សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំពង់ផែស្វយ័តភ្នំពេញ (ក.ស.ភ.) បាន និងកំពុងបង្កើនល្បឿនពង្រីកហេដ្ឋារចនាសម្ព័ន្ធដឹកជញ្ជូនតាមផ្លូវទឹកយ៉ាងសកម្ម ដោយបានបន្ថែមចំណតផែចំនួន ៧ ទីតាំងថ្មីនៅតាមបណ្តោយដងទន្លេក្នុងឆ្នាំ២០២៦នេះ។ យុទ្ធសាស្ត្រនេះធ្វើឡើងក្នុងគោលបំណងឆ្លើយតបទៅនឹងកំណើនតម្រូវការប្រកបដោយចីរភាព និងជំរុញការផ្លាស់ប្តូរទម្រង់ដឹកជញ្ជូន (Modal Shift) ពីផ្លូវគោកមកផ្លូវទឹក ដែលអាចជួយធុរជនកាត់បន្ថយថ្លៃដើមប្រតិបត្តិការបានចន្លោះពី ៣០% ទៅ ៤០%។
ថ្លែងក្នុង «វេទិកាធុរកិច្ច និងនវានុវត្តន៍២០២៦» កាលពីថ្ងៃទី២៦ ខែសីហា ឆ្នាំ២០២៦ នៅមណ្ឌលសន្និបាត និងពិព័រណ៍ OCIC ឯកឧត្តម ហ៊ឺ បាវី ប្រតិភូរាជរដ្ឋាភិបាលទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ បានគូសបញ្ជាក់ពីសមិទ្ធផលលេចធ្លោនៃភាពរីកចម្រើនផ្នែកសមត្ថភាពផ្ទុកទំនិញ ដែលបានកើនឡើងរហូតដល់១០ដង ក្នុងរយៈពេលជាងមួយទសវត្សរ៍ចុងក្រោយនេះ។
ឯកឧត្តម ហ៊ឺ បាវី បានបញ្ជាក់ថា ៖
«នៅឆ្នាំ២០១២ កំពង់ផែភ្នំពេញមានសមត្ថភាពត្រឹមតែ ៦ ម៉ឺន TEUs ប៉ុណ្ណោះ ប៉ុន្តែនៅឆ្នាំ២០២៥ កន្លងទៅនេះ កំពង់ផែបានផ្ដល់សេវាជូនអ្នកប្រើប្រាស់ប្រមាណ ៦០ ម៉ឺនTEUs។ ដូច្នេះ ដើម្បីឆ្លើយតបនឹងតម្រូវការទីផ្សារដែលកើនឡើង កំពង់ផែស្វយ័តភ្នំពេញបាន និងកំពុងពង្រីកសាខា និងបានដំណើរការផែស្ងួតចំនួនពីរបន្ថែម ដើម្បីគាំទ្រដល់វិស័យដឹកជញ្ជូនរួមបញ្ចូលគ្នា ជាមួយនឹងគម្រោងបង្កើតផែចម្បងថ្មីចំនួនពីរផ្សេងទៀតនៅខេត្តក្រចេះ និងកំពង់ឆ្នាំង»។
សូមជម្រាបថា ផែចម្បងទី១ នៅខេត្តក្រចេះ នឹងជួយគាំទ្រដល់ការដឹកជញ្ជូនសម្រាប់ភូមិភាគឦសាន រួមមាន ក្រចេះ ស្ទឹងត្រែង និងរតនគិរី ដែលនឹងអាចគ្រប់គ្រងទំនិញប្រមាណ ៣០ ទៅ ៤០ ម៉ឺន TEUs បន្ទាប់ពីដំណើរការបាន ២ ទៅ ៣ ឆ្នាំ ស្មើនឹង ១ ភាគ ៥ (ប្រមាណ ២០% នៃសមត្ថភាពផែភ្នំពេញបច្ចុប្បន្ន) ។
