ចន្ទី ជាប្រភេទដំណាំឧស្សាហកម្មមួយដែលក្រុមហ៊ុនក្នុងស្រុកជាច្រើនកំពុងកែច្នៃជាផលិតផលសម្រេចដើម្បីនាំចេញទៅទីផ្សារក្រៅប្រទេស។ ក្នុងនោះ ស្វាយចន្ទីស្ទឹងត្រែងក៏កំពុងមានទីផ្សារខ្ពស់ក្នុងការផលិត និងនាំចេញទៅក្រៅប្រទេស ពិសេសជាផ្នែកមួយជួយលើកកម្ពស់ជីវភាពប្រជាជនមូលដ្ឋាន។

កញ្ញា សឿន សុទ្ធនីតា ឬគេហៅថា Ms. Cashew ជាសហស្ថាបនិក ទទួលបន្ទុកផ្នែកអភិវឌ្ឍន៍ពាណិកម្ម នៅក្រុមហ៊ុន ហ៊ែនក្រាហ្វធីត ឃែស៊ូ ណាត់ ស្ទឹងត្រែង បានមានប្រសាសន៍ថា បច្ចុប្បន្នស្វាយចន្ទីស្ទឹងត្រែង កំពុងផលិតនិងនាំចេញទៅប្រទេសចំនួន៥ ហើយវាក៏ជាផ្នែកមួយផ្ដល់ការងារ និងចំណេះដឹងដល់ប្រជាជនក្នុងតំបន់។

កញ្ញាបញ្ជាក់ថា៖

«បច្ចុប្បន្នក្រុមហ៊ុនយើងមានសមត្ថភាពផលិត ពី ៣៦០-៤០០តោន ក្នុងមួយឆ្នាំ ហើយនឹងគ្រោងពង្រើកដល់ ៦០០០ តោនក្នុងមួយឆ្នាំនាពេលឆាប់ៗនេះ។ ទីផ្សាររបស់ស្វាយចន្ទីស្ទឹងត្រែង ក្រៅពីផ្គត់ផ្គង់នៅក្នុងស្រុកហើយ ពួកយើងក៏បាននាំចេញទៅកាន់បណ្តាប្រទេសផ្សេងៗដូចជា ជប៉ុន កូរ៉េ អាមេរិក អង់គ្លេស និងសឹង្ហបុរីថែមទៀតផង»។

ក្នុងការចាប់ផ្ដើម កញ្ញាក៏បានចូលរួមវគ្គបណ្ដុះបណ្ដាលពីគម្រោងកម្ពុជាហវែស២ ហើយបានប្តេជ្ញាចិត្តយ៉ាងមុតមាំ គឺដើម្បីលើកម្ពស់ខ្សែច្រវ៉ាក់ផលិកម្មស្វាយចន្ទីក្នុងស្រុកឲ្យកាន់តែប្រសើរ ធ្វើការកែច្នៃដើម្បីនាំចេញ ផ្តល់ឱកាសការងារ និងបង្កើនប្រាក់ចំណូលដល់ជូនកសិករ ប្រជាជនយើង មានជាច្រើនជាយុវជន ស្ត្រី និងជនជាតិភាគតិច​មកពីទីជនបទដាច់ស្រយាលផងដែរ។

ក្រៅពីបង្កើតការងារ ក្រុមហ៊ុនក៏បានបើកវគ្គបណ្តុះបណ្តាល ដើម្បីពង្រឹងសមត្ថភាពចំណេះដឹងជូនកសិករ ប្រមាណ ១៥ដង​ ដែលមានកសិករចូលរួមបានជាង ១០០០នាក់ ខណៈការបណ្ដុះបណ្ដាលនោះផ្ដោតលើបច្ចេកទេសដាំដុះ បច្ចេកទេសថែទាំ ការប្រមូលផលឲ្យបានត្រឹមត្រូវ ការអនុវត្តកសិកម្មល្អ រួមទាំងបច្ចេកទេសកសិកម្មវ័យឆ្លាតផងដែរ។ ជាងនេះទៅទៀត ក្រុមហ៊ុនបានបណ្ដុះបណ្ដាលជូនកសិករឲ្យបានយល់ដឹងអំពីអំពីបរិស្ថាន អាកាសធាតុ អនាម័យ និងសុវត្ថិភាព ដើម្បីកាត់បន្ថយនូវតម្លៃថ្លៃដើមនៃការផលិត ទទួលបានទាំងទិន្នផលល្អ និងគុណភាពល្អរបស់គ្រាប់ស្វាយចន្ទីផ្ទាល់តែម្ដង។

គួរបញ្ជាក់ដែរថា អាជីវកម្មនេះត្រូវបានបង្កើតឡើងនៅចុងឆ្នាំ២០២១ ដោយសារតែឥទ្ធិពលនៃបញ្ញាជំងឺកូវីដ-១៩ ធ្វើឱ្យកសិករជួបផលលំបាក ជាពិសេសបញ្ហាអ្នកផលិតគ្រាប់ស្វាយចន្ទីទាំងអស់បានជួបប្រទះដូចជាអស្ថិរភាព​នៃតម្លៃក្នុងការលក់គ្រាប់ស្វាយចន្ទីឆៅតាមរយៈឈ្មួញកណ្ដាល ដែលឱ្យតម្លៃមិនសមរម្យ។ ដោយមើលឃើញចំណុចអវិជ្ជមានទាំងនេះ កញ្ញា និងក្រុមគ្រួសារបានចាប់ផ្ដើមសិក្សាស្រាវជ្រាវអំពីសក្ដានុពល និងបច្ចេកទេសក្នុងការកែច្នៃស្វាយចន្ទីកម្ពុជាដើម្បីនាំចេញទោក្រៅប្រទេស។

