សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋបាលប្រធានាធិបតីអាម៉េរិក លោក ដូណាល់ ត្រាំ កំពុងចរចាជាមួយរដ្ឋាភិបាលបណ្តោះអាសន្នរបស់វេណេស៊ុយអេឡា ដើម្បីធានាបាននូវសិទ្ធិកាន់កាប់ប្រេងឆៅមួយផ្នែកក្នុងរយៈពេលវែង។ នេះបើយោងតាមការរាយការណ៍របស់ CNA។
មន្ត្រីអាម៉េរិកពីររូបដែលសុំមិនបញ្ចេញឈ្មោះ បានឱ្យដឹងកាលពីថ្ងៃព្រហស្បតិ៍ថា កិច្ចពិភាក្សានេះពាក់ព័ន្ធនឹងទីតាំងប្រេងចំនួន ១២កន្លែង ដែលមានទុនបម្រុងប្រមាណ ៩០ពាន់លានបារ៉ែល ឬស្មើប្រមាណមួយភាគបីនៃទុនបម្រុងប្រេងសរុបរបស់វេណេស៊ុយអេឡា ដែលមានប្រមាណ ៣០០ពាន់លានបារ៉ែល។
តាមផែនការនេះ ក្រុមហ៊ុនឯកជន រួមទាំងក្រុមហ៊ុនអាម៉េរិក នឹងចូលរួមអភិវឌ្ឍវាលប្រេងទាំងនោះ ដោយនាំយកបច្ចេកវិទ្យា និងអ្នកជំនាញ ដើម្បីសាងសង់ហេដ្ឋារចនាសម្ព័ន្ធ និងពង្រីកផលិតកម្ម។ ជាមួយគ្នានេះ វេណេស៊ុយអេឡានឹងទទួលបានចំណូលពីប្រេងក្នុងកម្រិតខ្ពស់ជាងមុន។
គោលបំណងរបស់អាម៉េរិក គឺចង់បង្កើនទុនបម្រុងប្រេងរបស់ខ្លួនឱ្យបានទ្វេដង ខណៈវេណេស៊ុយអេឡាត្រូវការទុន និងបច្ចេកវិទ្យាពីបរទេស ដើម្បីស្តារសេដ្ឋកិច្ចដែលកំពុងជួបការលំបាក។ បច្ចុប្បន្ន ទុនបម្រុងប្រេងរបស់អាម៉េរិកកំពុងស្ថិតក្នុងកម្រិតទាបបំផុតក្នុងរយៈពេល ៤០ឆ្នាំចុងក្រោយ។
ប្រធានាធិបតីបណ្តោះអាសន្នវេណេស៊ុយអេឡា លោកស្រី Delcy Rodriguez កំពុងព្យាយាមបើកទ្វារឱ្យប្រទេសអាចទទួលបានការវិនិយោគពីបរទេស ជាពិសេសក្នុងវិស័យថាមពល ប៉ុន្តែស្ថិតក្រោមសម្ពាធយ៉ាងខ្លាំងពីលោក ដូណាល់ ត្រាំ ដែលចង់ក្តាប់ការគ្រប់គ្រងលើវិស័យប្រេងរបស់ប្រទេសនេះ។
រដ្ឋបាលលោក ដូណាល់ ត្រាំ តែងតែអំពាវនាវឱ្យក្រុមហ៊ុនអាម៉េរិកវិនិយោគនៅវេណេស៊ុយអេឡា ប៉ុន្តែក្រុមហ៊ុនទាំងនោះនៅតែមានការប្រុងប្រយ័ត្នខ្ពស់ ដោយសារហេដ្ឋារចនាសម្ព័ន្ធទ្រុឌទ្រោម និងប្រវត្តិនៃការរឹបអូសទ្រព្យសម្បត្តិរបស់វិនិយោគិនបរទេសដោយរដ្ឋាភិបាលវេណេស៊ុយអេឡា។
បច្ចុប្បន្ន ក្រុមហ៊ុនប្រេងអាម៉េរិក Chevron គឺជាក្រុមហ៊ុនតែមួយគត់ដែលនៅបន្តប្រតិបត្តិការនៅវេណេស៊ុយអេឡា។ កាលពីខែកក្កដា Chevron បានប្រកាសបង្កើនផលិតកម្មប្រេងឆៅប្រចាំថ្ងៃដល់ ២៨០,០០០បារ៉ែល និងមានផែនការបង្កើនទិន្នផលបន្ថែម ៥០ភាគរយទៀតនៅឆ្នាំ ២០២៨៕
Account
Security
Favourite Content