សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ សិង្ហបុរី នឹងដាក់ចេញកញ្ចប់ថវិកាគាំទ្រដល់កុមារក្នុងម្នាក់ជិត ៧ ម៉ឺនដុល្លារសិង្ហបុរី រហូតដល់អាយុ ១៧ ឆ្នាំ រួមនឹងការចេញវិធានការគាំទ្រផ្សេងៗទៀត ដែលការគាំទ្រនេះដោយសារតែអត្រាកំណើតធ្លាក់ចុះយ៉ាងខ្លាំង នេះបើយោងតាមសេចក្ដីរាយការណ៍ពី Press Insider។
កុមារសិង្ហបុរី ក្នុងម្នាក់នឹងទទួលបានការគាំទ្រពីរដ្ឋជិត ៧ ម៉ឺនដុល្លារសិង្ហបុរី (ប្រហែល ៥៥ ១៤០ដុល្លារអាម៉េរិក) រហូតដល់អាយុ ១៧ ឆ្នាំ។ លើសពីនេះ រដ្ឋាភិបាលក៏បន្ថែមថ្ងៃឈប់សម្រាកសម្រាប់ឪពុកម្ដាយដើម្បីមើលថែទាំកូន ការឧបត្ថម្ភធនសម្រាប់សាលាមត្តេយ្យ និងជំនួយលំនៅឋានផងដែរ ដោយសារកំពុងប្រឈមមុខនឹងអត្រាកំណើតធ្លាក់ចុះយ៉ាងគំហុក។ កាលពីថ្ងៃអាទិត្យកន្លងទៅនេះ នាយករដ្ឋមន្ត្រី លោក Lawrence Wong បានប្រកាសពីវិធានការទាំងនេះក្នុងអំឡុងពេលសុន្ទរកថាទិវាជាតិដោយលើកឡើងថា រដ្ឋាភិបាលចង់សម្រួលដល់ពលរដ្ឋសិង្ហបុរីក្នុងការចាប់ផ្តើមគ្រួសារ និងចិញ្ចឹមកូនឲ្យកាន់តែមានភាពងាយស្រួលជាងមុន។
កញ្ចប់ថវិកាថ្មីនេះនឹងផ្តល់ប្រាក់ចាប់តាំងពីកុមារកើតរហូតដល់អាយុ ១៧ ឆ្នាំដោយរួមបញ្ចូលនូវ ៖
- ប្រាក់ឧបត្ថម្ភសាច់ប្រាក់សរុប ៤២ ០០០ ដុល្លារសិង្ហបុរី ៖ កាដូសាច់ប្រាក់ ១០ ០០០ ដុល្លារសិង្ហបុរីក្នុងឆ្នាំដំបូង និងផ្តល់ជាឥណទានប្រចាំឆ្នាំ ២ ០០០ ដុល្លារសិង្ហបុរីចាប់ពីអាយុ ១ ឆ្នាំដល់ ១៦ឆ្នាំ។
- គណនីអភិវឌ្ឍន៍កុមារ និងការអប់រំ៖ ទទួលបានជំនួយឥតសំណង ៥ ០០០ ដុល្លារសិង្ហបុរីក្នុងគណនីសន្សំពិសេសរបស់កុមារ។ រដ្ឋាភិបាលនឹងរួមចំណែកដាក់ប្រាក់បន្ថែមស្មើនឹងទឹកប្រាក់សន្សំរហូតដល់ ៥ ០០០ ដុល្លារសិង្ហបុរី។ នៅពេលពួកគេមានអាយុ ១៧ ឆ្នាំ រដ្ឋាភិបាលនឹងថែមជូន ១០ ០០០ ដុល្លារសិង្ហបុរីទៀតចូលទៅក្នុងគណនីអប់រំក្រោយមធ្យមសិក្សា។
- ជំនួយបន្ថែមផ្សេងទៀត៖ ប្រាក់ឧបត្ថម្ភ MediSave សម្រាប់ទារកទើបនឹងកើតចំនួន ៥ ០០០ដុល្លារសិង្ហបុរី និងជំនួយផ្នែកអប់រំប្រហែល ២ ៥០០ ដុល្លារសិង្ហបុរី។
