ «តាមការកត់សម្គាល់ អ្នកដាំម្រេចនៅក្នុងមូលដ្ឋានភូមិស្រុករបស់ខ្ញុំមានជីវភាពធូរធារប្រសើរឡើងច្រើន ហើយអ្នកដែលមានចម្ការម្រេចក៏ប្រៀបដូចជាម្ចាស់រោងចក្រ ឬសិប្បកម្មមួយផងដែរ ដោយបានផ្ដល់កម្លាំងការងារដល់ពលរដ្ឋក្នុងមូលដ្ឋាន ឬយ៉ាងហោចណាស់ក៏បានផ្ដល់ការងារដល់សមាជិកគ្រួសារដោយមិនចាំបាច់ទៅធ្វើការងារនៅខាងក្រៅដែរ។
សូមជម្រាបថា ទីផ្សារម្រេចកំពត ត្រូវបានចុះបញ្ជីជាផលិតផលសម្គាល់ភូមិសាស្ត្រ (GI) ដ៏ល្បីល្បាញរបស់កម្ពុជា ដែលកំពុងបង្ហាញសក្តានុពលយ៉ាងខ្លាំងនៅលើឆាកអន្តរជាតិ។ យោងតាមទិន្នន័យចុងក្រោយរបស់សមាគមលើកកម្ពស់ម្រេចកំពតបានឱ្យដឹងថា ម្រេចកំពតសរុបប្រមាណ ៨០% ត្រូវបាននាំចេញទៅកាន់ទីផ្សារពិភពលោក ខណៈការប្រើប្រាស់នៅក្នុងស្រុកមានត្រឹមតែ ២០% ប៉ុណ្ណោះ ខណៈដែលតម្លៃអាចហក់ឡើងរហូតដល់ជាង៣០ដុល្លារក្នុងមួយគីឡូក្រាម ជាមួយបរិមាណនាំចេញសរុបប្រមាណ ១២០តោនក្នុងមួយឆ្នាំ៕
Account
Security
Favourite Content