សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បើទោះបីជាស្ថានភាពនៃវិស័យដីធ្លី និងអចលនទ្រព្យកម្ពុជានៅមិនទាន់បានវិលត្រលប់ទៅរកស្ថានភាពដូចមុនឆ្នាំ២០២០ក្ដី តែការទិញលក់ដីធ្លីនៅតែបន្តមានសកម្មភាព ដោយវិនិយោគិនស្វែងរកទីតាំងណាដែលមានសក្ដានុពល និងតម្លៃទាបសម្រាប់លក់យកចំណេញនៅថ្ងៃខាងមុខ។ ថ្ងៃនេះ AMS Economy នឹងលើកយកពីតម្លៃដីនៅតំបន់មួយចំនួនក្នុងខណ្ឌចំនួន៣នៃរាជធានីភ្នំពេញ មកបង្ហាញជូនដើម្បីធ្វើការពិចារណា គួរទិញដើម្បីរកប្រាក់ចំណេញនៅពេលអនាគត ឬយ៉ាងណា ។
យោងតាមរបាយការណ៍នៃការវាយតម្លៃដីធ្លីប្រចាំឆមាសទី១ ឆ្នាំ២០២៥ របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្ហាញថា តម្លៃដីធ្លីនៅក្នុងខណ្ឌចំនួន៣ នៃរាជធានីភ្នំពេញ នៅមានតម្លៃទាបជាងគេបើប្រៀបធៀបទៅនឹងបណ្ដាខណ្ឌនានានៅទូទាំងរាជធានី ខណៈដែលតំបន់ទាំងនោះសុទ្ធតែស្ថិតនៅជាយក្រុង។
ខណ្ឌទាំង៣ដែលមានតម្លៃដីទាបជាងគេនោះរួមមាន ខណ្ឌដង្កោ ខណ្ឌកំបូល និងព្រែកព្នៅ ហើយក្នុងនោះនៅសង្កាត់គងនយ ខណ្ឌដង្កោ អាចរកដីធ្លីបានក្នុងតម្លៃចន្លោះ ប្រមាណពី២០ ទៅ ៥០ដុល្លារអាម៉េរិកក្នុងមួយម៉ែត្រការ៉េសម្រាប់ដីនៅជាប់ផ្លូវតូចៗឬនៅផ្លូវក្នុង ។ ប៉ុន្តែសម្រាប់ដីដែលជាប់ផ្លូវធំៗ អាចមានតម្លៃចន្លោះពី៥០ដុល្លារទៅ១២០ដុល្លារអាម៉េរិកក្នុងមួយម៉ែត្រការ៉េ ។ ក្នុងខណ្ឌនេះដែរ ក៏មានតំបន់ខ្លះតម្លៃដីអាចមានចន្លោះពី ៦២០ដុល្លារទៅ ១ ៧៩០ដុល្លារអាម៉េរិកក្នុងមួយម៉ែត្រការ៉េ គឺនៅក្នុងសង្កាត់ដង្កោ និងជាដីដែលនៅជាប់ផ្លូវធំៗ ។
ដោយឡែកសម្រាប់ខណ្ឌកំបូល នៅសង្កាត់ប្រទះឡាង តម្លៃអាចទាបបំផុតត្រឹម២០ដុល្លារទៅ១០០ដុល្លារអាម៉េរិកក្នុងមួយម៉ែត្រការ៉េសម្រាប់ទីតាំងដែលស្ថិតនៅជាប់ផ្លូវតូចៗ ហើយសម្រាប់ទីតាំងដែលជាប់ផ្លូវធំៗ ក្នុងសង្កាត់នេះ តម្លៃដីអាចមានចន្លោះពី ៣០ដុល្លារអាម៉េរិកទៅ ១៩០ដុល្លារអាម៉េរិកក្នុងមួយម៉ែត្រការ៉េ ។ ក្នុងខណ្ឌនេះដែរ ក៏មានតំបន់ដែលមានតម្លៃខ្ពស់រហូតដល់១២០០ដុល្លារអាម៉េរិកក្នុងមួយម៉ែត្រការ៉េ គឺនៅសង្កាត់កន្ទោក និងកំបូល ។
សម្រាប់ខណ្ឌនៅជាយរាជធានីមួយទៀតដែលវិនិយោគិនគួរពិចារណាស្វែងរកឱកាសទិញដើម្បីចំណេញនៅពេលអនាគត គឺនៅព្រែកព្នៅ ដែលនៅភាគខាងជើង និងខាងលិចរាជធានីភ្នំពេញ ។ ក្នុងខណ្ឌនេះ តំបន់មួយចំនួនក្នុងសង្កាត់ពន្សាំង តម្លៃដីធ្លីអាចរកបានត្រឹមចន្លោះពី១០ដុល្លារទៅ១៤០ដុល្លារអាម៉េរិក សម្រាប់ទីតាំងនៅជាប់ផ្លូវតូច តែសម្រាប់ទីតាំងដែលនៅជាប់ផ្លូវធំ អាចមានតម្លៃចន្លោះពី២០ទៅ២៤០ដុល្លារអាម៉េរិកក្នុងមួយម៉ែត្រការ៉េ ។ ក្នុងខណ្ឌព្រែកព្នៅនេះដែរ ក៏មានតំបន់ខ្លះក្នុងសង្កាត់ព្រៃកព្នៅ មានតម្លៃរហូតដល់១១០០ដុល្លារអាម៉េរិកក្នុងមួយម៉ែត្រការ៉េ ផ្ដោតលើទីតាំងដែលជាប់ផ្លូវធំៗ ។
តាមអ្នកជំនាញអចលនទ្រព្យកម្ពុជាបានលើកឡើងថា ចង់វិនិយោគដីធ្លី គួរសម្លឹងរកទីតាំងដែលនៅជាយៗក្រុង និងជាទីតាំងដែលមានតម្លៃទាប ខណៈដែលនៅជុំវិញរាជធានីភ្នំពេញ សុទ្ធតែមានសក្ដានុពល គ្រាន់តែសក្ដានុពលនៃតំបន់ទាំងនោះ វាអាស្រ័យលើវិស័យនីមួយៗ ។ ម្យ៉ាងវិញទៀត នៅពេលអនាគត រាជធានីភ្នំពេញ នឹងកាន់តែរីកធំ ដូច្នេះ តំបន់ជាយក្រុងនាពេលនេះ នឹងក្លាយជាទីប្រជុំជន ជាក្រុងដ៏អ៊ូរអរនាពេលអនាគត ៕
Account
Security
Favourite Content