សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ តម្លៃប្រេងសាកលបានធ្លាក់ចុះជាង ១% បន្ទាប់ពីឥណ្ឌាប្តេជ្ញាកាត់បន្ថយទិញប្រេងពីរុស្ស៊ី ស្របពេលមានដំណឺងថា ប្រធានាធិបតីអាម៉េរិក លោក Donald Trump ព្រមព្រៀងជួបគ្នាជាថ្មីជាមួយនឹងប្រធានាធិបតីរុស្ស៊ី លោក Vladimir Putin ដើម្បីពិភាក្សាអំពីការបញ្ចប់សង្រ្គាមនៅអ៊ុយក្រែន។
តម្លៃប្រេងឆៅម៉ាក Brent នៅថ្ងៃសុក្រសប្ដាហ៍នេះ បានធ្លាក់ចុះ ១,៣៧% ឬ ៦១,០៦ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ធ្លាក់ចុះ ១,៣៩% ឬ ៥៧,៤៦ ដុល្លារក្នុងមួយបារ៉ែល។
កាលពីថ្ងៃព្រហស្បតិ៍ ប្រធានាធិបតីអាម៉េរិក លោក Donald Trump បានបង្ហើបពីការព្រមព្រៀងជួបគ្នាជាថ្មីជាមួយនឹងប្រធានាធិបតីរុស្ស៊ី លោក Putin នៅទីក្រុងប៊ុយដាប៉ែស នៃប្រទេសហុងគ្រី ដើម្បីពិភាក្សាអំពីការបញ្ចប់សង្រ្គាមនៅអ៊ុយក្រែន។ យ៉ាងណាមិញ គេនៅមិនទាន់ផ្តល់កាលបរិច្ឆេទច្បាស់លាស់នៃកិច្ចប្រជុំនេះនោះទេ។
លើសពីនេះ រដ្ឋបាលព័ត៌មានថាមពល (EIA) បានរាយការណ៍ថា ស្តុកប្រេងឆៅរបស់អាម៉េរិកបានកើនឡើងបន្ថែមចំនួន ៣,៥ លានបារ៉ែល ដោយចំនួនសរុបឡើងដល់ ៤២៣,៨ លានបារ៉ែលកាលពីសប្តាហ៍មុន ដែលលើសពីការរំពឹងទុករបស់អ្នកវិភាគ។ ការកើនឡើងនៃចំនួនស្តុកប្រេងធំជាងការរំពឹងទុកនេះបានឆ្លុះបញ្ចាំងពីការធ្លាក់ចុះនៃតម្រូវការដែលធ្វើឲ្យការចម្រាញ់ធ្លាក់ចុះទាប និងមានចំណែកធ្វើឲ្យតម្លៃប្រេងធ្លាក់ចុះផងដែរ។ មិនត្រឹមតែប៉ុណ្ណោះ ទិន្នន័យបង្ហាញពីការកើនឡើងនៃផលិតកម្មរបស់អាម៉េរិកដល់ទៅ ១៣,៦៣ លានបារ៉ែលក្នុងមួយថ្ងៃ ដែលជាចំនួនខ្ពស់បំផុតក្នុងកំណត់ត្រា។ យ៉ាងណាមិញ ពាណិជ្ជករក៏កំពុងរង់ចាំមើលឥណ្ឌាបញ្ឈប់ការនាំចូលប្រេងពីរុស្ស៊ី ដែលអាចផ្លាស់ប្តូរទម្រង់លំហូរ និងបង្កើនតម្រូវការសម្រាប់ការផ្គត់ផ្គង់ពីកន្លែងផ្សេង ដែលអាចជំរុញតម្លៃប្រេងឡើងវិញ។
សូមរំលឹកដែរថា កាលពីថ្ងៃពុធ សប្ដាហ៍នេះ នាយករដ្ឋមន្ត្រីឥណ្ឌា លោក Narendra Modi បានសន្យាជាមួយនឹងលោក Trump ថា ឥណ្ឌានឹងឈប់ទិញពីប្រទេសរុស្ស៊ី ដែលជាអ្នកផ្គត់ផ្គង់ប្រេងកំពូលរបស់ឥណ្ឌា និងមានចំណែកប្រហែល ១ ភាគ ៣ នៃការនាំចូលប្រេងសរុបរបស់ខ្លួន។ ទន្ទឹមនឹងនេះ ក្រុមហ៊ុនចម្រាញ់ប្រេងឥណ្ឌាមួយចំនួនក៏កំពុងរៀបចំកាត់បន្ថយការនាំចូលប្រេងពីរុស្ស៊ីបន្តិចម្ដងៗ និងឈានទៅដល់ការបញ្ឈប់ទាំងស្រុងតែម្ដង៕
Account
Security
Favourite Content