កញ្ញាបានបញ្ជាក់ថា ៖

«ទន្ទឹមនឹងប្រទេសកម្ពុជា ជាអ្នកផលិតគ្រាប់ស្វាយចន្ទីច្រើនជាងគេលំដាប់ពិភពលោក នាងខ្ញុំមានមហិច្ឆិតាចង់ពង្រីកអាជីវកម្មនេះ ចង់ធ្វើឲ្យកម្ពុជាក្លាយទៅអ្នកនាំមុខក្នុងវិស័យស្វាយចន្ទី ជាអ្នកផលិតនាំមុខ ជាអ្នកកែច្នៃនាំមុខ ហើយក៏ជាអ្នកនាំចេញឈានមុខនូវផលិតសម្រេចនៃគ្រាប់ស្វាចន្ទីគេនៅលើទីផ្សារអន្តរជាតិ។ ពួកយើងមានគោលដៅធ្វើឲ្យគ្រាប់ស្វាយចន្ទីកម្ពុជា ល្បីសុះសាយពេញឆាកអន្តរជាតិ ដើម្បីមោទនភាពជាតិ កម្ពុជានៃយើង»។

ជាមួយគ្នានេះ ក្រុមហ៊ុនក៏បានបង្ហាញពីចក្ខុវិស័យក្នុងការអភិវឌ្ឍសហគមន៍ជនបទដាច់ស្រយាលឲ្យមានភាពកាន់តែប្រសើឡើង ដោយបង្កើតនូវច្រវ៉ាក់ផលិតកម្មមូលដ្ឋាន ដើម្បីបង្កើតឱកាសការងារ និងបង្កើនប្រាក់ចំណូលជូនប្រជាជនក្នុងមូលដ្ឋាន ជាពិសេសនោះគឺបងប្អូនកសិករ។ បន្ថែមពីលើនេះ ស្ត្រីគឺជាអាទិភាពក្នុងការទទួលបានការងារ ដោយ ៨០% នៃបុគ្គលិកគឺជាស្រ្តី ដែលពួកគាត់​ខ្លះ​ជា​ស្ត្រី​មេម៉ាយ យុវតី និងខ្លះទៀតជា​ក្រុមជនជាតិភាគតិច​ដែល​មាន​ជីវភាព​ខ្វះខាត។

នៅក្នុងដំណើរអាជីវកម្មនេះ ក្រុមហ៊ុនបានជួបប្រទះនូវបញ្ហាផ្សេងៗជាច្រើន ដូចជា ការដឹកជញ្ជូនមានតម្លៃខ្ពស់ សមត្ថភាពផលិតទាប គឺមិនទាន់បំពេញតម្រូវការអតិថិជនបានគ្រប់គ្រាន់នៅឡើយ មានការប្រកួតប្រជែងខ្លាំងក្នុងទីផ្សារអន្តរជាតិ។ មួយវិញទៀតគឺកង្វះធនធានមនុស្សដោយសារទីតាំងផលិតនៅជនបទ ត្រូវចំណាយពេលបង្រៀនបុគ្គលិកជាច្រើនដង។ យ៉ាងណាមិញ ក្រុមហ៊ុនមានចក្ខុវិស័យមួយ គឺចង់ឲ្យគ្រាប់ស្វាយចន្ទីដែលមានគុណភាពល្អបំផុត ចាប់យកបេះដូងរបស់មនុស្សគ្រប់វ័យនៅជុំវិញពិភពលោក ជាអាហារសម្រន់ដែលផ្តល់សុខភាពល្អ ក្លាយជាជម្រើសនៅទីផ្សារក្នុងស្រុក និងអន្តរជាតិ ដែលនឹងជំរុញដល់សេដ្ឋកិច្ចជនបទឲ្យមានភាពរីកចម្រើន និងរស់រវើក។

ចុងក្រោយ កញ្ញា ក៏មានមតិចែករំលែកដែរថា សម្រាប់អ្នកកែច្នៃគ្រាប់ស្វាយចន្ទីដើរតួនាទីយ៉ាងសំខាន់ក្នុងឧស្សាហកម្មម្ហូបអាហារ ជាអ្នកទទួលខុសត្រូវក្នុងការប្រែក្លាយគ្រាប់ស្វាយចន្ទីឆៅទៅជាអាហារសម្រន់ដ៏ឆ្ងាញ់ គឺត្រូបការខិតខំប្រឹងប្រែង និងការលះបង់ ហើយក៏មានឥទ្ធិពលយ៉ាងខ្លាំងដល់ជីវភាពរបស់កសិករ និងគ្រួសាររបស់ពួកគាត់ ដែលពឹងផ្អែកលើគ្រាប់ស្វាយចន្ទីជាប្រភពចំណូលចម្បង។  ដូច្នេះសូមចូលរួមប្តេជ្ញាក្នុងការអភិវឌ្ឍទិន្នផលចន្ទី និងសូមបន្តការងារដ៏ល្អ ហើយបន្តការកែច្នៃគ្រាប់ស្វាយចន្ទីឲ្យមានគុណភាព អនាម័យ និងសុវត្ថិភាព នាំចេញទៅកាន់ទីផ្សារអន្តរជាតិ ធ្វើឲ្យប្រទេសកម្ពុជាក្លាយទៅជាអធិរាជចន្ទី នាំចេញនូវចន្ទីសម្រេចលើឆាកអន្តរជាតិ នាំមកវិញនូវកេរ្ត៍ឈ្មោះជូនជាតិ និងមាតុភូមិ៕