បរទេស៖ យោងតាមប្រភពពី CNBC បានរាយការណ៍ថា តម្លៃប្រេងឆៅបានធ្លាក់ចុះជាង ២ ភាគរយកាលពីថ្ងៃព្រហស្បតិ៍សប្ដាហ៍នេះ ដោយសារវិស័យផលិតកម្មរបស់សហរដ្ឋអាមេរិកមានការធ្លាក់ចុះ ស្របពេលដែលភាពតានតឹងក្នុងតំបន់ផលិតកម្មនៅមជ្ឈិមបូព៌ាបន្តកើតមាន។

ផ្អែកតាមប្រភពដដែលបានឱ្យដឹងថា តម្លៃប្រេងឆៅ Brent បានធ្លាក់ចុះ ១,៩៣ ភាគរយ ឬមានតម្លៃត្រឹម ៧៩,៥២ ដុល្លារក្នុងមួយបារ៉ែល ខណៈដែលតម្លៃប្រេងឆៅ West Texas Intermediate (WTI) បានធ្លាក់ចុះ ២,០៥ ភាគរ​យ ឬមានតម្លៃ ៧៦,៣១ ដុល្លារក្នុងមួយបារ៉ែល។ នៅលើអត្រាមូលដ្ឋានប្រចាំសប្តាហ៍ តម្លៃប្រេងឆៅ Brent ធ្លាក់ចុះ ១,៧ ភាគរយ ខណៈពេលដែលតម្លៃប្រេងឆៅ WTI ធ្លាក់ចុះ ១,១​ ភាគរយ។ មិនត្រឹមតែប៉ុណ្ណោះ វិស័យផលិតកម្មសហរដ្ឋអាម៉េរិកក្នុងខែកក្កដាបានបន្តធ្លាក់ចុះ (រយៈពេល៤ខែជាប់ៗគ្នា) ខណៈដែលអត្រាអ្នកគ្មានការងារធ្វើទាមទារអត្ថប្រយោជន៍បានកើនឡើង ដែលធ្វើឱ្យមានការភ័យខ្លាចជាថ្មីថា សេដ្ឋកិច្ចអាម៉េរិកអាចឈានទៅរកវិបត្តិសេដ្ឋកិច្ច។

កាលពីថ្ងៃព្រហស្បតិ៍កន្លងទៅនេះ ការស្ទង់មតិមួយបានបង្ហាញពីសកម្មភាពផលិតកម្មនៅទូទាំងសហរដ្ឋអាមេរិក អឺរ៉ុប និងអាស៊ីមានការចុះខ្សោយជាងកាលពីខែមុន ដែលបង្កើនហានិភ័យដល់ការស្ទុះងើបឡើងវិញនៃសេដ្ឋកិច្ចពិភពលោកក្រោមឥទ្ធិពលប្រើប្រាស់ប្រេង។ ការនាំចូលប្រេងឆៅរបស់អាស៊ីបានធ្លាក់ចុះដល់កម្រិតទាបបំផុតក្នុងខែកក្កដាដោយសារតម្រូវការខ្សោយនៅក្នុងប្រទេសចិន និងឥណ្ឌា។  ទិន្នន័យសេដ្ឋកិច្ចពីចិនដែលជាប្រទេសនាំចូលប្រេងកំពូលរបស់ពិភពលោកបានបង្ហាញពីការខកចិត្ត ដោយសារសកម្មភាពផលិតកម្មធ្លាក់ចុះមានឥទ្ធិពលលើតម្លៃ និងបានបន្ថែមក្តីបារម្ភអំពីកំណើនតម្រូវការប្រេងក្នុងស្រុក ខណៈដែលទិន្នន័យនៃការនាំចូល និងរោងចក្រចម្រាញ់ប្រេងមានកម្រិតទាបនៅក្នុងខែមិថុនាបើធៀបនឹងរយៈពេលដូចគ្នាកាលពីឆ្នាំមុន។

អ្នកវិភាគមកពីក្រុមហ៊ុន FGE បាននិយាយថា ទីផ្សារនៅតែបន្តការប្រុងប្រយ័ត្នចំពោះតម្រូវការប្រេងរបស់ចិនបន្ទាប់ពីទិន្នន័យកាលពីខែមិថុនាបានធ្លាក់ចុះជាងការរំពឹងទុក។ ទោះបីជាយ៉ាងណាក្តី ទស្សនវិស័យសម្រាប់ការនាំចូលប្រេងឆៅរបស់ចិនកំពុងមានសញ្ញាវិជ្ជមានបន្តិច ដោយអ្នកវិភាគបានកត់សម្គាល់ពីការកើនឡើងនៃការទិញ និងការស្ទុះងើបឡើងវិញនៃកម្រិតចម្រាញ់ប្រេងនៅក្នុងប្រទេស។

ទន្ទឹមនឹងនេះ វិនិយោគិនប្រេងក៏កំពុងឃ្លាំមើលបញ្ហានៅមជ្ឈិមបូព៌ាដោយប្រយ័ត្នប្រយែងផងដែរ ដោយសារទើបមានព័ត៌មានពីការធ្វើឃាតមេដឹកនាំជាន់ខ្ពស់នៃក្រុមសកម្មប្រយុទ្ធហាម៉ាស Ismail Haniyeh ក្នុងទីក្រុងតេអេរ៉ង់ ប្រទេសអ៊ីរ៉ង់។ នៅក្នុងកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខជាតិរបស់ប្រទេសអ៊ីរ៉ង់នៅព្រឹកថ្ងៃពុធ មេដឹកនាំកំពូលអ៊ីរ៉ង់ Ayatollah Ali Khamenei ដែលជាសម្ព័ន្នមិត្តបានបញ្ជាឱ្យមានការវាយប្រហារដោយផ្ទាល់លើអ៊ីស្រាអែល ជាការឆ្លើយតបទៅនឹងការសម្លាប់លោក Haniyeh។ លើសពីនេះ មន្ត្រីកំពូលរបស់អ៊ីរ៉ង់គ្រោងនឹងជួបអ្នកតំណាងរបស់ក្រុមសកម្មប្រយុទ្ធយេម៉ែន Houthis, ក្រុមប្រយុទ្ធរបស់លីបង់ Hezbollah និងក្រុមសកម្មប្រយុទ្ធរបស់អ៊ីរ៉ាក់។ ការធ្វើឃាតមេដឹកក្រុមហាម៉ាសបានបង្កការភ័យខ្លាចថា មជ្ឈិមបូព៌ាអាចធ្លាក់ចូលក្នុងសង្រ្គាមដ៏ធ្ងន់ធ្ងរ ដែលអាចរំខានដល់ការផ្គត់ផ្គង់ប្រេង ដោយសារតំបន់ផលិតកម្មប្រេងភាគច្រើនស្ថិតនៅមជ្ឈិមបូព៌ា៕