សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋាភិបាលថ្មីរបស់ប្រទេសប៊ុលហ្គារីបានអនុម័តសេចក្តីព្រាងវិសោធនកម្មច្បាប់ស្តីពីល្បែងស៊ីសង ដោយស្នើហាមឃាត់ទាំងស្រុងការផ្សាយពាណិជ្ជកម្មល្បែងស៊ីសង ព្រមទាំងដំឡើងពន្ធ និងកម្រៃអាជ្ញាប័ណ្ណឱ្យខ្ពស់ជាងមុន។ សេចក្តីព្រាងច្បាប់នេះក៏មានវិធានការរឹតបន្តឹងប្រតិបត្តិការហិរញ្ញវត្ថុក្នុងវិស័យល្បែងស៊ីសង និងវិស័យសំណង់ផងដែរ។
យោងតាមការចេញផ្សាយរបស់សារព័ត៌មាន Novinata វិធានការថ្មីនេះមានគោលបំណងទប់ស្កាត់ការលេងល្បែងស៊ីសងក្នុងចំណោមក្រុមពលរដ្ឋងាយរងគ្រោះ និងសិស្សានុសិស្ស។ សេចក្តីព្រាងច្បាប់បានស្នើហាមឃាត់រាល់ទម្រង់នៃការផ្សាយពាណិជ្ជកម្មល្បែងស៊ីសង និងបញ្ឈប់សកម្មភាពរបស់ភ្នាក់ងារផ្សព្វផ្សាយបន្ត (Affiliate Operators) ទាំងអស់។
ទោះជាយ៉ាងណា ប្រតិបត្តិករល្បែងស៊ីសងនៅតែអាចបង្ហាញស្លាកសញ្ញារបស់ខ្លួនក្នុងកម្រិតកំណត់ ក្នុងករណីឧបត្ថម្ភដល់ក្លឹបកីឡា ឬគាំទ្រវិស័យវប្បធម៌ សុខាភិបាល និងអប់រំ។
ទន្ទឹមនឹងការរឹតបន្តឹងការផ្សាយពាណិជ្ជកម្ម រដ្ឋាភិបាលក៏គ្រោងដំឡើងកម្រៃអាជ្ញាប័ណ្ណ និងពន្ធលើអាជីវកម្មពាក់ព័ន្ធនឹងល្បែងស៊ីសងផងដែរ។ ក្រុមហ៊ុនផ្គត់ផ្គង់ និងថែទាំឧបករណ៍ល្បែងនឹងត្រូវបង់កម្រៃអាជ្ញាប័ណ្ណរដ្ឋចំនួន ៥០.០០០ អឺរ៉ូ សម្រាប់រយៈពេល ៥ ឆ្នាំ និង ១០០.០០០ អឺរ៉ូ សម្រាប់រយៈពេល ១០ ឆ្នាំ។
ចំណែកប្រតិបត្តិករភ្នាល់តាមអនឡាញ នឹងត្រូវបង់កម្រៃអាជ្ញាប័ណ្ណក្នុងកម្រិតយ៉ាងតិច ១០០.០០០ អឺរ៉ូក្នុងមួយខែ។ ជាមួយគ្នានេះ រដ្ឋាភិបាលក៏មានផែនការដំឡើងប្រាក់ពិន័យ និងបង្កើនវិភាគទានសង្គមលើប្រតិបត្តិករក្នុងវិស័យនេះផងដែរ។
ប្រភពដដែលបានឱ្យដឹងថា សម្រាប់កាស៊ីណូ និងកន្លែងលេងល្បែងដោយផ្ទាល់ ពន្ធជំនួសនឹងត្រូវដំឡើងនៅឆ្នាំ ២០២៧ មុនពេលផ្លាស់ប្តូរទៅជាប្រព័ន្ធពន្ធរដ្ឋពីរផ្នែកនៅឆ្នាំ ២០២៨។
លើសពីនេះ ដើម្បីពង្រឹងការត្រួតពិនិត្យហិរញ្ញវត្ថុ ក្រុមហ៊ុនបរទេសដែលផ្តល់សេវាភ្នាល់តាមអនឡាញនឹងត្រូវមានទីតាំងអាជីវកម្មនៅក្នុងប្រទេសប៊ុលហ្គារី។ ធនាគារ និងគ្រឹះស្ថានទូទាត់ប្រាក់ដែលពាក់ព័ន្ធនឹងប្រតិបត្តិការល្បែងស៊ីសងក៏នឹងត្រូវបង់វិភាគទានជាកាតព្វកិច្ចផងដែរ។
ជាមួយគ្នានេះ ប្រព័ន្ធអប់រំនឹងពង្រីកយុទ្ធនាការផ្សព្វផ្សាយ និងអប់រំសិស្សានុសិស្សអំពីហានិភ័យនៃការលេងល្បែងស៊ីសង ដើម្បីបង្កើនការយល់ដឹង និងទប់ស្កាត់ផលប៉ះពាល់ពីសកម្មភាពនេះ។
ក្រៅពីវិស័យល្បែងស៊ីសង សេចក្តីព្រាងវិសោធនកម្មច្បាប់នេះក៏ស្នើហាមឃាត់ការទូទាត់ជាសាច់ប្រាក់ទាំងស្រុងក្នុងវិស័យសំណង់ផងដែរ។ រាល់ការទូទាត់ប្រាក់រវាងក្រុមហ៊ុនសំណង់ និងអ្នកម៉ៅការត្រូវធ្វើឡើងតាមរយៈធនាគារ ឬប្រព័ន្ធទូទាត់អេឡិចត្រូនិក ដោយមានគោលបំណងទប់ស្កាត់សកម្មភាពសេដ្ឋកិច្ចក្រៅប្រព័ន្ធ។
សេចក្តីព្រាងវិសោធនកម្មច្បាប់នេះនឹងត្រូវបញ្ជូនទៅសភាដើម្បីពិនិត្យ និងអនុម័ត មុនពេលអាចចូលជាធរមាននាពេលខាងមុខ៕
Account
Security
Favourite Content