សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រាជរដ្ឋាភិបាលកម្ពុជា ព្រមគ្នាជាមួយនឹងអង្គការសង្គមស៊ីវិល រួមទាំងក្រុមការងាររបស់ស្ត្រីជាច្រើនបូករួមទាំងភ្នាក់ងារតំណាងរបស់អង្គការសហប្រជាជាតិដែលពាក់ព័ន្ធផងដែរ កាលពីពេលថ្មីៗនេះបានដាក់ឲ្យដំណើរការនូវគម្រោងមួយបន្ថែមទៀតដែលមានគោលបំណងសំខាន់លើកកម្ពស់ភាពធន់របស់ស្ត្រីនៅកម្ពុជាក្នុងការទទួលបានអំណាចដើម្បីសម្រេចចិត្តទៅលើបញ្ហាបម្រែបម្រួលអាកាសធាតុ និងគ្រោះធម្មជាតិដែលកើតមាននៅក្នុងប្រទេស។
គម្រោងសម្រាប់ប្រទេសកម្ពុជានេះគឺជាផ្នែកមួយនៃគម្រោងមេរបស់អង្គការសហប្រជាជាតិសម្រាប់ស្ត្រីក្នុងការចូលរួមសម្របសម្រួលដល់បញ្ហាបរិស្ថាននៅក្នុងតំបន់អាស៊ីប៉ាស៊ីហ្វិក ដែលកន្លងមករដ្ឋាភិបាលនៃប្រទេសស្វីសក៏ធ្លាប់បានផ្តល់ជំនួយជាគម្រោងមួយរួចមកហើយសម្រាប់ការអនុវត្តឆ្នាំ២០១៨ ដល់ឆ្នាំ២០២២ ដែលគម្រោងនេះមានឈ្មោះថា Empowering Women to Secure Climate-resilient Societies។
ការដាក់ឲ្យអនុវត្តការងារគម្រោងដែលធ្វើឡើងកាលពីថ្ងៃទី២៩ ខែសីហា កន្លងមក ក្រោមវត្តមាននៃការចូលរួមពីសំណាក់ប្រតិភូសរុបចំនួន៧០នាក់ ដោយក្នុងនោះក៏មានសមាជិកមកពីក្រុមការងារស្ត្រីពីបណ្តាលខេត្តជាច្រើន និងសុទ្ធតែជាតំបន់ដែលងាយនឹងទទួលរងគ្រោះដោយសារបញ្ហាបម្រែបម្រួលអាកាសធាតុ។
កិច្ចពិភាក្សាត្រូវបានធ្វើឡើងក្នុងពិធីជួបជុំលើកនេះដោយផ្តោតលើបញ្ហាបម្រែបម្រួលអាកាសធាតុ និងការកាត់បន្ថយភាពប្រឈមមុខនឹងគ្រោះថ្នាក់ដោយសារគ្រោះធម្មជាតិ ក៏ដូចជាការសិក្សារៀនសូត្រទៅលើគោលនយោបាយថ្នាក់ជាតិផងដែរ។
ការដោះដូរគំនិតគ្នាត្រូវបានធ្វើឡើងជាមួយនឹងប្រធានបទផ្សេងៗគ្នា ដូចជា តួនាទីរបស់ស្ត្រីក្នុងការសម្រេចចិត្តលើបញ្ហាបម្រែបម្រួលអាកាសធាតុ និងការកាត់បន្ថយការគ្រោះថ្នាក់ដោយសារគ្រោះធម្មជាតិ ការពង្រឹងជំនាញ និងភេទ អាយុ និងទិន្នន័យ ដើម្បីប្រើប្រាស់សម្រាប់ជាគោលនយោបាយកាត់បន្ថយហានិភ័យ, គ្រោះមហន្តរាយ, ការដាក់បញ្ចូលគ្នារវាងកង្វល់ និងភាពធន់របស់ស្ត្រីនៅក្នុងក្របខ័ណ្ឌគោលនយោបាយជាតិ និងការប្រើប្រាស់ថាមពលកកើតឡើងវិញជាដើម។
សមាជិក២នាក់ក្នុងចំណោមអ្នកចូលរួមបានបញ្ចេញយោបល់ និងបង្ហាញនូវការព្រួយបារម្ភពួកគេចំពោះសហគមដែលពួកគេកំពុងរស់នៅ ដូចជា៖
លោកស្រី ហង្ស សំនឿន សមាជិកមកពីក្រុមការងារស្ត្រីខេត្តកំពតបាននិយាយឱ្យដឹងថា វាគឺជាលើកដំបូងរបស់គាត់ក្នុងការបបញ្ចេញមតិជាមួយនឹងមន្ត្រីជាន់ខ្ពស់របស់រដ្ឋាភិបាល។ គាត់មានអារម្មណ៍ភ័យខ្លាចបន្តិច ប៉ុន្តែមានមោទនភាព និងភាពស្មោះត្រង់ក្នុងការនិយាយពីតម្រូវការនៃសហគមរបស់គាត់។
លោកស្រីពោលថា ៖
“នៅក្នុងសហគម បញ្ហាដែលកំពុងជួបប្រទះនៅពេលនេះគឺជាបញ្ហាទឹកជំនន់ បញ្ហាខ្យល់កន្ត្រាក់ និងបញ្ហាគ្រោះរាំងស្ងួតជាដើម”
ដោយឡែកលោកស្រី នៅ ស៊ីភណ្ឌ សមាជិកមកពីក្រុមការងារស្ត្រីនៅខេត្តពោធ៍សាត់បានថ្លែងឱ្យដឹងថា គាត់ពិតជាមានអារម្មណ៍រីករាយដែលអាចចូលរួមការរៀនសូត្រ និងស្វែងយល់ពីក្រុមមន្ត្រីរដ្ឋាភិបាល ហើយលោកស្រីនឹងបន្តចែករំលែកចំណេះដឹង និងព័ត៌មានទាំងនេះទៅកាន់ប្រជាជនដែលជាអ្នករស់នៅក្នុងសហគមរបស់គាត់ផងដែរ ជាពិសេសស្ត្រីដើម្បីអាចចូលរួមក្នុងសកម្មភាពដែលពាក់ព័ន្ធទៅនឹងបញ្ហាទាំងនោះឲ្យបានកាន់តែច្រើនឡើង៕
Account
Security
Favourite Content