ផែចម្បងទី២ ស្ថិតនៅស្រុងកំពង់លែង ខេត្តកំពង់ឆ្នាំង ដែលជាតំបន់កសិកម្មដ៏សំខាន់ ដើរតួនាទីប្រមូលផលកសិកម្មជុំវិញបឹងទន្លេសាប និងសម្របសម្រួលរំហូរពាណិជ្ជកម្មកសិផលទៅកាន់ទីផ្សារក្នុងស្រុក និងនាំចេញផលិតផលទាំងនោះទៅកាន់ក្រៅប្រទេស។
ឯកឧត្តម ហ៊ឺ បាវី បានលើកទឹកចិត្តឱ្យផ្នែកឯកជនបង្វែរការដឹកជញ្ជូនពីផ្លូវគោកមកប្រើប្រាស់ផ្លូវទឹកវិញ ដោយសារអត្ថប្រយោជន៍នៃទំហំពាណិជ្ជកម្ម (Economy of Scale) លើសមត្ថភាពដឹកជញ្ជូនផ្លូវទឹកទទួលបានច្រើន ដូចជា កប៉ាល់ដឹកទំនិញតាមផ្លូវទឹក ១ គ្រឿង អាចដឹកកុងតឺន័របានចន្លោះពី ២០០ ទៅ ៣៦០ TEUs ក្នុងមួយជើង ខណៈរថយន្តដឹកជញ្ជូនតាមផ្លូវគោកភាគច្រើនដឹកបានត្រឹមតែ ១ កុងតឺន័រប៉ុណ្ណោះ ពោលគឺអាចជួយកាត់បន្ថយថ្លៃដើមពី ៣០% ទៅ ៤០%។
ទាក់ទិននឹងការបង្កើនចំនួនកំពង់ផែនៅខេត្តសក្តានុពលនេះ ឧកញ៉ាបណ្ឌិត ស៊ិន ចន្ធី អនុប្រធានសមាគមភស្តុភារកម្មកម្ពុជា និងជាអគ្គនាយកក្រុមហ៊ុន ឡាញហល អេចប្រេស បានប្រាប់បណ្តាញព័ត៌មាន AMS ថា ការងារនេះ បានបង្ហាញថា កំពង់ផែស្វយ័តស្វយ័តភ្នំពេញ ដែលមានបំណងពង្រីកកំពង់ផែខេត្តសក្តានុពល ជារឿងដ៏ល្អប្រសើរដែលកម្ពុជាត្រូវការចាំបាច់នូវការដឹកជញ្ជូនតាមផ្លូវទឹកនេះ។
ឧកញ៉ាបណ្ឌិត បានបន្ថែមថា ៖
«វិស័យដឹកជញ្ជូនតាមផ្លូវទឹក អាចជួយកាត់បន្ថយចំណាយឱ្យមានថ្លៃដើមទាបជាងការចំណាយលើផ្លូវគោក ខណៈដែលភូមិសាស្ត្រផ្នែកហេដ្ឋារចនាសម្ព័ន្ធផ្លូវទឹករបស់យើងមានអំណោយផលល្អ ពិសេសយើងមានទន្លេមេគង្គ ទន្លេសាប ទន្លេតូច និងដៃទន្លេ ដែលជាផ្លូវទឹកខ្វាត់ខ្វែង ផ្តល់ភាពងាយស្រួលក្នុងការដឹកជញ្ជូន។ ដូច្នេះ ប្រសិនបើយើងសិក្សាបន្ថែមទៀតទៅលើគម្រោងនៃការពង្រីកកំពង់ផែបន្ថែមទៀតដែលជាវិស័យភស្តុភាកម្មដឹកជញ្ជូនតាមផ្លូវទឹកវាជារឿងសំខាន់ និងចំណេញច្រើន» ។
យោងតាមរបាយការណ៍របស់កំពង់ផែស្វយ័តក្រុងភ្នំពេញ ក្នុងរយៈពេល ៦ ខែដើមឆ្នាំ២០២៦ បរិមាណកុងតឺន័រឆ្លងកាត់កំពង់ផែមានចំនួន ៣៣៩ ៦០៦ TEUs កើនឡើង ៣១,៥៦% ធៀបនឹងរយៈពេលដូចគ្នាក្នុងឆ្នាំ២០២៥ ៕
Account
Security
Favourite Content