សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតចាប់ពីខែមករា ដល់ដំណាច់ខែសីហា ឆ្នាំ២០២៦នេះ ក្រុមប្រឹក្សាអភិវឌ្ឍន៍កម្ពុជាបានអនុម័តចុះបញ្ជីគម្រោងវិនិយោគសរុបចំនួន ៣៤៦គម្រោង ដែលមានដើមទុនវិនិយោគចំនួន ៥ ៤៥៨លានដុល្លារអាម៉េរិក និងអាចបង្កើតការងារបានយ៉ាងហោចណាស់ ២០ម៉ឺនកន្លែង ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ។
បើតាមរបាយការណ៍ដដែលនេះបានបង្ហាញឱ្យដឹងថា វិនិយោគិនក្នុងស្រុកបានចាប់ផ្ដើមចាប់អារម្មណ៍ និងបានដាក់ទុនវិនិយោគក្នុងប្រទេសខ្លួនឯងកាន់តែច្រើន ជាក់ស្ដែងក្នុងរយៈពេល៨ខែមកនេះ ប្រភពទុនវិនិយោគដែលបានស្នើសុំចុះបញ្ជីវិនិយោគច្រើនជាងគេ ជាប្រភពទុនក្នុងស្រុក ហើយប្រភពទុនវិនិយោគដែលច្រើនជាងគេបន្ទាប់នោះគឺមកពីប្រទេសចិន ។
យោងតាមរបាយការណ៍ ៨ខែដើមឆ្នាំ២០២៦ កម្ពុជាទទួលបានប្រភពទុនវិនិយោគក្នុងស្រុកប្រមាណ ២,៣៩ពាន់លានដុល្លារអាម៉េរិក ខណៈប្រភពទុនវិនិយោគពីក្រៅប្រទេសដែលបានចុះបញ្ជីវិនិយោគនៅកម្ពុជាក្នុងរយៈពេល៨ខែដើមឆ្នាំនេះមានទំហំទឹកប្រាក់ប្រមាណជិត ២ពាន់លានដុល្លារអាម៉េរិក ។
ក្រុមប្រឹក្សាអភិវឌ្ឍន៍បានបង្ហាញផងដែរពីគម្រោងវិនិយោគដែលលេចធ្លោរក្នុងរយៈពេល៨ខែដើមឆ្នាំ២០២៦នេះ រួមមានតំបន់សេដ្ឋកិច្ចពិសេស គម្រោងវិនិយោគលើថាមពលអគ្គិសនីដើរដោយកម្លាំងខ្យល់ គម្រោងវិនិយោគលើរោងចក្រផលិតសំបកកង់យានយន្ត គម្រោងវិនិយោគលើរោងចក្រអគ្គិសនីដើរដោយថាមពលពន្លឺអាទិត្យជាដើម ។
អ្នកជំនាញនៃវិស័យអចលនទ្រព្យបានមើលឃើញថា ការវិនិយោគនៅកម្ពុជាក្នុងរយៈពេលប៉ុន្មានឆ្នាំមកនេះ ភាគច្រើនផ្ដោតលើវិស័យឧស្សាហកម្ម កសិ-ឧស្សាហកម្ម។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា វិស័យឧស្សាហកម្មកម្ពុជាបានស្រូបទាញប្រភពទុនវិនិយោគ និងវិនិយោគិនចូលមកបណ្ដាក់ទុនជាបន្តបន្ទាប់ ហើយតាមរយៈការវិនិយោគលើវិស័យឧស្សាហកម្មនេះដែរ បានធ្វើឱ្យតម្រូវការដីធ្លីសម្រាប់បម្រើឱ្យការវិនិយោគលើវិស័យនេះមានកំណើន ។
បើតាមលោក ប៉ូ អ៊ាវគង់ ឱ្យដឹងថា ដីធ្លីដែលផ្គត់ផ្គង់សម្រាប់បម្រើការវិនិយោគវិស័យឧស្សាហកម្ម ជាប្រភេទដីនៅជាយក្រុង ឬដីដែលមានតម្លៃទាប ចន្លោះ១០ដុល្លារអាម៉េរិកក្នុងមួយម៉ែត្រការ៉េ ដូច្នេះដីប្រភេទនេះមានតម្រូវការច្រើន ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ខេត្តដែលទាក់ទាញបានគម្រោងវិនិយោគច្រើនជាងគេក្នុងរយៈពេល៨ខែដើមឆ្នាំ២០២៦នេះ រួមមានខេត្តកំពង់ស្ពឺ ខេត្តស្វាយរៀង ព្រះសីហនុ តាកែវ កំពត ក្រុងព្រះសីហនុ និងបណ្ដាខេត្តមួយចំនួនទៀតដែលមានសក្ដានុពល ៕
Account
Security
Favourite Content