សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅក្នុងពិធី«បិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា» នាព្រឹកថ្ងៃទី២៣ ខែមិថុនា ឆ្នាំ២០២៥ នៅខេត្តសៀមរាប ក្រៅពីបានកោតសរសើរដល់ថ្នាក់ដឹកនាំសហភាពសហព័ន្ធយុវជនកម្ពុជា ក្នុងការខិតខំ និងព្យាយាមបង្កើតនូវព្រឹត្តិការណ៍ផ្សេងៗដែលជាប្រយោជន៍សង្គមជាតិ សម្ដេចក៏បានលើកទឹកចិត្តដល់ប្រជាពលរដ្ឋខ្មែរ ចូលរួមគាំទ្រផលិតផលខ្មែរ ហើយប្រឹងប្រែងដាំដុះ ផលិត និងកែច្នៃ ដើម្បីបម្រើដល់ការហូបចុក ក៏ដូចជាការប្រើប្រាស់ខ្លួនឯង។
សម្តេចមហាបវរធិបតី ហ៊ុន ម៉ាណែត បានមានប្រសាសន៍ថា ចាប់តាំងពីមានការបិទច្រកព្រំដែនរវាងកម្ពុជា-ថៃ រហូតមកដល់នេះ បើទោះបីជាមិនមានការនាំចូលនូវបន្លែ និងផ្លែឈើគ្រប់ប្រភេទពីប្រទេសថៃមកកាន់កម្ពុជាក្តី ក៏កម្ពុជាអាចគ្រប់គ្រងទៅលើការផ្គត់ផ្គងស្របតាមតម្រូវការ។ ជាក់ស្ដែង អាជីវករលក់ដូរនៅផ្សារបន្លែ ភួ ពុយ ក្រុងបាត់ដំបង ខេត្តបាត់ដំបង នៅតែមានការផ្គត់ផ្គង់បន្លែគ្រប់គ្រាន់ដល់គ្រប់តម្រូវការរបស់ប្រជាពលរដ្ឋក្នុងខេត្ត ហើយបានបន្តចែកចាយទៅតាមបណ្តាខេត្តមួយចំនួនទៀត ដែលជាបន្លែសរីរាង្គ ធម្មជាតិ ផលិតដោយកសិដ្ឋាន និងកសិករខ្មែរផ្ទាល់។
សូមបញ្ជាក់ថា ស្ថិតនៅក្នុងបរិបថនេះ អាជីវករ ក៏ដូចជាកសិករទិញលក់បន្លែផ្លែឈើបានបង្ហាញនូវការគាំទ្រយ៉ាងពេញទំហឹងទៅលើបទបញ្ជារបស់សម្ដេចតេជោ និងសម្ដេចមហាបវរធិបតី ដែលបានដាក់ផែនការតបទៅភាគីថៃយ៉ាងទាន់ពេលវេលាក្រោយពីភាគីយោធាថៃ បានបិទច្រកព្រំដែនកម្ពុជាដោយឯកតោភាគី ដូច្នេះបច្ចុប្បន្នប្រជាពលរដ្ឋក្នុងខេត្តបាត់ដំបងអាចផ្គត់ផ្គង់ខ្លួនឯងបាន មិនខ្វះបន្លែផ្លែឈើសម្រាប់បរិភោគឡើយ ហើយជាផលិតផលមិនមានសារធាតុគីមីទៀតផង ។
