ភ្នំពេញ ៖ គម្រោងអភិវឌ្ឍន៍​លំនៅឋាន​តម្លៃសមរម្យ​ចំនួន​ ២ បានដាក់ពាក្យស្នើ​សុំ​អនុញ្ញាតពីក្រសួងរៀបចំដែនដី នគរូបនីយកម្ម និងសំណង់ ដើម្បី​វិនិយោគ​ និងផ្គត់​ផ្គង់​ដល់ពលរដ្ឋ​ដែលមានប្រាក់ចំណូល​ទាប និងមធ្យម ជាពិសេស​មន្ត្រីរាជការ ខណៈគម្រោងទាំង​ ២ នេះ ​មានចំនួនលំនៅឋានសរុបរហូតដល់ជា​ង ​៩២ ០០០ខ្នង ។

បើតាម​របាយការណ៍របស់​អគ្គនាយកដ្ឋានលំនៅឋាន​ នៃក្រសួង​រៀបចំដែនដី នគរូបនីយកម្ម និងសំណង់ បានបង្ហាញថា​ គិតត្រឹមចុង​ឆ្នាំ២០២៥ មានគម្រោង​អភិវឌ្ឍន៍​លំនៅឋានតម្លៃសមរម្យ​ចំនួន​៤គម្រោង ដែលសាងសង់​លំនៅឋាន​តម្លៃសមរម្យ​បានចំនួន ៥ ២៨៥ឯកតា​  (ផ្ទះ )  ហើយក៏មាន​គម្រោង​ថ្មីចំនួន ២ បន្ថែមទៀតដែរ ដោយក្នុងនោះមាន​ក្រុមហ៊ុន ឃុន សៀ អ៊ីមផត អិច​ផត ទទួលបាន​គោលការណ៍អនុញ្ញាត​វិនិយោគលំនៅឋាន​ចំនួន ៩១ ៦០៧ផ្ទះ ក្នុងនោះ​លំនៅឋាន​ដែលមានតម្លៃក្រោម​ ៣ម៉ឺន​ដុល្លារ​ មានចំនួន ៦២ ២៩៦​ ផ្ទះ ស្មើនឹង​៦៨ភាគរយ ។ គម្រោង​នេះ មានទីតាំង​នៅ​ក្រុងអរិយក្សត្រ ខេត្តកណ្ដាល ។​ ដោយឡែក គម្រោងអភិវឌ្ឍន៍លំនៅឋាន​​មួយ​ទៀតដែល​បានសុំ​សាងសង់​លំនៅឋាន​តម្លៃ​សមរម្យនេះដែរ គឺក្រុមហ៊ុន ​ឡេង យី ស្នើ​សុំ​សាងសង់លំនៅឋាន​ចំនួន ៥០០ផ្ទះ មាន​ទីតាំង​ស្ថិតនៅក្នុង​ខណ្ឌព្រែកព្នៅ រាជធានីភ្នំពេញ ដែល​ជាតំបន់​អភិវឌ្ឍន៍ថ្មីមួយនៅប៉ែកខាងជើង ជាយរាជធានីភ្នំពេញ ។

អគ្គនាយកដ្ឋាន​លំនៅឋាននៃក្រសួងរៀបចំដែនដី នគរូបនីយកម្ម និងសំណង់ ក៏បានរំលឹក និង​បង្ហាញ​ពីគម្រោង​ចំនួន​៤ ​ដែលបានធ្វើសកម្មភាពអភិវឌ្ឍន៍លំនៅឋានតម្លៃសមរម្យ​កាលពីពេលកន្លងទៅផងដែរ រួមមាន ទី១. គម្រោងអភិវឌ្ឍន៍របស់ក្រុមហ៊ុន World Bridge Home មានផ្ទះសរុប​ចំនួន ២ ៤៥៧ខ្នង ស្ថិតនៅក្នុង​ក្រុងតាខ្មៅ ខេត្តកណ្ដាល, ទី២.គម្រោងអភិវឌ្ឍន៍របស់ក្រុមហ៊ុន B&BM Development មានគម្រោង​ផ្ទះ​សរុប​ចំនួន ៧០០ខ្នង​ ក៏ស្ថិតនៅក្នុងខេត្តកណ្ដាល​, ទី៣. គម្រោងអភិវឌ្ឍន៍របស់ក្រុមហ៊ុន Arakawa អភិវឌ្ឍន៍លំនៅឋាន​ចំនួន ១ ៩២៨ចំណែក​ឯកជន( អគារសហកម្មសិទ្ធិ ) ស្ថិតនៅក្នុងសង្កាត់​ទឹកថ្លា ខណ្ឌសែនសុខ រាជធានីភ្នំពេញ និង​ ទី៤ . គម្រោង​អភិវឌ្ឍន៍របស់ Grand Park មានគម្រោងលំនៅឋាន​ចំនួន ២០០​ ស្ថិតនៅក្នុង​រាជធានីភ្នំពេញ ។​

សូមបញ្ជាក់ថា រាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់​ ជាសេនាធិការ បានលើកទឹកចិត្ត​ និងជំរុញឱ្យវិនិយោគិន​បណ្ដាក់ទុនវិនិយោគ​លើ​គម្រោង​លំនៅឋានតម្លៃសមរម្យ​ ដើម្បីរួ​ម​ចំណែក​ដល់​ប្រជាពលរដ្ឋដែលមិនមានលទ្ធភាពទិញលំនៅឋានតម្លៃខ្ពស់​ស្នាក់​នៅបាន ជាពិសេស​មន្ត្រីរាជការ ។​

​ក្រៅពីការ​ជំរុញឱ្យមានក្រុមហ៊ុន​អភិវឌ្ឍន៍​លំនៅឋានតម្លៃសមរម្យហើយនោះ ក្រសួងរៀបចំដែនដី នគរូបនីយកម្ម និងសំណង់ បាន និងកំពុងស្វះស្វែងរក​ដៃគូធនាគារ និងមីក្រូហិរញ្ញវត្ថុ ក្នុងការផ្ដល់​កម្ចីដែលមានអត្រាកា​រប្រាក់ទាបដល់​ប្រជាពលរដ្ឋ​សម្រាប់ទិញលំនៅឋាន​ស្នាក់នៅឱ្យបានសមរម្យ ស្រប​តាម​ចក្ខុវិស័យ​លំនៅឋានរបស់​ក្រសួង គឺ ប្រជាជនគ្រប់រូបមានលំនៅឋាន​សមរ​ម្យសម្រាប់រស់នៅ ប្រកបដោយ​សុភមង្គ​ល សុវត្ថិភាព និង​សេចក្ដីថ្លៃថ្នូរ ៕