ភ្នំពេញ៖ កំពង់ផែស្វយ័តភ្នំពេញ (ក.ស.ភ.) គឺជាកំពង់ផែទន្លេអន្តរជាតិមួយក្នុងព្រះរាជាណាចក្រកម្ពុជា មានមុខងារជាអាជ្ញាធរកំពង់ផែ ប្រតិបត្តិករផែ និងភស្តុភារកម្ម។ ដោយឡែកនៅក្នុងឆ្នាំ២០២៤កន្លងទៅនេះ កំពង់ផែស្វយ័តភ្នំពេញ ប្រមូល​ចំណូល​ដោយ​មិន​ទាន់​ធ្វើ​សវនកម្មបានចំនួនសរុប ៤១ ៥៨៨ ១៧២ ដុល្លារអាមេរិក កើនជាង២០% ធៀបនឹងឆ្នាំ២០២៣ ដែលមានចំនួន៣៤ ៥៥៨ ៥១១ ដុល្លារ។ នេះបើតាមសេចក្តីប្រកាសពត៌មានរបស់កំពង់ផែស្វយ័តភ្នំពេញនាថ្ងៃទី១៧ ខែមករា ឆ្នាំ២០២៥។

ចំណូលពីប្រតិបត្តិការផែ(Port Operation) មានចំនួន៣៤ ៥៦៣ ៧៥៦ ដុល្លារ កើនជាង ២១ភាគរយ ធៀបនឹងឆ្នាំ២០២៣ ដែលមាន ២៨ ៥៦៩ ៩២១ ដុល្លារ។ចំណែកចំណូលពីអាជ្ញាធរផែ មានចំនួន ៥ ៨៣៤ ៤៨១ ដុល្លារ កើនជាង ២១ភាគរយធៀបនឹងឆ្នាំ២០២៣ ដែលមាន៤ ៨២២ ៩៤៦ ដុល្លារ រីឯចំណូលពីសេវាកម្មផ្សេងៗមាន ១ ១៨៩ ៩៣៥ដុល្លារ កើន ២% ធៀបនឹងឆ្នាំ២០២៣ ដែលមាន ១ ១៦៥ ៦៤៤ ដុល្លារ។

ក្នុងត្រីមាសទី៤ ឆ្នាំ ២០២៤ កំពង់ផែប្រមូល​ចំណូល​ដោយ​មិន​ទាន់​ធ្វើ​សវនកម្ម បានចំនួនសរុបប្រមាណ ជាង១០លានដុល្លារអាម៉េរិក កើនឡើងជាង ២៥ភាគរយ បើ​ធៀប​រយៈ​ពេលដូចគ្នាទៅនឹងឆ្នាំ២០២៣ដែលរកចំណូលបានជាង៨លានដុល្លារ​។ នេះបើតាមសេចក្តីប្រកាសពត៌មានរបស់កំពង់ផែស្វយ័តភ្នំពេញនាថ្ងៃទី១៧ ខែមករា ឆ្នាំ២០២៥។

​យោងសេចក្តីប្រកាសពត៌មានដដែលនេះបានឱ្យដឹងថា ចំណូលពីប្រតិបត្តិការផែ មានចំនួន ៨ ៣៧៩ ៧៨៩ ដុល្លារ កើនជាង ២៦ភាគរយ ធៀបនឹងឆ្នាំ២០២៣ ដែលមាន ៦ ៦២៩ ៥៩៩ដុល្លារ។ ចំណែកចំណូល​ពី​អាជ្ញាធរផែ មានចំនួន ១ ៥៦៦ ៥១២ ដុល្លារ កើនជាង១៧ភាគរយ ធៀបនឹងត្រីមាសទី៤ឆ្នាំ២០២៣ដែលមាន១ ៣៤១ ២៤៦ ដុល្លារ ចំណែកចំណូលពីសេវាកម្មផ្សេងៗមាន១៨៤ ៦៦៥ដុល្លារ កើន២៦% ធៀបនឹងឆ្នាំ២០២៣ ដែលមាន១៤៦ ៩០៨ ដុល្លារ។សរុបចំណូលពីប្រតិបត្តិការផែ អាជ្ញាធរផែនិងចំណូលពីសេវាកម្មផ្សេងៗ មានចំនួន ១០ ១៣០ ៩៦៦ ដុល្លារធៀបនឹងឆ្នាំ២០២៣ដែលមាន ៨ ១១៧ ៧៥៣ ដុល្លារ។

របាយការណ៍របស់កំពង់ផែផែស្វយ័តភ្នំពេញ បានឱ្យដឹងផងដែរថា៖ ការប្រមូលចំណូលសម្រាប់ខែធ្នូ ឆ្នាំ ២០២៤​ដោយ​មិន​ទាន់ធ្វើសវនកម្ម មានចំនួនជាង៤លានដុល្លារ កើន៤០ភាគរយ ធៀបនឹងខែធ្នូឆ្នាំ២០២៣ ដែលមានជាង២លាន៩សែនដុល្លារ។សម្រាប់ខែធ្នូ ចំណូលពីប្រតិបត្តិការផែ មានចំនួន ៣ ៤១១ ៩៣១ដុល្លារ កើន៤២ភាគរយ ធៀបនឹងខែធ្នូឆ្នាំ២០២៣ ដែលមាន   ២ ៤១០ ០៣៦ដុល្លារ , ចំណូលពីអាជ្ញាធរផែ មានចំនួន ៦០២ ៦៧២ ដុល្លារ កើនឡើង២៩% ធៀបនឹងឆ្នាំ២០២៣ ដែលមាន ៤៦៧ ៩៧៦ដុល្លារ ហើយចំណូលពីសេវាកម្មផ្សេងៗមានចំនួន ៩៤៣៤១ដុល្លារ កើន៤៩ភាគរយ ខណៈខែធ្នូឆ្នាំ២០២៣មានចំនួន៦៣២៦៥។

ឧកញ៉ា ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានលើកឡើងថា៖

« ការកើនឡើងប្រាក់ចំណូលរបស់កំពង់ផែស្វយ័តភ្នំពេញនេះ គឺបានបង្ហាញពីភាពប្រសើរឡើងនៃការធ្វើពាណិជ្ជកម្មរបស់កម្ពុជា ជាមួយប្រទេសដៃគូនៅក្នុងតំបន់ និងលើពិភពលោក ទាំងការនាំចេញ និងនាំចូលឆ្លងកាត់កំពង់ផែនេះ»