សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមអគ្គនាយកដ្ឋានគយ និងរដ្ឋាករកម្ពុជា(GDCE)បានបង្ហាញថា ក្នុងរយៈពេល១១ខែ ឆ្នាំ២០២៤ ទឹកប្រាក់នៃការនាំចេញ-នាំចូលទំនិញរវាងកម្ពុជាជាមួយប្រទេសដៃគូទាំងអស់ មានចំនួនប្រមាណជិត ៥០ពាន់លានដុល្លារ កើនឡើងជាង១៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣។ ក្នុងចំនួននេះ ទំហំទឹកប្រាក់នាំចេញរបស់កម្ពុជាមានចំណែក ៤៨ ភាគរយ។
ស្ថិតិពាណិជ្ជកម្មអន្តរជាតិរបស់កម្ពុជា ចេញផ្សាយកាលពីថ្ងៃទី១០ ខែធ្នូ បានឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ២០២៤ ការផ្លាស់ប្តូរទំនិញរបស់កម្ពុជា ជាមួយទីផ្សារអន្តរជាតិមានទឹកប្រាក់សរុប ៤៩,៨៧ ពាន់លានដុល្លារ កើនឡើង ១៧,៤ ភាគរយពីចំនួន ៤២,៥ ពាន់លានដុល្លារអាមេរិក បើធៀបនឹងរយៈពេលដូចគ្នាឆ្នាំ ២០២៣ ។ ក្នុងនោះទំនិញកម្ពុជានាំទៅក្រៅប្រទេសមាន ២៣,៩៣ ពាន់លានដុល្លារ កើនឡើង ១៦,៨ ភាគរយ និងទំនិញនាំចូល ២៥,៩៤ ពាន់លានដុល្លារ កើន ១៧,៩ ភាគរយ។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានថ្លែងថា ការនាំចេញទំនិញរបស់កម្ពុជាទៅទីផ្សារអន្តរជាតិបានបង្ហាញពីភាពវិជ្ជមានជាបន្តបន្ទាប់ និងមានទីផ្សារគោលដៅកាន់តែច្រើន ខុសប្លែកពីពេលមុនដែលការនាំចេញភាគច្រើនផ្តោតទៅទីផ្សារសហរដ្ឋអាមេរិក និងតំបន់អឺរ៉ុបដោយសារក្រុមប្រទេសនេះបានផ្តល់ប្រព័ន្ធអនុគ្រោះពន្ធគយលើការនាំចូលទំនិញផលិតនៅកម្ពុជា។ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់(RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បានក្លាយជាចលករយ៉ាងសំខាន់ក្នុងការជំរុញកំណើនពាណិជ្ជកម្ម ។
ឯកឧត្តម ប៉ែន សុវិជាតិ បានបញ្ជាក់ថា ៖
«ការធ្វើពាណិជ្ជកម្មរបស់កម្ពុជា គឺយើងមិនពឹងផ្អែកលើប្រព័ន្ធអនុគ្រោះទាំងស្រុងនោះទេ អ៊ីចឹងយើងឃើញថា នាពេលថ្មីៗនេះ ក្រសួងពាណិជ្ជកម្មបានជំរុញការចរចាបង្កើតនូវកិច្ចព្រមព្រៀងពាណិជ្ជកម្មសេរីជាច្រើន យើងក៏ស្ថិតក្នុងប្រព័ន្ធនៃកិច្ចព្រមព្រៀងពាណិជ្ជកម្មសេរីមួយដែលចាត់ទុកថាជាសម្ព័ន្ធដែលមានទំហំសេដ្ឋកិច្ចធំនៃក្របខណ្ឌ RCEP»។
លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិ រាជបណ្ឌិត្យសភាកម្ពុជា បានប្រាប់ AMS ថា កំណើនទំហំពាណិជ្ជកម្មអន្តរជាតិ-កម្ពុជា នៅពេលនេះ គឺជាដង្ហើមសេដ្ឋកិច្ចដ៏សំខាន់ ហើយប្រទេសជាច្រើនលើសកលលោកតែងតែចង់បានកំណើននៃការនាំចេញ។
លោកបណ្ឌិតផ្នែកសេដ្ឋកិច្ចរូបនេះ បានលើកឡើងថា ៖
«ទី១ យើងមើលពីកម្លាំងផលិតកម្ម ជាក់ស្ដែង យើងមានការកើនឡើងនៃសមត្ថភាពផលិតកម្មនៅកម្ពុជា ដោយសារវិស័យមួយចំនួនបានដំណើរការ និងខ្លះកំពុងតែកសាងរោងចក្រដែលមិនមែនវាយនភណ្ឌកាត់ដេរ ជាទំនិញសក្តានុពលនាំចេញសំខាន់ៗ រួមមាន ៖ ស្បែកជើង កាបូប សម្ភារៈសម្រាប់ធ្វើដំណើរ សូឡា កង់ រថយន្ត គ្រឿងបង្គំអេឡិចត្រូនិក-អគ្គិសនី និងផលិតផលសម្បកកង់រថយន្តជាដើម។ ក្រៅពីនោះកម្ពុជាក៏មានឱកាសក្នុងបង្កើនទឹកប្រាក់នាំចេញរបស់ខ្លួនតាមរយៈការជំរុញការដាំដុះ បង្កើនកម្លាំងផលិតកម្ម និងកែច្នៃផលិតផលកសិកម្ម ដើម្បីមានការនាំចេញ ហើយយើងក៏មានកសិផលសក្តានុពល ស្រូវ អង្ករ កៅស៊ូ ចន្ទី ចេកដំបូងលឿង ដំឡូងមី បន្លែ ផ្លែឈើ យើងអាចនាំចេញទៅបានច្រើន ហើយទឹកប្រាក់នាំចេញរបស់កម្ពុជានឹងបន្តកើនឡើងថែមទៀត»។
ទន្ទឹមនេះដែរ លោកបញ្ឌិតបានបញ្ជាក់ថា ការទិញទំនិញរបស់កម្ពុជា ជាពិសេសពការនាំចេញ គឺដោយសារបណ្ដារោងចក្រផលិតកម្មនៅកម្ពុជាមានការគោរពសិទ្ធិកម្មករ មានប្រាក់បៀវត្សកម្មករ និយោជិត សមរម្យ យកចិត្តទុកដាក់ទៅលើសុខុមាលភាព ទើបធ្វើឱ្យការបញ្ជាទិញសម្រាប់កម្ពុជាមានសម្ទុះ និងកំណើន ហើយក៏មិនមានសញ្ញាធ្លាក់ថមថយនៅឡើយទេ។
សូមជ្រាបថា ពាណិជ្ជកម្មអន្តរជាតិ – កម្ពុជា ឆ្នាំ២០២៣ មានទឹកប្រាក់សរុប ៤៦,៨៣ ពាន់លានដុល្លារ ធ្លាក់ចុះ ១,៩ ភាគរយបើធៀបឆ្នាំ២០២២ ដែលមាន ៤៧,៧១ពាន់លានដុល្លារ។ ក្នុងនោះទំនិញកម្ពុជានាំចេញមានចំនួន ២២,៦៥ ពាន់លានដុល្លារ កើនឡើង ១,៨ភាគរយ និងការនាំចូលទំនិញមានទឹកប្រាក់ ២៤,១៨ ពាន់លានដុល្លារ ធ្លាក់ចុះ៥ភាគរយពីចំនួន២៥,៤៦ ពាន់លានដុល្លារ៕
Account
Security
Favourite Content