សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មនុស្សគ្រប់រូបតែងតែមានគោលដៅជីវិតរៀងៗខ្លួន ហើយតែងតែខិតខំប្រឹងប្រែងធ្វើយ៉ាងណាឱ្យសម្រេចនូវគោលដៅរបស់ខ្លួនដើម្បីឱ្យការរស់នៅមានភាពប្រសើរជាងមុន។ ប៉ុន្តែដើម្បីអាចសម្រេចគោលដៅក្នុងការរស់នៅប្រសើរជាងមុន លុះត្រាតែបុគ្គលនីមួយៗមានដំណេះដឹង និងផ្លាស់ប្តូរឥរិយាបទទាក់ទងនឹងការប្រើប្រាស់ហិរញ្ញវត្ថុ ជាពិសេសគឺការគ្រប់គ្រងហិរញ្ញវត្ថុ។
ការគ្រប់គ្រងហិរញ្ញវត្ថុផ្ទាល់ខ្លួន សំដៅដល់សមត្ថភាពក្នុងការរៀបចំ និងការអនុវត្តផែនការហិរញ្ញវត្ថុ ការសន្សំ និងការគ្រប់គ្រងចំណូល/ចំណាយជាដើម។ ជំហានសំខាន់នៃការគ្រប់គ្រងហិរញ្ញវត្ថុផ្ទាល់ខ្លួនរួមមានដូចខាងក្រោម ៖
១. កំណត់គោលដៅហិរញ្ញវត្ថុ៖ លោកអ្នកត្រូវកំណត់ពីទិសដៅដែលត្រូវអនុវត្តទាំងរយៈពេលខ្លី និងរយៈពេលវែង ព្រមទាំងមានវិន័យក្នុងការអនុវត្តផងដែរ
២. រៀបចំបង្កើតផែនការថវិកា៖ លោកអ្នកត្រូវមានបញ្ជីប្រភពចំណូលទាំងអស់ ហើយចាត់ថ្នាក់ប្រភេទចំណាយទាំងអស់ ដូចជា ចំណាយទូទៅក្នុងផ្ទះ ការធ្វើដំណើរ អាហារ ការសងបំណុលជាដើម។ ការចំណាយសរុបត្រូវមានចំនួនតិចជាងប្រាក់ចំណូល។ បន្ទាប់ពីនេះ លោកអ្នកត្រូវស្វែងរកលទ្ធភាពបង្កើនប្រភពចំណូល ព្យាករណ៍ការចំណាយ និងកាត់បន្ថយការចំណាយមិនចាំបាច់នៅគ្រាបន្តបន្ទាប់
៣. កត់ត្រា និងតាមដានចំណាយជាប្រចាំ៖ លោកអ្នកត្រូវកត់ត្រា និងតាមដានជាប្រចាំលើការអនុវត្តផែនការថវិកា ដើម្បីធានាស្ថិរភាពហិរញ្ញវត្ថុគ្រួសារ និងជួយអ្នកកំណត់សញ្ញាណនៃការចំណាយលើស ព្រមទាំងជួយកែតម្រូវទម្លាប់ចាយវាយដែលមិនចាំបាច់ឱ្យស្របតាមគោលដៅហិរញ្ញវត្ថុ
៤. សន្សំ និងវិនិយោគ៖ លោកអ្នកត្រូវបែងចែកប្រាក់ចំណូលមួយផ្នែក ដើម្បីជាការសន្សំសម្រាប់ការចូលនិវត្តន៍ មូលនិធិសង្គ្រោះបន្ទាន់ ការសិក្សាកូនៗ និងការចំណាយចាំបាច់ផ្សេងទៀតនាពេលអនាគត។ ទន្ទឹមនេះ លោកអ្នកក៏អាចបែងចែកប្រាក់ចំណូលមួយផ្នែកសម្រាប់ការវិនិយោគផងដែរ
៥. គ្រប់គ្រងបំណុល៖ លោកអ្នកត្រូវគិតគូរការបង់សងបំណុលជាអាទិភាពមួយក្នុងការចំណាយចាំបាច់។ ក្នុងករណីលោកអ្នកមានបំណុលច្រើន លោកអ្នកត្រូវពិភាក្សាជាមួយនឹងម្ចាស់បំណុលអាចបង្កើតផែនការបង់សងបំណុលឱ្យបានច្បាស់លាស់ស្របតាមលទ្ធភាពចំណូលដែលខ្លួនមាន
៦. បង្កើតការការពារហិរញ្ញវត្ថុតាមរយៈសេវាធានារ៉ាប់រង៖ លោកអ្នកគួរចាប់ផ្តើមប្រើប្រាស់សេវាធានារ៉ាប់រងបឋម ដូចជា ធានារ៉ាប់រងគ្រោះថ្នាក់ ធានារ៉ាប់រងសុខភាព និងធានារ៉ាប់រងអាយុជីវិតជាដើម។
៧. ស្វែងយល់ និងប្រឹក្សាយោបល់ជាមួយជនបង្គោល៖ ប្រសិនបើមានចម្ងល់ លោកអ្នកអាចស្វែងយល់ព័ត៌មានមួយចំនួនតាមរយៈការអាន ឬការចូលរួមសិក្ខាសាលាស្តីពីចំណេះដឹងហិរញ្ញវត្ថុ។ ទន្ទឹមនេះ លោកអ្នកត្រូវស្វែងរកការប្រឹក្សាយោបល់ជាមួយជនបង្គោលនៅតាមសហគមន៍អំពីចំណេះដឹងហិរញ្ញវត្ថុទាក់ទងនឹងការគ្រប់គ្រង និងការប្រើប្រាស់ហិរញ្ញវត្ថុប្រកបដោយប្រសិទ្ធភាព។
គួររំលេចផងដែរថា ការគ្រប់គ្រងហិរញ្ញវត្ថុផ្ទាល់ខ្លួន គឺជាដំណើរការដែលទាមទារវិន័យបុគ្គល ការធ្វើផែនការ និងការត្រួតពិនិត្យជាប្រចាំ។ តាមរយៈការអនុវត្តទម្លាប់ហិរញ្ញវត្ថុល្អ លោកអ្នកនឹងមានសមត្ថភាពគ្រប់គ្រងហិរញ្ញវត្ថុរបស់ខ្លួនសម្រាប់សន្តិសុខហិរញ្ញវត្ថុ និងសម្រេចបាននូវគោលដៅហិរញ្ញវត្ថុ ទាំងរយៈពេលខ្លី និងរយៈពេលវែង៕
Account
Security
Favourite Content