ភ្នំពេញ៖ គិតត្រឹមខែកញ្ញា ឆ្នាំ២០២៥នេះ យានយន្តអគ្គិសនី ដែលបានចុះបញ្ជីមានចំនួន ១០ ៥៦៨គ្រឿង ក្នុងនោះរថយន្តមានចំនួន ៧ ១៨៧គ្រឿង ត្រីចក្រយានយន្តចំនួន ៦៧១គ្រឿង និងទោចក្រយានយន្តចំនួន២ ៧១០គ្រឿង។ នេះបើតាមការឱ្យដឹងពី ឯកឧត្តមបណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជាក្នុងពិព័រណ៍ CAMBUILD និង CAMAUTO 2025 នាពេលថ្មីៗនេះ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

ទាក់ទងនឹងការចុះបញ្ជីយានយន្ត លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា៖ រយៈពេល៩ខែ ឆ្នាំ២០២៥ យានយន្តចុះបញ្ជីសរុប មានចំនួន ៣៧៦ ៥០៧គ្រឿង(ម៉ូតូ ៣០៧ ៨១៤​គ្រឿង​,រថយន្តធុនស្រាល ៦១ ៦៣១គ្រឿង,រថយន្តធុនធ្ងន់ ៧ ០៦២គ្រឿង) ខណៈ៩ខែ ឆ្នាំ២០២៤ យានយន្តចុះបញ្ជីសរុប ៣០៤ ៧០៣គ្រឿង។

អ្នកនាំពាក្យក្រសួងសាធារណការ ឯកឧត្តម ផន រឹម បានបន្ថែមទៀតថា នៅកម្ពុជា និន្នាការយានយន្ត EV មានការកើនឡើងច្រើន ជាក់ស្តែងរយៈពេល ៨ខែ ឆ្នាំ២០២៥ យានយន្ត EV ចុះបញ្ជីសរុបជិ៦ពាន់គ្រឿង។ បន្ទាប់ពីមាននិន្នាការកើនឡើងសម្រាប់យានយន្ត EV នេះ ក្រសួងសាធារណការ និងដឹកជញ្ជូន ក៏កំពុងតែបានបន្តគិតគូរទៅលើការដាក់សញ្ញាសម្គាល់បន្ថែមទៅលើផ្លាកលេខ ទាំងរថយន្ត ត្រីចក្រយានយន្ត និងទោចក្រយានយន្ត ដែលគម្រោងនេះនឹងអាចចេញជារូបរាងនៅឆ្នាំ២០២៦ខាងមុខនេះ។

គួរជម្រាបថា៖ រាជរដ្ឋាភិបាលកម្ពុជា បានដាក់ចេញគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនីឆ្នាំ២០២៤- ២០៣០ ក្នុងគោលបំណងប្រែក្លាយកម្ពុជាទៅជាប្រទេសដែលមានការប្រើប្រាស់យានយន្តអគ្គិសនីក្នុងកម្រិតល្អប្រសើរ ដើម្បីគាំទ្រការអភិវឌ្ឍប្រកបដោយចីរភាព និងសុខុមាលភាពប្រជាពលរដ្ឋ ដោយមានគោលដៅជំរុញការប្រើប្រាស់យានយន្តអគ្គិសនីឱ្យបានជាង ៧៧ម៉ឺនគ្រឿងនៅឆ្នាំ២០៣០។ គោលដៅជាក់លាក់រួមមានការចុះបញ្ជីរថយន្តអគ្គិសនីចំនួន ៣០,០០០គ្រឿង ទោចក្រយានយន្តអគ្គិសនី ៧២០,០០០ គ្រឿង និងត្រីចក្រយានយន្តអគ្គិសនី ២០,០០០ គ្រឿងនៅឆ្នាំ២០៣០។

ជាមួយគ្នានេះ ដើម្បីឈានទៅការសម្រេចគោលដៅនេះ រាជរដ្ឋាភិបាលក៏បានផ្តល់ការលើកទឹកចិត្តពិសេសដល់អ្នកនាំចូលរថយន្ត និងម៉ូតូអគ្គិសនី ដោយបន្ថយពន្ធនាំចូល ៥០% ។ បន្ថែមពីនេះក្រសួងសេដ្ឋកិច្ច និងហិរញ្ញវត្ថុ ក៏បានសម្រេចកែសម្រួលបន្ថយអត្រាពន្ធលើមធ្យោបាយដឹកជញ្ជូនសម្រាប់រថយន្តប្រើប្រាស់ថាមពលអគ្គិសនី (EV) ប្រភេទទេសចរណ៍ ដឹកទំនិញធុនតូចមានទ្វារ៤ (ភិកអាប់) និងរថយន្តដឹកអ្នកដំណើរ ដើម្បីជំរុញកំណើនការប្រើប្រាស់យានយន្តអគ្គិសនីនៅកម្ពុជាផងដែរ៕