យោងតាមសារព័ត៌មាន CNA បានឱ្យដឹងថា កុមារជាង ៦១០ ០០០ នាក់ក្នុងចំណោមគ្រួសារប្រមាណ ៣៨០ ០០០ ត្រូវបានរំពឹងថា នឹងទទួលបានផលប្រយោជន៍ទាំងនេះ។ ជំនួយផ្នែកហិរញ្ញវត្ថុនេះ គឺជាផ្នែកមួយនៃកិច្ចខិតខំប្រឹងប្រែងដើម្បីលើកទឹកចិត្ត និងកាត់បន្ថយសម្ពាធនានាដែលរារាំងពលរដ្ឋសិង្ហបុរីមិនឱ្យចង់មានកូន។ មិនត្រឹមតែប៉ុណ្ណោះ រដ្ឋាភិបាលក៏បន្ថែមថ្ងៃឈប់សម្រាក និងការបញ្ចុះតម្លៃសាលាមត្តេយ្យផងដែរ។ ឪពុកម្តាយដែលកំពុងធ្វើការនឹងទទួលបានថ្ងៃឈប់សម្រាក ៨ ថ្ងៃក្នុងមួយឆ្នាំ ប្រសិនបើមានកូនមួយអាយុ ១២ ឆ្នាំ ឬ ក្រោមនេះ, ១០ ថ្ងៃសម្រាប់អ្នកមានកូន២, និង ១២ថ្ងៃសម្រាប់កូន ៣ ឬ ច្រើនជាងនេះ។ មិនត្រឹមតែប៉ុណ្ណោះ រដ្ឋាភិបាលក៏នឹងសងប្រាក់ជូននិយោជកវិញផងដែរសម្រាប់ការសុំច្បាប់ទាក់ទងនឹងកូន ដូចជា ការសម្រាលកូន ការឈប់សម្រាកភាពជាឪពុក ការសុំកូនចិញ្ចឹម ការឈប់សម្រាករួមគ្នារបស់ឪពុកម្តាយ និងការឈប់សម្រាកថែទាំកូន។ លើសពីនេះ រដ្ឋាភិបាលនឹងគាំទ្រដល់ការបញ្ចុះតម្លៃសេវាសាលាមត្តេយ្យ និងការថែទាំកូនផងដែរ។ តម្លៃសាលាមត្តេយ្យនឹងត្រូវកាត់បន្ថយជាដំណាក់កាលចាប់ពីឆ្នាំ ២០២៨ តទៅ ខណៈដែលថ្លៃសេវាប្រចាំខែនៅតាមមណ្ឌលដែលគាំទ្រដោយរដ្ឋនឹងកាត់បន្ថយឱ្យមកត្រឹម ១៥០ ដុល្លារសិង្ហបុរីសម្រាប់ការថែទាំកូនពេញមួយថ្ងៃ និង ៣០០ ដុល្លារសិង្ហបុរីសម្រាប់ការថែទាំទារកត្រឹមឆ្នាំ ២០៣០។ បច្ចុប្បន្ន គ្រួសារសិង្ហបុរីត្រូវបង់ប្រាក់ជិត ៦០០ ដុល្លារសិង្ហបុរីក្នុងមួយខែសម្រាប់ការថែទាំពេញមួយថ្ងៃ និងជាង ១ ០០០ ដុល្លារសិង្ហបុរីសម្រាប់ការថែទាំទារក។
ជាមួយគ្នានេះ ដើម្បីផ្តល់ឱកាសឱ្យពលរដ្ឋកាន់តែច្រើនអាចមានលទ្ធភាពទិញផ្ទះឧបត្ថម្ភធនដោយរដ្ឋ (BTO) រដ្ឋាភិបាលបានដំឡើងកម្រិតប្រាក់ចំណូលអតិបរមាប្រចាំខែរបស់គ្រួសារ។ សម្រាប់ប្រភេទលំនៅឋាន BTO (សាងសង់បន្ទាប់ពីឈ្នះការចាប់ឆ្នោតទិញផ្ទះ) គ្រួសារដែលមានកម្រិតប្រាក់ចំណូលប្រចាំខែអតិបរមា ១ ៦០០០ ដុល្លារសិង្ហបុរី អាចមានសិទ្ធិដាក់ពាក្យទិញ (កើនពីកម្រិតអតិបរមាបច្ចុប្បន្ន ១ ៤០០០ ដុល្លារសិង្ហបុរី)។ សម្រាប់ប្រភេទខនដូរប្រណិត កម្រិតប្រាក់ចំណូលប្រចាំខែអតិបរមា ១ ៨០០០ ដុល្លារសិង្ហបុរី (កើនពីអត្រាបច្ចុប្បន្ន ១ ៦០០០ ដុល្លារសិង្ហបុរី)។ ចាប់ពីខែកុម្ភៈ ឆ្នាំ២០២៧ តទៅ សម្រាប់គ្រួសារទើបដាក់ពាក្យស្នើសុំទិញផ្ទះរដ្ឋ BTO ជាលើកដំបូង ពួកគេនឹងទទួលបានសិទ្ធិចាប់ឆ្នោតបន្ថែមទៀតអាស្រ័យលើចំនួនកូន (កូនមួយ ចាប់ឆ្នោតបានមួយដង)៕
Account
Security
Favourite Content