ភ្នំពេញ ៖ ជាទូទៅ នៅពេលដែលស្ថានភាពសេដ្ឋកិច្ចសកល ក៏ដូចជាក្នុងតំបន់មិនសូវអំណោយផល (វិបត្តិសេដ្ឋកិច្ច) វានឹងក្លាយជាចលករមួយដែលជំរុញឱ្យរបៀបរបបនៃការរស់នៅប្រចាំថ្ងៃរបស់មនុស្សមានការផ្លាស់ប្ដូរ ដើម្បីអាចសម្របខ្លួនរស់នៅទៅក្នុងរបត់សង្គមថ្មី។ ប្រការនេះ ជាហេតុនាំឲ្យមានផលវិបាកដល់អាជីវកម្មថ្មីថ្មោងមួយចំនួន រហូតមានមុខរបរខ្លះត្រូវបិទទ្វារព្រោះការរកស៊ីមិនសូវទទួលបានផលល្អ ឬអាចក្ស័យទុនតែម្ដង។

តបទៅនឹងការលើកឡើងខាងលើនេះ អ្នកជំនាញសហគ្រិនខែ្មរបានណែនាំវិធីសាស្ត្រចំនួន ៤ ចំណុច ដើម្បីអាចចៀសវាងពីភាពប្រឈមនឹងការដួលរលំនៃអាជីវកម្ម ហើយអាចបន្តការរកស៊ីបានដោយរលូនទោះជាស្ថិតក្នុងស្ថានភាពសេដ្ឋកិច្ចមិនអំណោយផលក៏ដោយ។

វិធីសាស្ត្រទាំង ៤ ចំណុចនេះរួមមានដូចខាងក្រោម ៖

១. ផ្តោតសំខាន់លើផលិតផល ៖ ខណៈពេលដែលការរកស៊ីមិនសូវមមាញឹក វាក៏អាចជាឱកាសឲ្យអ្នកផ្ដោតសំខាន់លើការពង្រឹងគុណភាពផលិតផលផងដែរ តើផលិតផលអ្នកមានភាពទាក់ទាញអ្វីខ្លះដែលធ្វើឲ្យអតិថិជនចង់ទិញ និងប្រើប្រាស់បន្ត? តើមានចំណុចណាដែលគួរកែតម្រូវ ដើម្បីឲ្យគុណភាព ឬគុណតម្លៃនៃផលិតផលមានភាពល្អប្រសើរជាងមុនដែរ ឬទេ?

២. រៀបចំគម្រោងសាច់ប្រាក់សម្រាប់អាជីវកម្មទាំងមូល ៖ ពេលអាជីវកម្មកំពុងដំណើរការក្នុងស្ថានភាពដែលស្រពេចស្រពិលជាមួយបម្រែបម្រួលសង្គម អ្នកត្រូវរៀបចំគម្រោងសាច់ប្រាក់យ៉ាងហោចណាស់ចំនួន ១៨ខែ សម្រាប់ទ្រទ្រង់អាជីវកម្មក្នុងករណីគ្មានចំណូលសោះ។ បើមិនមានប្រាក់គ្រប់គ្រាន់ អ្នកគួរចាប់ផ្តើមគិតគូរពីឥឡូវនេះទៅ ថាតើចំណាយណាខ្លះដែលអាចកាត់ចោលបាន។ គួរចំណាយកម្លាំង ពេលវេលា និងលុយកាក់ឲ្យបានល្អិតល្អន់តាមដែលអាចធ្វើបាន។ តាមពិតទៅត្រង់ចំណុចនេះ គឺអាចចាត់ទុកថាជាការវិភាគហានិភ័យទុក ដើម្បីត្រៀមខ្លួនឲ្យបានរួចជាស្រេច ហើយអាចប្រើបានគ្រប់កាលៈទេសៈ មិនមែនចំពោះតែពេលមានវិបត្តិនោះទេ។

៣. ស្វែងរកជំនួយ ៖ ប្រសិនបើអាជីវកម្មរបស់អ្នកស្ថិតក្នុងវិស័យអាទិភាព (ផ្នែកឧស្សាហកម្ម សេវាកម្ម និងពាណិជ្ជកម្ម សម្រាប់កាត់បន្ថយការនាំចូល និងបម្រើសេចក្ដីត្រូវការក្នុងស្រុក) ក្នុងស្ថានការណ៍នេះ អ្នកគួរត្រៀមខ្លួនសម្រាប់ការស្នើសុំនូវកញ្ចប់ថវិកាជំនួយពីរដ្ឋាភិបាល ដើម្បីជួយដោះស្រាយបញ្ហាអាជីវកម្ម។ មួយវិញទៀត អ្នកក៏អាចខ្ចីកម្ចីពីស្ថាប័នណាដែលមានគម្រោងជួយអាជីវកម្មធុនតូច និងមធ្យម ជាក់ស្ដែងដូចជា ធនាគារសហគ្រាសធុនតូច និងមធ្យម កម្ពុជា (SME Bank) ដែលបានទទួលនូវហិរញ្ញប្បទានពីរដ្ឋាភិបាលកម្ពុជា ដើម្បីជួយទ្រទ្រង់សហគ្រាស និងអាជីវកម្មជាដើម។

៤. ពង្រីកមុខជំនួញតាមប្រព័ន្ធអនឡាញ ៖ ទោះបីជាអ្នកមានទីតាំង ឬហាងផ្ទាល់ខ្លួនហើយក៏ដោយ អ្នកគួរប្រើប្រាស់ Facebook, Instagram ឬ Tiktok ជាជំនួយបន្ថែមសម្រាប់ជួយផ្សព្វផ្សាយផលិតផល និងសេវាកម្មរបស់អ្នកអាចជាការបង្ហោះរូបភាពវីដេអូ និងការ Live ផ្ទាល់ជាដើម។ ធ្វើដូច្នេះ គឺដើម្បីប្រែវាជាឱកាសសម្រាប់ពង្រីកមុខជំនួញរបស់អ្នកឲ្យគេបានស្គាល់កាន់តែច្រើន។ សរុបមក មិនថានៅក្នុងកាលៈទេសៈណានោះទេ អ្នកគួរត្រៀមទុកនូវយុទ្ធសាស្រ្ដ ដើម្បីដំណើរការអាជីវកម្មរបស់អ្នក។ យើងសង្ឃឹមថាវិធីសាស្រ្ដទាំង ៤ ខាងលើនេះ អាចជួយជាគំនិត និងគន្លឹះខ្លះ ដើម្បីឲ្យអ្នកអាចអនុវត្តក្នុងអាជីវកម្មរបស់អ្នកបាន៕