ត្រឹមតែផ្សារបន្លែ ភួ ពុយ មានផ្គត់ផ្គង់បន្លែផ្លែឈើជាច្រើនមុខ ដូចជា ទុរេន សាវម៉ៅ ចេកណាំវ៉ា ខាត់ណា ស្លឹកខ្ទឹម ល្ហុង ប៉េងបោះ ម្ទេស ស្ពៃ ម្អម ជីក្រហម ម្រះព្រៅ ជីរណា ល្ពៅ ៘ គឺជាបន្លែ ផ្លែឈើក្នុងស្រុកទាំងអស់ ហើយដឹកយកទៅចែកចាយបន្តដល់រាជធានីភ្នំពេញ និងខេត្តមួយចំនួនទៀ ជាពិសេស មានផលិតផលពីបណ្ដាស្រុកទាំង១៤ ក្នុងខេត្តបាត់ដំបងប្រហែល៤០០តោនក្នុងមួយថ្ងៃ
លោក ហ៊ិន វុឌ្ឍី អនុប្រធានមន្ទីរពាណិជ្ជកម្មខេត្តបាតដំបង បានឱ្យដឹងទៀតថា ផ្អែកតាមទិន្នន័យពីម្ចាស់ផ្សារបានឱ្យដឹងថា ក្នុងមួយថ្ងៃ មានបន្លែផ្លែឈើគ្រប់មុខនាំចូលមកផ្សារបន្លែ ភួ ពុយ ប្រហែលជាង១ពាន់តោន។ ក្នុងនោះ មានបន្លែនាំចូលពីក្រៅប្រទេស ប្រហែល៦០០តោន រួមមានមកពីប្រទេសចិន និងវៀតណាម ហើយក្រៅពីរាជធានីភ្នំពេញ ខេត្តដែលត្រូវបានបែងចែកបន្ត រួមមាន ខេត្តបន្ទាមានជ័យ សៀមរាបខេត្តពោធិ៍សាត់ និងខេត្តមួយចំនួនទៀត ជាមួយនឹងតម្លៃសមរម្យ មិនមានការដំឡើងថ្លៃនោះទេ។
អ្នកស្រី កៅ សារ៉ាន់ អាជីវករ លក់បន្លែស្ពៃតឿ បានប្រាប់ឱ្យដឹងថា បន្លែដែលអ្នកស្រីដាក់លក់គឺយកមកពីស្រុកបាណន់ ហើយមួយចំនួនទៀតយកមកពីខាងកំពីងពួយ ដែលជាផលិតផលក្នុងស្រុកដាំដុះដោយកសិករខ្មែរ ដោយក្នុងមួួថ្ងៃអ្នកស្រីបាននាំចូលមកទីផ្សារចំនួន៥០០គីឡូក្រាម ។
អ្នកស្រីបានបញ្ជាក់ថា ស្ពៃតឿទិញចូល ១គីឡូក្រាម តម្លៃជាង២០០០រៀល ខណៈលក់ចេញ ៣០០០រៀលប៉ុណ្ណោះ ។ ដោយឡែកបន្លែ ត្រប់ស្រួយ ល្ហុង យកមកពីស្អាង ដោយផ្លែល្ហុងយកមកក្នុងមួយថ្ងៃជាង៣តោន លក់ក្នុងតម្លៃ ៣០០រៀលក្នុងមួយគីឡូក្រាម ឬក្នុងមួយថង់ទម្ងន់១០គីឡូក្រាម ថ្លៃ ៣០០០រៀល ។
ដោយឡែក នៅឯផ្សារទំនើបជីប ម៉ុង , ផ្សារ អ៊ីអន ផ្សារម៉ាក្រូ ក្នុងរាជធានីភ្នំពេញ ក៏មានទទួលយកបន្លែ ផ្លែឈើ ក្នុងស្រុកដាក់លក់ជាមួយតម្លៃសមរម្យមិនខុសពីតម្លៃនៅក្នុងផ្សារប្រពៃណីនោះទេ ដោយផ្លែល្ពៅមួយផ្លែ មានទម្ងន់ប្រមាណ ១,៧ ទៅ២គីឡូក្រាម លក់ត្រឹមតែ ១០០០រៀលប៉ុណ្ណោះ ហើយក្រៅពីនេះក៏មានប្រភេទផ្លែឈើក្នុស្រុកផ្សេងទៀត ដូចជា ទុរ៉េន សាវម៉ាវ មង្ឃុត និងផ្លែស្វាយជាដើម៕
Account
Security
Favourite Content