ភ្នំពេញ ៖ ស្ថិតក្នុងសម័យកាលជឿនលឿន ការបង្កើតអាជីវកម្មមួយឱ្យដំណើរការបាន គេពុំអាចគិតតែរឿងផលចំណេញមួយមុខនោះទេ ពោលគឺគេត្រូវគិតគូរពីបរិស្ថាន និងការច្នៃធនធានប្រើប្រាស់ឱ្យអស់ពីលទ្ធភាពផងដែរ។ ក្នុងនោះមានមុខអាជីវកម្មចំនួន៣ ដែលកំពុងកែច្នៃ ផលិតចេញនូវផលិតផលដែលមានប្រយោជន៍ និងចូលរួមគិតគូរពីការប៉ះពាល់ដល់បរិស្ថាន។

តួយ៉ាង  អាទិករ  ជាក្រុមហ៊ុនឯកជនខ្នាតតូច ដែលផ្តោតសំខាន់ទៅលើការផលិតនូវរបស់ប្រើប្រាស់មេត្រីបរិស្ថាន​ ដែលផ្តើមចេញពីការផលិតបំពង់បឺតបរិស្ថាន និងព្យាយាមប្រើប្រាស់វត្ថុធាតុដើមពីធម្មជាតិនៅក្នុងស្រុក ដើម្បីលើកកម្ពស់ជីវភាពប្រជាជននៅក្នុងសហគមន៍ ក៏ដូចជាធានានូវសុខមាលភាពអ្នកប្រើប្រាស់ និងមិនប៉ះពាល់ដល់បរិស្ថានផងដែរ។

កញ្ញា ហៃ សុជាតិវឌ្ឍនា ជាស្ថាបនិកក្រុមហ៊ុននេះបានប្រាប់ AMS ថា ៖

“ការប្រើប្រាស់បំពង់បឺតធម្មជាតិប្រភេទនេះវាអាចកាត់បន្ថយការប្រើប្រាស់ប្លាស្ទិក គ្មានកាកសំណល់រឹង ហើយអាចរលាយក្នុងស្រទាប់ដីក្នុងរយៈពេល៣០ ទៅ ៤៥ថ្ងៃប៉ុណ្ណោះ។ ចំណែកតម្លៃវិញ ចន្លោះពី ១០០​-១៤០រៀល ក្នុង១ដើម អាស្រ័យទៅតាមទំហំ និងបរិមាណបញ្ជាទិញពីអតិថិជនដែលភាគច្រើនគេប្រើនៅតាមសណ្ឋាគារ ភោជនីយដ្ឋាន និងហាងលក់វត្ថុអនុស្សាវរីយ៍នានា ដែលអតិថិជនគាំទ្រជាអ្នកមានឆន្ទៈក្នុងការចូលរួមថែរក្សាបរិស្ថាន កាត់បន្ថយនូវការប្រើប្រាស់ប្លាស្ទិកតាមរយៈការងាកមកប្រើប្រាស់ផលិតផលបរិស្ថានជំនួសវិញ”

ស្រដៀងគ្នានេះដែរ កសិដ្ឋាន តាខ្មៅ ក៏ជាកន្លែងមួយដែលមានកែច្នៃកាកសំណល់ស្រកីដូងទៅជាស្រកីដូងម៉ដ្ឋដែលមានអត្ថប្រយោជន៍ចំពោះវិស័យកសិកម្មពិសេសការដាំដំណាំ។

លោក ជា ឡង់ឌី ជាម្ចាស់កសិដ្ឋាន Takhmao Farm មានទីតាំងនៅភូមិក្របៅ ឃុំកំពង់សំណាញ់ សង្កាត់តាខ្មៅ ដែលជាកន្លែងកែច្នៃស្រកីស្ងួតៗឱ្យទៅជាស្រកីដូងម៉ដ្ឋសម្រាប់បម្រើដល់ការដាំដុះបានមានប្រសាសន៍ប្រាប់ AMS ឲ្យដឹងថា ស្រកីដូងម៉ដ្ឋនេះមានអត្ថប្រយោជន៍ច្រើនមុខដែលគេអាចយកទៅលាយដីដាំដំណាំ បណ្ដុះកូនរុក្ខជាតិ ផ្សាំមែកឈើ គ្របគល់ដំណាំ ឬកែច្នៃជាផើង និងជាវត្ថុធាតុដើមសម្រាប់បម្រើដល់វិស័យផ្សេងៗទៀត។​

