បរទេស ៖ នៅថ្ងៃដើមសប្ដាហ៍នេះ តម្លៃប្រេងឆៅបានធ្លាក់ចុះប្រមាណជាង ៥% ខណៈដែលតម្លៃមាស​ និងសន្ទស្សន៍ផ្សារហ៊ុនមានការកើនឡើង ក្រោយកិច្ចព្រមព្រៀងសន្តិភាពរវាងសហរដ្ឋអាម៉េរិក ជាមួយអ៊ីរ៉ង់ បង្ហាញពីសញ្ញាវិជ្ជមាន នេះបើយោងតាមសេចក្ដីរាយការណ៍ពីសារព័ត៌មាន CNA ។

សម្រាប់ព្រឹកថ្ងៃចន្ទសប្ដាហ៍នេះ តម្លៃ​ប្រេងឆៅ Brent បានធ្លាក់ចុះ ៥,១ ភាគរយ ឬ ៩៨,២២ ដុល្លារក្នុងមួយបារ៉ែល ខណៈដែលតម្លៃប្រេងឆៅ West Texas Intermediate (WTI) ធ្លាក់ចុះ ៥,២ ភាគរយមកនៅត្រឹម ៩១,៥៧ ដុល្លារក្នុងមួយបារ៉ែល ដែលជាតម្លៃធ្លាក់ដល់កម្រិតទាបបំផុតមិនធ្លាប់មាននៅក្នុងខែឧសភានេះ។

ជាមួយនឹងការធ្លាក់ចុះនៃតម្លៃប្រេងខាងលើនេះ ងាកមកតម្លៃមាស​ និងផ្សារហ៊ុនអន្តរជាតិវិញកំពុងកើនឡើងជាបន្តបន្ទាប់​ ខណៈតម្លៃរូបិយបណ្ណក៏មានការកើនឡើងដូចគ្នា។ សន្ទស្សន៍ផ្សារហ៊ុនអាម៉េរិក Nasdap បានកើនឡើង ១,២ ភាគរយ ហើយផ្សារហ៊ុន S&P កើនឡើង ០,៧ ភាគរយ ខណៈដែលសន្ទស្សន៍រផ្សារហ៊ុនរបស់ជប៉ុន Nikkei កើនឡើង ៣ ភាគរយ ប៉ុន្តែសន្ទស្សន៍ផ្សារហ៊ុនរបស់ទីក្រុងហុងកុង និងសេអ៊ូលត្រូវបានបិទដោយសារចំថ្ងៃបុណ្យឈប់សម្រាក។ ប្រាក់អឺរ៉ូកើនឡើង ០,៣៣ ភាគរយ ដោយ ១ អឺរ៉ូស្មើនឹង ១,‌១៦ ដុល្លារអាម៉េរិក ខណៈដែលប្រាក់យ៉េនជប៉ុនកើនឡើងដល់ ១៥៨.៨៥ យ៉េនក្នុងមួយដុល្លារអាម៉េរិក។ លើសពីនេះ តម្លៃមាសអន្តរជាតិឡើងថ្លៃ ៤ ៥៥០ ដុល្លារក្នុងមួយអោន (នៅលើសទីផ្សារកម្ពុជា មាសមានតម្លៃប្រមាណ ៥ ៥១០ ដុល្លារក្នុងមួយតម្លឹង និង ៥៥១ ក្នុងមួយជី)។

លោក Nick Twidale ប្រធានអ្នកវិភាគទីផ្សារនៅ ATFX Global បានព្យាករណ៍ថា អ្នកវិនិយោគហ៊ានប្រថុយប្រថានបោះទុនច្រើនជាងមុននៅថ្ងៃច័ន្ទនេះ ដោយសារមានសង្ឃឹមលើកិច្ចព្រមព្រៀងសន្តិភាព ប៉ុន្តែទីផ្សារនឹងមិនទាន់មានសន្ទុះឡើងខ្លាំងភ្លាមៗនោះទេ លុះត្រាតែមានការបញ្ជាក់ច្បាស់ថា ច្រកសមុទ្រ Hormuz នឹងត្រូវបើកឱ្យដំណើរការឡើងវិញ។ ​គេ​ត្រូវ​រង់ចាំមើលការឈានដល់​កិច្ច​ព្រម​ព្រៀង​ផ្លូវការណាមួយ​នៅ​ក្នុង​កិច្ច​ប្រជុំ​ខាង​មុខ​នេះ ដោយសារ​នៅ​មាន​ចំណុចសំខាន់ៗ​មួយ​ចំនួន​ទៀតជាប់​គាំង​។

