ភ្នំពេញ ៖ ថ្ងៃទី១៤ ខែវិច្ឆិកា ឆ្នាំ២០២៥ – សហគ្រិនខ្មែរ បានសហការរៀបចំកិច្ចជំនួបសហគ្រិនសម្រាប់ទីផ្សារ និងហិរញ្ញប្បទាន ជាមួយ អេនធើប្រាយ វិហ្សិនអាខេដេមី ក្នុងគោលដៅពង្រីកលទ្ធភាពចូលទៅកាន់ទីផ្សារ, កៀរគរហិរញ្ញប្បទាន,​ និងផ្សារភ្ជាប់ទំនាក់ទំនងរវាងសហគ្រាសធុនតូច និងមធ្យម ជាមួយធនាគារ អ្នកវិនិយោគ និងប្រតិបត្ដិករទីផ្សារ ដើម្បីពង្រឹងឱកាស និងជំរុញការអភិវឌ្ឍអាជីវកម្មឲ្យមានចីរភាព។

ជំនួបនេះបានបង្កើតវេទិកាដ៏សកម្មមួយសម្រាប់សហគ្រិន និងសហគ្រាសធុនតូច និងមធ្យម ក្នុងការចែករំលែកចំណេះដឹង ពិភាក្សា និងកសាងបណ្ដាញអាជីវកម្មជាមួយធនាគារ អ្នកវិនិយោគ និងប្រតិបត្ដិករទីផ្សារ ដើម្បីទទួលបាននូវចំណេះដឹងជាក់ស្តែង អំពីការត្រៀមខ្លួនសម្រាប់ការនាំចេញ, ឧត្ដមានុវត្ដន៍សម្រាប់ត្រៀមខ្លួនយកប្រាក់កម្ចី ឬទុនវិនិយោគយកភាគហ៊ុន និងការបង្កើតអត្តសញ្ញាណ ឬកេរ្ដិ៍ឈ្មោះរបស់សហគ្រិន ដើម្បីលើកកម្ពស់ភាពជឿជាក់ ពង្រឹងសមត្ថភាព និងបង្ហាញសក្តានុពលនៃអាជីវកម្មរបស់ខ្លួនដល់ដៃគូអាជីវកម្ម ធនាគារ និងវិនិយោគិន។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិ នៃសហគ្រិនខ្មែរបានមានប្រសាសន៍ថា៖

«រាជរដ្ឋាភិបាល តាមរយៈសហគ្រិនខ្មែរ បន្តអនុវត្តបេសកកម្មក្នុងការគាំទ្រ និងលើកកម្ពស់សហគ្រាសធុនតូច និងមធ្យម ដែលមានសក្តានុពលនៅតាមបណ្តាខេត្ត​ ដោយផ្តល់វេទិកាសម្រាប់ផ្សារភ្ជាប់ទំនាក់ទំនងជាមួយផ្សារទំនើបធំៗ, ស្ថាប័នហិរញ្ញវត្ថុ, និងក្រុមវិនិយោគិន។ គោលការណ៍នេះ មានគោលបំណងបន្តពង្រឹងសមត្ថភាព និងស្តង់ដារនៃផលិតផល ឬសេវាកម្មរបស់សហគ្រាស​ ដើម្បីប្រកួតប្រជែងនៅក្នុងទីផ្សារជាតិ និងអន្តរជាតិ»។

លោកស្រី វាល អេឡែន, សហស្ថាបនិកនៃអេនធើប្រាយវិហ្សិនអាខេដេមី បានសង្កត់ធ្ងន់ថា៖

«សហគ្រិនជាច្រើនតែងតែប្រឈមមុខនឹងភាពឯកោ និងខ្វះបណ្ដាញគាំទ្រ។ E-Friends ដែលទទួលបានការ គាំទ្រពីសហគ្រិនខ្មែរ ជាកន្លែងដ៏កក់ក្ដៅសម្រាប់សហគ្រិនតាមបណ្ដាខេត្តក្នុងការភ្ជាប់ទំនាក់ទំនង ចែករំលែកបញ្ហាប្រឈម និងរីកចម្រើនរួមគ្នា។ ក្រៅពីការរីកចម្រើនផ្នែកអាជីវកម្ម វាបានជួយបង្កើនការជឿជាក់ គាំទ្រផ្លូវចិត្ត និងការរៀនសូត្របន្ត ដែលជួយឲ្យសហគ្រិនមានភាពធន់ និងអាចប្រកួតប្រជែងដោយភាពជឿជាក់នៅក្នុង ទីផ្សារ»។

សូមបញ្ជាក់ដែរថា កម្មវិធីនេះមានការចូលរួមពីតួអង្គពាក់ព័ន្ធសំខាន់ៗមកពីវិស័យសាធារណៈ និងឯកជនរួមមាន ផ្សារអុីអន, ផ្សារឡាក់គី, ធនាគារ ឈីហ្វ, ធនាគារ ជីប ម៉ុង, តំណាងសមាគមភស្ដុភារកម្មកម្ពុជា, តំណាងវិនិយោគិន និងសហគ្រាសធុនតូច និងមធ្យម ជាច្រើនទៀត។

កម្មវិធីជំនួបសហគ្រិនសម្រាប់ទីផ្សារ និងហិរញ្ញប្បទាន គឺជាផ្នែកមួយនៃ យុទ្ធនាការផ្សព្វផ្សាយប្រព័ន្ធអេកូឡូស៊ីសហគ្រិនភាព ឆ្នាំ២០២៥ ដែលផ្តួចផ្តើមឡើងដោយសហគ្រិនខ្មែរ។ យុទ្ធនាការនេះ គឺជាស៊េរីនៃកម្មវិធីស្នូលប្រចាំឆ្នាំសំខាន់ៗរបស់សហគ្រិនខ្មែរ ដែលនឹងធ្វើការប្រព្រឹត្តទៅបណ្តាក់គ្នា ចាប់ពីការប្រកួតប្រជែងគំនិតអាជីវកម្ម, ការប្រកួតគំរូអាជីវកម្មធុរកិច្ចថ្មី និងសហគ្រាសធុនតូច និងមធ្យម  រហូតដល់កិច្ចប្រជុំ, សិក្ខាសាលា និងពិធីប្រគល់ពានរង្វាន់សហគ្រិនខ្មែរ៕