សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រសួងរៀបចំដែនដី កំពុងត្រួតពិនិត្យ ទស្សនាទានឆ្ពោះទៅរៀបចំគោលនយោបាយសម្បទាន ដើម្បីសង្គម និងសេដ្ឋកិច្ច ក្នុងគោលបំណងគាំពារដល់គុណភាពជីវិតមន្ត្រីរាជការក្រោយចូលនិវត្តន៍
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ រួមជាមួយនឹងក្រសួងពាក់ព័ន្ធ បាន និងកំពុងត្រួតពិនិត្យឡើងវិញនូវគោលនយោបាយសម្បទានដីសង្គមកិច្ច ដោយបានពិនិត្យលទ្ធភាពប្រែក្លាយមកជាគោលនយោបាយសម្បទានដើម្បីសង្គម និងសេដ្ឋកិច្ច ដែលផ្តោតសំដៅលើការកសាងខឿនសេដ្ឋកិច្ចនៅតាមបណ្តាសហគមន៍។ ក្រសួងចាត់ទុកថា ការធ្វើឱ្យជីវភាពប្រជាជនកាន់តែប្រសើរឡើង គឺជាស្នូលនៃបេសកកម្ម ដែលផ្តោតសំខាន់លើផ្លូវ ទឹក ភ្លើង និងពង្រឹងដង្ហើមសេដ្ឋកិច្ចដែលមានជាក់ស្តែង។
គោលនយោបាយនេះ នឹងធានាដល់ការគាំពារគុណភាពជីវិតរបស់មន្ត្រីរាជការ និងកងកម្លាំងប្រដាប់អាវុធ ដែលកំពុងបំពេញការងារ និងក្រោយពេលចូលនិវត្តន៍ដោយឱ្យពួកគាត់ទទួលបាននូវជីវភាពរស់នៅល្អប្រសើរ ក៏ដូចជាគាំពារដល់គុណភាពជីវិតរបស់ប្រជាពលរដ្ឋទូទៅដែលមិនមែនជាមន្ត្រីរាជការ មិនមែនជាកងកម្លាំងប្រដាប់អាវុធ ធ្វើយ៉ាងណាបង្កើតដង្ហើមសេដ្ឋកិច្ចដល់ពួកគាត់ឱ្យមានការងារធ្វើ មានប្រាក់ចំណូល សំដៅធានាបាននូវការរស់នៅប្រកបដោយសេចក្តីសុខ សុភមង្គល និងជីវភាពល្អប្រសើរ។
ក្នុងពិធីបើកសិក្ខាសាលា ស្តីពី “ទស្សនាទានឆ្ពោះទៅការរៀបចំគោលនយោបាយសម្បទានដើម្បីសង្គម និងសេដ្ឋកិច្ច” នៅទីស្ដីការក្រសួង នាព្រឹកថ្ងៃទី១៥ ខែមករា ឆ្នាំ២០២៦ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានរំឮកថា កាលសម្ដេចតេជោ នៅជានាយករដ្ឋមន្ត្រី រដ្ឋាភិបាលបានអនុវត្តគោលនយោបាយដីសម្បទានសង្គមកិច្ចនេះរួចមកហើយ លុះមកដល់សម័យសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ក៏នៅតែបន្តអនុវត្តកិច្ចការនេះ ប៉ុន្តែមានការពង្រីកវិសាលភាពធំជាងមុន គឺគោលនយោបាយសម្បទានដើម្បីសង្គម និងសេដ្ឋកិច្ច ដោយមិនត្រឹមតែផ្ដល់ដីដល់អតីតយុទ្ធជនប៉ុណ្ណោះទេ ប៉ុន្តែថែមទាំងផ្ដល់ដីសម្រាប់កងទ័ព កងនគរបាលជាតិ, អតីតកងទ័ព,អតីតនគរបាលជាតិ និងផ្ដល់ជូនដល់អតីតមន្ត្រីរាជការ ហើយនាពេលខាងមុខក៏នឹងអាចផ្ដល់ជូនមន្ត្រីរាជការដែលកំពុងបម្រើការងារផងដែរ ដើម្បីជួយលើកស្ទួយកម្រិតជីវភាពរបស់ពួកគាត់ឱ្យប្រសើរឡើង ខណៈដែលបច្ចុប្បន្នការអនុវត្តគោលនយោបាយសម្បទានដើម្បីសង្គម និងសេដ្ឋកិច្ច រឺហៅថា LASED បានទទួលលទ្ធផលល្អ និងមានអត្ថប្រយោជន៍ជាច្រើនសម្រាប់សង្គមជាតិ ប៉ុន្តែបញ្ហាប្រឈមក៏នៅតែមាន។
និយាយជារួម ទាំងពេលបច្ចុប្បន្ន និងទៅអនាគត គម្រោង LASED នឹងផ្ដោតលើការកសាងសហគមន៍នៅនឹងកន្លែង ក្នុងភូមិឋានដែលមានស្រាប់ ដោយកសាងបំពេញបន្ថែមនូវហេដ្ឋារចនាសម្ព័ន្ធចាំបាច់នានាដើម្បីបង្កើតដង្ហើមសេដ្ឋកិច្ចសម្រាប់អ្នកទទួលផលពីគម្រោង LASED នេះ។
សូមបញ្ជាក់ថា ការជួបពិភាក្សាគ្នាក្នុងសិក្ខាសាលាខាងលើនេះ គឺដើម្បីវាស់ស្ទង់ និងពិនិត្យមើលថា តើកិច្ចការដែលបានអនុវត្តនាពេលកន្លងមកទទួលបានប្រសិទ្ធភាពយ៉ាងណាខ្លះ និងរួមគ្នាគិតគូរជាមួយអាជ្ញាធរខេត្ត ក្រសួងស្ថាប័នពាក់ព័ន្ធ និងអង្គការដៃគូ ប្រែក្លាយកិច្ចការនេះឲ្យទៅជាកម្លាំងសរុបដើម្បីឧត្តមប្រយោជន៍របស់ប្រជាពលរដ្ឋ និងបង្កើតទស្សនាទានដើម្បីធ្វើឲ្យការរៀបចំគោលនយោបាយសម្បទានដើម្បីសង្គម និងសេដ្ឋកិច្ចនេះកាន់តែប្រសើរឡើងថែមទៀត៕ អត្ថបទ ៖ ហេង វណ្ណា / រូបភាព៖ គ្រី សម្បត្តិ
Account
Security
Favourite Content