សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ការឆបោកតាមប្រព័ន្ធអនឡាញ និងជម្លោះព្រំដែនកម្ពុជា-ថៃ បានធ្វើឱ្យវិស័យទេសចរណ៍កម្ពុជាថមថយ។ នេះជាការលើកឡើងរបស់លោក Stephen Higgings ស្ថាបនិក ស្ថាប័ន Mekong Strategic Capital បាននិយាយនៅក្នុងវេទិកា Industry Views and Outlook for 2026 នៅសណ្ឋគារ រូសវូត រាជធានីភ្នំពេញកាលពីថ្ងៃទី១៤ ខែមករា ឆ្នាំ២០២៥។
លោក Stephen បានឱ្យដឹងថា ចំនួនទេសចរនៅខែកក្កដា ឆ្នាំ២០២៥ ថយចុះ១៨ភាគរយ ខែសីហា ថយចុះ ២៥% ខែកញ្ញា ថយចុះ ២៦% ខែតុលាថយ ១៩ភាគរយ ខែវិច្ឆិកា ថយ ១៨ភាគរយ និងនៅខែធ្នូ ឆ្នាំ២០២៥ ធ្លាក់ចុះដល់ទៅ ៣០ភាគរយ។
យោងតាមរបាយការណ៍របស់គ្រឹះស្ថានអង្គរ កម្ពុជារកចំណូលបានជាង ៤៤លានដុល្លារ(៤៤ ៧១១ ៦៧៥ ដុល្លារ)នៅឆ្នាំ២០២៥ ពីការលក់សំបុត្រចូលទស្សនារមណីយដ្ឋានអង្គរទៅដល់ភ្ញៀវទេសចរអន្តរជាតិជាង៩៥ ម៉ឺននាក់(៩៥ ៥១៣១នាក់)។ បើធៀបនឹងរយៈពេលដូចគ្នានៅឆ្នាំ២០២៤ ចំណូលនេះបានធ្លាក់ចុះ ៦,៥១% ខណៈចំនួនទេសចរអន្តរជាតិបានថយចុះ ៦,៧០% ។
ទោះយ៉ាងណាក៏ដោយ វិស័យទេសចរណ៍របស់កម្ពុជាកំពុងចាប់ផ្ដើមបង្ហាញសញ្ញាវិជ្ជមានឡើងវិញ ក្រោយរាជរដ្ឋាភិបាល បានបោសសម្អាតមេខ្លោងឆបោកតាមប្រព័ន្ធអនឡាញជាបន្តបន្ទាប់ ដែលជាការស្តារមុខមាត់កម្ពុជាឡើងវិញនៅលើឆាកអន្តរជាតិ។ វិធានការនេះនឹងជួយស្រូបទាញភ្ញៀវទេសចរបរទេសបន្ថែមឱ្យមកកម្សាន្តនៅកម្ពុជា ក៏ដូចជាទាក់ទាញវិនិយោគិនកាន់តែច្រើននៅឆ្នាំនេះ។
ក្រុមអ្នកជំនាញក្នុងវិស័យទេសចរណ៍ បានបង្ហាញគំនិតសុទិដ្ឋិនិយមថា តាមរយៈសកម្មភាពទាំងនេះ នឹងជួយឲ្យវិស័យទេសចរណ៍កម្ពុជាកាន់តែល្អប្រសើរ និងអាចទាក់ទាញភ្ញៀវទេសចរបរទេសកាន់តែច្រើននៅឆ្នាំ២០២៦នេះ។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានចាត់ទុកការចាប់ខ្លួនលោក ចេន ហ្ស៊ី ដែលជាមេខ្លោងឧក្រិដ្ឋកម្មឆបោកតាមប្រព័ន្ធអនឡាញ និងការលើកលែងទិដ្ឋាការសម្រាប់ភ្ញៀវទេសចរចិន គឺជាអំណោយដ៏ធំសម្រាប់វិស័យទេសចរណ៍កម្ពុជា។ តាមរយៈវិធានការទាំងនេះ រដ្ឋមន្ត្រីក្រសួងទេសចរណ៍ជឿជាក់ថា វិស័យទេសចរណ៍កម្ពុជានៅឆ្នាំនេះនឹងទទួលបានលទ្ធផលកាន់តែល្អប្រសើរបន្ថែមទៀត ជាពិសេស កំណើនភ្ញៀវទេសចរជនជាតិចិនតែម្តង។
លោក ធួន ស៊ីណាន ប្រធានសមាគមអាស៊ីប៉ាស៊ីហ្វិកកម្ពុជា ជឿជាក់ថា តាមរយៈយុទ្ធនាការបោសសម្អាតបទល្មើសឆបោកតាមប្រព័ន្ធអនឡាញ ជាពិសេសការចាប់ខ្លួនលោក ចេន ហ្ស៊ី ដែលត្រូវបានចិនចោទប្រកាន់ពីបទធ្វើជាមេខ្លោងដំណើរការឧក្រិដ្ឋឆបោកតាមប្រព័ន្ធអនឡាញវានឹងជួយផ្តល់ទំនុកចិត្តដល់ភ្ញៀវទេសចរបរទេសក្នុងការមកកម្សាន្តនៅកម្ពុជាបន្ថែមទៀត។
លោក លី សែ ប្រធានគ្រឹះស្ថានអង្គរ យល់ឃើញថា យុទ្ធនាការបោសសម្អាតបទល្មើសឆបោកតាមប្រព័ន្ធអនឡាញក្នុងតំបន់គឺជារឿងសំខាន់បំផុតសម្រាប់វិស័យទេសចរណ៍របស់កម្ពុជា។ ក្រៅពីការចាប់ខ្លួនមេក្លោងឆបោកតាមប្រព័ន្ធអនឡាញ និងផែនការបង្ក្រាបបទល្មើសឆបោកតាមប្រព័ន្ធបច្ចេកវិទ្យាទ្រង់ទ្រាយធំនៅទូទាំងប្រទេសកម្ពុជា រាជរដ្ឋាភិបាលកម្ពុជាតាមរយៈក្រសួងទេសចរណ៍ បាននិងកំពុងធ្វើកិច្ចការជាច្រើន ដើម្បីស្ដារឡើងវិញនៃវិស័យទេសចរណ៍៕
Account
Security
Favourite Content