សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អ្នកជំនាញហិរញ្ញវត្ថុបានប្រាប់ពីវិធីសាស្ត្រក្នុងការប្រើប្រាស់លុយកម្ចី ឬឥណទានពីធនាគារ ក៏ដូចជាគ្រឹះស្ថានមីក្រូហិរញ្ញវត្ថុឱ្យមានប្រសិទ្ធភាព ខណៈវិធីសាស្ត្រទាំងនេះរួមមានការផ្តោតលើការប្រើប្រាស់កម្ចីឱ្យចំគោលដៅ មានផែនការអាជីវកម្មច្បាស់លាស់ ពិនិត្យមើលលទ្ធភាពសង និងជ្រើសរើសស្ថាប័នផ្តល់កម្ចីដែលមានអត្រាការប្រាក់ទាប។
លោក ទិត្យ កំរង អ្នកជំនាញហិរញ្ញវត្ថុ និងស្ថាបនិក និងជានាយកប្រតិបត្តិក្រុមហ៊ុន ឫទ្ធិពល និងអេបកត់លុយ បានឱ្យដឹងថា ការប្រើប្រាស់កម្ចីគឺតែងតែភ្ជាប់ជាមួយនឹងការប្រាក់ ហើយប្រសិនបើអ្នកប្រើលុយបានត្រឹមត្រូវ បើទោះជាលុយមានការប្រាក់ ក៏អ្នកនៅតែអាចរកប្រាក់ចំណេញ តែបើសិនជាអ្នកប្រើមិនបានត្រឹមត្រូវ អ្នកប្រាកដជាជួបហានិភ័យជាមិនខាន។
លោក ទិត្យ កំរង បានបន្តថា ជាដំបូងដើម្បីអាចប្រើលុយឱ្យចំណេញ ចៀសវាងជួបបញ្ហាផ្សេងៗ អ្នកត្រូវតែបង្កើតកម្រិតមួយដើម្បីបែងចែកក្នុងគម្រោងចាយវាយរបស់អ្នក។ អ្នកត្រូវធ្វើផែនការស្នូល វាស់វែងពីកម្រិតនៃការចំណាយប្រចាំខែ បើអ្នកជាអ្នកស៊ី អ្នកត្រូវគិតពីការចំណាយដូចជា ៖ ទឹក ភ្លើង អគារ ឬ ទីតាំងជួល ថ្លៃបុគ្គលិក ថ្លៃដើមទំនិញ ព្រមទាំងសម្ភារៈនានាដែលចាំបាច់។
បើសិនអ្នកជាអ្នកធ្វើការ ឬសម្រាប់អ្នកទើបមានគ្រួសារថ្មីថ្មោង អ្នកក៏ត្រូវគិតគូរពីការចាយវាយប្រចាំខែដែលចាំបាច់ គិតពីចំណូល និងការសន្សំផងដែរ។ ម្យ៉ាងវិញទៀតដើម្បីអាចសម្រេចនូវគោលបំណងអនាគត អ្នកត្រូវតែចៀសឱ្យបានរាល់ការទិញសម្ភារៈនិយម ការចាយហ៊ឺហារ មិនចំគោលដៅ ការដកលុយសិន ទើបដាក់បញ្ចូលវិញ ទាំងនោះសុទ្ធតែបង្ករជាហានិភ័យ ប៉ះពាល់ដល់លំហូរសាច់ប្រាក់ប្រចាំខែរបស់អ្នក។
លោកបានប្រាប់ពីគន្លឹះចំនួន ៤ សំខាន់ៗ ក្នុងការការប្រើលុយ ឬរបៀបចាត់ចែងលុយដើម្បីឱ្យមានប្រសិទ្ធ និងហានិភ័យទាប ដូចខាងក្រោម ៖
ទី១ ប្រើលុយឱ្យចំគោលដៅ និងអនុវត្តតាមគោលដៅ ៖ ឧទាហេណ៍៖ បើអ្នកខ្ចីលុយដើម្បីបើកអាជីវកម្ម អ្នកត្រូវតែប្រើលុយនោះទៅក្នុងអាជីវកម្មប៉ុណ្នោះ ហើយអ្នកគួរចៀសវាងការវិនិយោគណាដែលនាំឱ្យមានការគំាងលុយ ឬកប់ទុកចោលយូរពេក។
ទី២ ប្រសិនបើអ្នកខ្ចីលុយមករកស៊ី អ្នកត្រូវតែមានគម្រោងអាជីវកម្ម ៖ គិតថ្លៃដើម ថ្លៃចំណាយ ហើយកុំភ្លេចបូកបញ្ចូលថ្លៃការប្រាក់ដែលអ្នកខ្ចីដើម្បីឱ្យដឹងខាតចំណេញ។ ឬមួយទៀតដែលសំខាន់គឺការខ្ចីលុយឬ បង់រំលស់របស់អ្នក ត្រូវសួរខ្លួនឯងសិនថា របស់នោះពិតជាមានភាពចាំបាច់ និងអាចផ្តល់ប្រយោជន៍សម្រាប់អ្នកដែរទេ?
ទី៣ ពិនិត្យលទ្ធភាពក្នុងការបង់សង ៖ ចំនុចនេះគឺសំខាន់បំផុត លោកអ្នកត្រូវតែគិតឱ្យបានច្រើនដង ពីលទ្ធភាពរបស់អ្នក ថាតើអ្នកអាចបង់សងត្រឡប់បានទេ? ហើយក្នុងអំឡុងពេលបង់សងនោះអាចនឹងមានការចំណាយផ្សេងៗទៀតអ្វីខ្លះដែលនាំឱ្យប៉ះពាល់ដល់លុយដែលត្រូវបង់សងត្រឡប់។
ទី៤ ជ្រើសរើសធនាគារដែលមានការប្រាក់ល្អ និងត្រូវតាមគោលបំណងខ្ចី ៖ ទាក់ទងនឹងចំណុចនេះសំដៅដល់ប្រភពដែលអ្នកចង់ខ្ចីលុយយកមកប្រើប្រាស់។ អ្នកត្រូវសម្លឹងមើលប្រភពណាដែលមានការប្រាក់ល្អស្របតាមបំណងដែលអ្នកចង់ខ្ចី។ មួយវិញទៀត អ្នកត្រូវសិក្សាឱ្យបានច្បាស់ពីធនាគារ លក្ខខណ្ឌសង ទុកចិត្តបាន កាន់តែពិសេស អ្នកត្រូវតែប្រើឱ្យចំគោលដៅទើបគ្មានហានិភ័យ។ ចៀសវាងការយកលុយមកវិនិយោគ ឬទិញរបស់ដែលនាំឱ្យគាំងលុយជាដើម៕
Account
Security
Favourite Content