លោកបញ្ជាក់ថា ៖

“ស្រកីដូងនេះមានច្រើនប្រភេទអាស្រ័យលើតម្រូវការប្រើប្រាស់របស់អតិថិជន តែជាទូទៅគេនិយមតែ 2ប្រភេទគឺស្រកីដូងម៉ដ្ឋ និងលាយសរសៃហ្វាយប័រ។ តួយ៉ាងដូចជាបើបងប្អូនចង់យកវាទៅលាយដីដាំដំណាគេត្រូវប្រើស្រកីដូងម៉ដ្ឋ ចំណែកយកទៅផ្សាំមែកឈើគេយកស្រកីដូងដែលនៅសរសៃរច្រើន។ ក្រៅពីនេះគេក៏អាចយកស្រកីដូងសរសៃទៅច្នៃជា កម្រាលព្រុំ ពូក ក៏ដូចជាផើងសម្រាប់ដាំរុក្ខជាតិផងដែរ”

ទី៣ អាជីវកម្មមួយទៀតជាសិប្បកម្ម ធុងបរិស្ថាន (Eco Bin) ដែលមានកែច្នៃសំបកកង់រថយន្តចាស់ៗទៅជាធុងសំរាមដែលមានរាងស្អាត ប្លែក កាត់បន្ថយកាកសំណល់ទៅលើសំបកផែនដី និងទទួលបានការគាំទ្រច្រើន។

អ្នកស្រី សឿង សុថាវី ជាម្ចាស់សិប្បកម្មខាងលើបានមានប្រសាសន៍ថា ៖

“យើងបង្កើតសិប្បកម្មនេះឡើងដោយសារក្ដីស្រឡាញ់ការងារសង្គម ហើយយើងគិតថាអាជីវកម្មនេះអាចជួយដល់បរិស្ថាន និងអាចផ្ដល់ឱកាសការងារឱ្យប្រជាជនក្នុងតំបន់ផងនោះ គ្រួសារខ្ញុំក៏បានសម្រេចចាប់យកអាជីពជាអ្នកកែច្នៃសំណល់សម្បកកង់ឡានចាស់ៗដែលមិនងាយរលាយឲ្យក្លាយជាសម្ភារៈប្រើប្រាស់មានប្រយោជន៍តាមរយៈការបង្កើតជាធុងសំរាមបរិស្ថាននេះឡើង”

អ្នកស្រីបានបន្តទៀតថា ៖

“បច្ចុប្បន្ននេះ បងប្អូនប្រជាជនខ្មែរភាគច្រើនបានយល់ដឹងពីតម្លៃរបស់ធុងបរិស្ថាននេះ ដែលធ្វើឱ្យធុងរបស់គាត់មានការគាំទ្រច្រើន ទាំងនៅក្នុងតំបន់ និងនៅតាមបណ្តាស្រុកក្នុងខេត្ត ជាពិសេសក្នុងបុរី បានធ្វើការបញ្ជាទិញជាបន្តបន្ទាប់ ហើយក្នុងនោះក៏មានអង្គការ និងក្រុមហ៊ុនមួយចំនួនធ្វើការបញ្ជាទិញរហូតធ្វើឱ្យការផលិតស្ទើរមិនទាន់”

ជាមួយមក អាជីវកម្មដែលគិតគូរពីបរិស្ថានកំពុងមានប្រជាប្រិយភាព និងទទួលបានការគាំទ្រច្រើនពីសំណាក់អតិថិជន ក៏ដូចជាបងប្អូនដែលយល់ដឹងពីការប៉ះពាល់ និងសកម្មភាពនានាដើម្បីចូលរួមថែរក្សាបរិស្ថាន៕