សូមរំលឹកថា​ កាលពីថ្ងៃសៅរ៍ សប្ដាហ៍កន្លងទៅនេះ ប្រធានាធិបតីអាម៉េរិក លោក Donald Trump បានលើកឡើងថា ទីក្រុងវ៉ាស៊ីនតោន និងអ៊ីរ៉ង់ បានចរចាគ្នាយ៉ាងទូលំទូលាយលើអនុស្សរណៈនៃការយោគយល់គ្នាស្តីពីកិច្ចព្រមព្រៀងសន្តិភាពដែលនឹងបើកច្រកសមុទ្រ Hormuz ឡើងវិញ។ យ៉ាងណាមិញ ភាគីទាំងពីរនៅតែមានជម្លោះលើបញ្ហាមួយចំនួន ដោយលោក Trump ប្រាប់ទៅអ្នកតំណាងរបស់គាត់កុំឱ្យប្រញាប់ប្រញាល់ចូលទៅក្នុងកិច្ចព្រមព្រៀងណាមួយជាមួយអ៊ីរ៉ង់លឿនពេក។

អ្នកវិភាគ Saul Kavonic របស់ MST Marquee បានលើកឡើងថា បើទោះបីជាកិច្ចព្រមព្រៀងសន្តិភាព និងការបើកច្រកសមុទ្រ Hormuz នៅមានហានិភ័យ និងលក្ខខណ្ឌស្មុគស្មាញច្រើនក៏ដោយ ប៉ុន្តែវាជាសញ្ញាវិជ្ជមានខ្លះៗដែលធ្វើឲ្យទីផ្សារថមថយនូវភាពតានតឹងជាងមុន។ នេះមានន័យថា ក្នុងរយៈពេលខ្លី វានឹងជួយធ្វើឱ្យតម្លៃប្រេងធ្លាក់ចុះ។ ទោះជាយ៉ាងណា គេជឿជាក់ថា វានៅត្រូវចំណាយពេលរាប់ខែទៀតដើម្បីឱ្យការដឹកជញ្ជូនប្រេងតាមច្រកសមុទ្រ Hormuz វិលទៅរកសភាពធម្មតាវិញ ហើយការជួសជុលហេដ្ឋារចនាសម្ព័ន្ធបង្ហូរប្រេងនានាដែលរងការខូចខាតដោយសារសង្គ្រាមក៏ត្រូវការពេលវេលាយូរដូចគ្នា ទម្រាំការផលិតអាចត្រឡប់ទៅរកកម្រិតដើមមុនពេលមានសង្គ្រាម។

អ្នកយុទ្ធសាស្រ្តរបស់ធនាគារ Commonwealth Bank of Australia បានសរសេរថា អ្វីដែលទីផ្សារហិរញ្ញវត្ថុចង់ដឹងសំខាន់បំផុតគឺ តើពេលណាទើបច្រកសមុទ្រ Hormuz បើកឡើងវិញ ? តើត្រូវមានលក្ខខណ្ឌអ្វីខ្លះ ទើបបានបើកឡើងវិញ ? តើត្រូវចំណាយពេលយូរប៉ុណ្ណា ដើម្បីជួសជុលហេដ្ឋារចនាសម្ព័ន្ធ និងរោងចក្រផលិតប្រេងដែលខូចខាតដោយសារសង្គ្រាម ដើម្បីឱ្យការផលិតវិលទៅរកកម្រិតដើមវិញ ?