សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅ ក្នុងគោលការណ៍ប្រើប្រាស់ឥណទានដែលភាសាសាមញ្ញថាកម្ចីនោះ គេតែងតែទាមទារទ្រព្យធានា និងលក្ខខណ្ឌសំខាន់ៗមួយចំនួន ដើម្បីធានាបានថា ឥណទានដែលបានបញ្ចេញទៅ ត្រូវបានប្រើប្រាស់ចំគោលដៅ និងមានប្រសិទ្ធភាព ខណៈបច្ចុប្បន្ន គ្រឹះស្ថានធនាគារ និងហិរញ្ញវត្ថុបានបង្កើតផលិតឥណទានគ្មានទ្រព្យធានា ដើម្បីជួយសម្រួលដល់ប្រជាជនកាន់តែងាយស្រួលក្នុងការទទួលបានសេវាឥណទានផ្លូវការ។
យោងតាមសហគ្រិនខ្មែរបានឱ្យដឹងថា ឥណទានមានច្រើនប្រភេទ តែនៅក្នុងនោះ ប្រភេទឥណទានធំៗគឺត្រូវបានបែងចែកជាពីរ (១) ឥណទានមានទ្រព្យធានា និង (២) ឥណទានគ្មានទ្រព្យធានា។ ដើម្បីយល់កាន់តែច្បាស់ពីឥណទានទាំងពីរប្រភេទនេះ សូមអានបន្តនៅខាងក្រោម ដូចតទៅ ៖
១. អ្វីទៅជាឥណទានមានទ្រព្យធានា (Secured loan)? ឥណទានមានទ្រព្យធានា គឺជាប្រភេទឥណទានដែលត្រូវការទ្រព្យបញ្ចាំមកធានា ក្នុងនាមជាលក្ខខណ្ឌដើម្បីស្នើសុំកម្ចី។ ជាទូទៅ ឥណទានបែបនេះគឺអាចនិយាយបានថាជាកម្ចីស្របច្បាប់ ដែលចេញពីស្ថាប័នហិរញ្ញវត្ថុ ឧទាហរណ៍ កម្ចីបុគ្គល កម្ចីទិញផ្ទះ កម្ចីសម្រាប់អាជីវកម្ម ។ល។
អ្វីដែលអ្នកគួរដឹងពីឥណទានមានទ្រព្យធានា ៖ កាលណានិយាយពីឥណទានមានទ្រព្យធានា នោះបានន័យថា អ្នកដាក់ទ្រព្យសកម្ម ឬទ្រព្យសម្បត្តិណាមួយរបស់អ្នកទៅបញ្ចាំ ដើម្បីទទួលបានកម្ចី ដែលទ្រព្យទាំងនោះអាចជាប្លង់ដី ឬផ្ទះជាដើម។
អ្នកត្រូវធ្វើការសងកម្ចីត្រលប់ទៅអ្នកផ្ដល់កម្ចីវិញឲ្យសមស្របតាមកាលកំណត់ និងគ្រប់ចំនួនទឹកប្រាក់ដូចបានចារក្នុងលក្ខខណ្ឌ ឬកិច្ចសន្យាកម្ចី។ ដំណើរការបង់សង អាចប្រព្រឹត្តទៅបានជាប្រចាំខែ ឬប្រចាំត្រីមាស អាស្រ័យលើការព្រមព្រៀងរវាងភាគីទាំងសងខាង។
– ក្នុងករណីដែលអ្នកខ្ចីមិនមានលទ្ធភាពបង់ប្រាក់សងតាមវេលាកំណត់ នោះអ្នកផ្ដល់កម្ចីនឹងមានសិទ្ធរឹបអូសទ្រព្យដែលបានដាក់បញ្ចាំនោះតាមអំណាចតុលាការ ហើយយកទៅលក់ដោយស្របច្បាប់ដើម្បីសងថ្លៃខាតបង់។
២. អ្វីទៅជាឥណទានគ្មានទ្រព្យធានា (Unsecured loan)? ឥណទានគ្មានទ្រព្យធានា គឺជាប្រភេទឥណទានដែលមិនត្រូវការទ្រព្យបញ្ចាំជាលក្ខខណ្ឌក្នុងការស្នើសុំកម្ចីឡើយ។ ជាទូទៅ កម្ចីប្រភេទនេះកើតឡើងក្នុងរូបភាពពីរ ផ្លូវការ និងមិនផ្លូវការ ផ្លូវការគឺ(កម្ចីពីស្ថាប័នហិរញ្ញវត្ថុដែលមានអាជ្ញាប័នត្រឹមត្រូវ) និងមិនផ្លូវការ (កម្ចីបានពីអ្នកស្គាល់ ឬសាច់ញាតិ)។
លើសពីនេះ ឥណទានគ្មានទ្រព្យធានា គឺត្រូវបានគេទុកថាជាកម្ចីដែលមានហានិភ័យខ្ពស់សម្រាប់អ្នកផ្ដល់កម្ចី ដោយសារវាគ្មានទ្រព្យអ្វីមកធានា ដូច្នេះហើយ ទើបភាគច្រើនការប្រាក់គឺមានអត្រាខ្ពស់ជាងកម្ចីដទៃ។ ម្យ៉ាងវិញទៀត ថ្វីបើកម្ចីប្រភេទនេះមិនត្រូវការទ្រព្យបញ្ចាំ ក៏មិនបានមានន័យថាគ្រប់គ្នាសុទ្ធតែអាចស្នើសុំកម្ចីនេះបានទេ ជាពិសេសកម្ចីផ្លូវការ។ ឧទាហរណ៍ជាក់ស្ដែងមួយ គឺប័ណ្ណឥណទាន (Credit Card) ដែលមុននឹងខាងស្ថាប័នហិញ្ញវត្ថុផ្ដល់ប័ណ្ណនេះឲ្យអ្នកបានប្រើប្រាស់ គេត្រូវពិនិត្យពិន្ទុឥណទាន និងស្ថានភាពស័ក្តិសមនៃក្រេឌីតរបស់អ្នក (creditworthiness) ក៏ដូចជាប្រវត្តិឥណទានល្អផងដែរ ហើយក្នុងករណីអ្នកមិនត្រូវតាមលក្ខខណ្ឌរបស់គេ នោះការស្នើសុំប័ណ្ណឥណទានរបស់អ្នកនឹងត្រូវបានគេបដិសេដ។
តើនឹងមានរឿងអ្វីកើតឡើង ប្រសិនបើអ្នកមិនអាចសងប្រាក់ទៅវិញបាន?
នោះវានឹងផ្ដល់ផលប៉ះពាល់ដល់ពិន្ទុឥណទាន (ធ្វើឲ្យធ្លាក់ចុះ) និងជាប់ប្រវត្តិមិនល្អក្នុងប្រវត្តិឥណទានរបស់អ្នក (យូរឆ្នាំ) ដែលធ្វើឲ្យអ្នកមិនងាយស្រួល ឬមិនអាចស្នើសុំកម្ចីនៅកន្លែងផ្សេងទៀតបាន៕
Account
Security
Favourite Content